قۇرالايدىڭ سالقىنى
بەيسەنبى, 23 مامىر 2013 2:46
حالىق كۇنتىزبەسى بويىنشا 20-25 مامىر ارالىعى كيىك لاعىن ورگىزەتىن كەزگە تۇسپا تۇس كەلەدى. البەتتە, وسى ءبىر كۇندەردە كۇن سالقىنداپ, جاۋىن-شاشىن بولۋى دا تابيعاتتىڭ باستى ەرەكشەلىگى. مۇنى حالىق قۇرالايدىڭ سالقىنى دەپ اتايدى. ويتكەنى, شىجىعان ىستىقتا ەمەس ءدال وسىنداي قوڭىر سالقىن كۇندەر دالا ارۋى ءتولى – قۇرالايدىڭ تەز اياقتانىپ, جۇيتكىپ كەتۋىنە قولايلى دەلىنەدى. بيىلعى جىلى وسى حالىقتىق بولجام مەن كۇنتىزبە اينىماي ءدال, سول قالپىندا كەلىپ تۇرعانىن ەل-جۇرت وڭ, جاقسى قۇبىلىسقا جورىپ وتىر.
بەيسەنبى, 23 مامىر 2013 2:46
حالىق كۇنتىزبەسى بويىنشا 20-25 مامىر ارالىعى كيىك لاعىن ورگىزەتىن كەزگە تۇسپا تۇس كەلەدى. البەتتە, وسى ءبىر كۇندەردە كۇن سالقىنداپ, جاۋىن-شاشىن بولۋى دا تابيعاتتىڭ باستى ەرەكشەلىگى. مۇنى حالىق قۇرالايدىڭ سالقىنى دەپ اتايدى. ويتكەنى, شىجىعان ىستىقتا ەمەس ءدال وسىنداي قوڭىر سالقىن كۇندەر دالا ارۋى ءتولى – قۇرالايدىڭ تەز اياقتانىپ, جۇيتكىپ كەتۋىنە قولايلى دەلىنەدى. بيىلعى جىلى وسى حالىقتىق بولجام مەن كۇنتىزبە اينىماي ءدال, سول قالپىندا كەلىپ تۇرعانىن ەل-جۇرت وڭ, جاقسى قۇبىلىسقا جورىپ وتىر.
ءيا, مامىردىڭ ءدال ورتاسىندا باتىس قازاقستان وبلىسى اۋماعىنداعى ىستىق 38 گرادۋسقا دەيىن جەتتى. ايتسە دە, 19 مامىر كۇنى اۋا تەمپەراتۋراسى تومەندەپ سالا بەردى. وسى جانعا جايلى قۇبىلىس ودان كەيىنگى كۇندەرگە دە جالعاستى. قۇرالايدىڭ سالقىنى سوقتى دەستى وڭىردەگى كونەكوز قاريالار. بۇعان دەيىنگى جىلداردا ەدىل مەن جايىقتىڭ ارالىعىندا ميلليونداپ جۇرگەن ەركە دالا ارۋلارىنىڭ سانى ونشا ءدال ەمەس دەرەك كوزدەرىنە قاراعاندا, قازىر وتىز مىڭنىڭ و جاق بۇ جاعىندا كورىنەدى. ونىڭ سوڭعى جىلداردا قانشا ەسە ازايعانىن, قانشا ەسە قىرىلعانىن وسىدان-اق بىلە بەرىڭىز. بۇدان ءبىراز ۋاقىت بۇرىن وبلىس اۋماعىندا مامىر ايىنىڭ اياعىندا كيىكتەر ەكى جىل قاتارىنان قىرىلدى. ءار جىلعى شىعىن مولشەرى رەسمي دەرەكتەردە 12 مىڭ دەلىنگەنىمەن, شىنتۋايتىنا كەلگەندە ونىڭ سانى بۇدان الدە-قايدا كوپ دەپ تۇجىرىمدايدى جانۋارلار دۇنيەسىن قورعاۋ جونىندەگى ماماندار. كەزىندە ونىڭ سەبەبى مەن سالدارى دا ايتىلعان بولاتىن. قالاي دەسەك تە, بولار ءىس بولىپ, بوياۋى سىڭگەنى انىق.
ەندىگى مىندەت كيىكتەردىڭ اتاۋى «قىزىل كىتاپقا» ىلىكپەۋى ءۇشىن ونىڭ الدىن الۋ, بۇل باعىتتا قولدان كەلگەن بارلىق مۇمكىندىكتەردى قاراستىرۋ بولماق. كيىكتەردىڭ ءورىسىن بەلگىلەپ, قاجەتتى جاعدايدا جەلدەن جۇيرىك جانۋاردىڭ شىعانداپ كەتپەۋى ءۇشىن توسقاۋىل قويىپ, سىرتتاي باقىلاۋعا الۋ – سونىڭ ءبىر جولى رەتىندە بەلگىلەنگەن. بۇگىنگى كۇنى ساقتالىپ وتىرعان كيىكتەردىڭ ازىن-اۋلاق ۇيىرلەرى مەن سوڭعى تۇياقتارى وبلىستىڭ كازتالوۆ جانە جانىبەك اۋداندارى اۋماعىندا كەزدەسەدى. ەندەشە, بۇل ماڭايعا مەملەكەتتىك دەڭگەيدە كوڭىل ءبولىنىپ, وعان قورىق مارتەبەسىن بەرۋ جولدارى قاراستىرىلسا اقبوكەندەردىڭ جاپپاي قۇرىپ كەتپەۋىنە سەپتىگى تيەر ەدى-اۋ دەگەن وي كەلەدى.
تەمىر قۇسايىن,
«ەگەمەن قازاقستان».
باتىس قازاقستان وبلىسى.
––––––––––––––––––
سۋرەتتە: كيىكتىڭ لاعى.
