تويىپ سەكىرگەن توعىشارلار
بەيسەنبى, 30 مامىر 2013 2:27
مۇنى باسقاشا اتاۋ مۇمكىن دە ەمەس. دانا ابايدىڭ: «جۇمىسى جوقتىق, تاماعى توقتىق, ازدىرار ادام بالاسىن», دەگەنىندەي, تويىنعانىنا ءماز توعىشارلار قوي ۇستىنە بوزتورعاي جۇمىرتقالاعان زاماننىڭ تىنىشىن الىپ تۇر.
ايتايىق دەگەنىمىز, جامبىل اۋدانىنىڭ ورتالىعى اسا اۋىلىندا جاستاردىڭ جاپپاي توبەلەسى ورىن الىپ, 6 ادام ءتۇرلى جاراقات الدى. توبەلەس كەزىندە مىلتىق تا «ىسكە» قوسىلعان.
بەيسەنبى, 30 مامىر 2013 2:27
مۇنى باسقاشا اتاۋ مۇمكىن دە ەمەس. دانا ابايدىڭ: «جۇمىسى جوقتىق, تاماعى توقتىق, ازدىرار ادام بالاسىن», دەگەنىندەي, تويىنعانىنا ءماز توعىشارلار قوي ۇستىنە بوزتورعاي جۇمىرتقالاعان زاماننىڭ تىنىشىن الىپ تۇر.
ايتايىق دەگەنىمىز, جامبىل اۋدانىنىڭ ورتالىعى اسا اۋىلىندا جاستاردىڭ جاپپاي توبەلەسى ورىن الىپ, 6 ادام ءتۇرلى جاراقات الدى. توبەلەس كەزىندە مىلتىق تا «ىسكە» قوسىلعان. پوليتسەيلەردىڭ ءسوزىنە قاراعاندا, ازىرگە جاراقاتتانعان ەكى ادامنان جاۋاپ الىنىپتى. ولار تۇندە اۋىل ورتالىعىنداعى ستاديوننىڭ قاسىنان اۆتوكولىكتەرىمەن ءوتىپ بارا جاتىپ, ءبىر توپ ادامدى كورەدى. ماشينالارىنان ءتۇسىپ, ماسەلەنىڭ ءمانىسىن بىلمەك بولعان كەزدە قارسى بەتتەگى ەسكى ديىرمەن جاقتان تاعى ءبىر توپ شىعا كەلىپ, ستاديون جاقتاعى شوعىرعا تاس لاقتىرىپ, مىلتىقتان وق اتا باستاعان. مىنە, سول سويقاننىڭ سالدارىنان جاراقات العان «اۋەسقويلار» جاقىن جەردەگى اۋداندىق اۋرۋحانادان ءبىر-اق شىعىپتى.
جامبىل وبلىستىق ءىىد ءباسپاسوز قىزمەتىنىڭ حابارلاۋىنشا, ورىن العان وقيعا بويىنشا قر قك 257-بابىنىڭ 3-تارماعى بويىنشا (مىلتىق, گاز تاپانشاسى, پىشاق, كاستەت جانە باسقا دا سۋىق قارۋ قولدانۋ ارقىلى بۇزاقىلىق جاساۋ) قىلمىستىق ءىس قوزعالىپ, قازىر كۇدىكتىلەردى انىقتاۋ, قاماققا الۋ جانە تەرگەۋ جۇمىستارى جۇرگىزىلۋدە.
كوسەمالى ساتتىباي ۇلى,
«ەگەمەن قازاقستان».
جامبىل وبلىسى,
جامبىل اۋدانى,
اسا اۋىلى.
