وسى مەرەيلى ءساتتىڭ مەيمانى بولعان اۋدارىسپاق فەدەراتسياسىنىڭ پرەزيدەنتى, ۇلتتىق ات سپورتىنىڭ جاناشىرى دانيار قوبىلاندين: «ۇلكەن قالالار مەن كەيبىر وبلىس ورتالىقتارىندا ات سپورتىنان بولماعان شارالار شالقاردىڭ شاعىن اۋىلىندا جۇزەگە اسىپ جاتاتىنىن كورىپ, مارقايىپ قالامىز. ءبۇگىنگى باسقوسۋدىڭ ءمانى زور, ماقساتى – ۇلتتىق بولمىسىمىزبەن ۇندەسەدى», – دەپ اقجارما تىلەگىن ءبىلدىردى. بۇل ءسوزدى اۋداندىق دەنەشىنىقتىرۋ جانە سپورت ءبولىمىنىڭ باسشىسى سۇلتان جۇمانوۆ تا قۋاتتاپ, ۇلتتىق سپورتقا دەن قويىپ جاتقان اۋىل جىگىتتەرىنە ريزاشىلىعىن ءبىلدىردى.
كوپ ۇزاماي ساحنادان كوكپار كومانداسى ەندى «ءالىم اتا» بولىپ اتالاتىندىعى رەسمي جاريالاندى.
اۋىلدىڭ ارداگەرلەر ۇيىمىنىڭ توراعاسى ورىنباسار جۇباەۆ, اۋىل اقساقالى ۋايس احمەت: «ءالىم اتا — قازاق حالقىن قۇراعان بەلدى تايپالاردىڭ ءبىرى. شەجىرە بويىنشا كىشى ءجۇز قۇرامىنا ەنەدى. ەندى كۇللى قازاق ەلىنە ورتاق بابامىزدىڭ ەسىمىن الىپ ءجۇرۋ كوكپارشىلارىمىزعا ۇلكەن جاۋاپكەرشىلىك جۇكتەيدى», – دەپ ولارعا زور سەنىم ارتىپ, باتالارىن بەردى.
جاڭا ەسىمدى يەلەنگەن كوكپار كومانداسىنىڭ قۇرمەتىنە وراي كوكپار, اۋدارىسپاق, جامبى اتۋ, الامان, قۇنان بايگە, قوشقار كوتەرۋدەن سايىستار ءوتتى. الامان بايگەدەن ءى ورىندى موڭكە بي اۋىلدىق وكرۋگىنەن كەلگەن نۇربەك بەرىمبەتوۆتىڭ تۇلپارى يەلەندى, جىلتىرلىق جولدىمۇرات جۇباەۆ قوسقان ءسايگ ۇلىك قۇنان بايگەدەن ءبىرىنشى كەلدى. قوشقار كوتەرۋدەن وسى اۋىلدىڭ ماعجان يساعالي ەسىمدى جىگىتى العاشقى ورىنعا شىقتى. ءجۇلدەگەرلەردىڭ بارلىعى ۇيىمداستىرۋشىلار تاراپىنان سىي-سياپاتتار الدى.
– قازىردىڭ وزىندە وبلىس اتىنان شىعىپ, اتالعان سپورت ءتۇرلەرىنەن ەلىمىزدىڭ تۇكپىر-تۇكپىرىندە وتەتىن دودالارعا قاتىسىپ جۇرگەن اۋىل جىگىتتەرى بار. دانيار مەيرامبەك ەسىمدى اۋىلداسىمىز جاقىندا كوكپاردان رەسپۋبليكالىق اشىق ءبىرىنشىلىككە قاتىساتىن كوماندانىڭ ىرىكتەۋ قۇرامىندا بولىپ, تاراز قالاسىندا 20 كۇن ازىرلىكتەن ءوتىپ قايتتى. بۇگىندە ول اتالعان كوماندانىڭ رەزەرۆىندە تۇر. سونداي-اق التاي سۇيەۋباي ەسىمدى ازامات اۋدارىسپاقتان سپورت شەبەرى اتاندى. قانىبەك جانسۇگىروۆ, دانيار مەيرامبەك ەسىمدى جىگىتتەرىمىز اۋدارىسپاقتان سپورت شەبەرلىگىنە ءۇمىتكەر.
وسى شارانىڭ وتۋىنە اۋىلىمىزدىڭ بارشا جاستارى بەلسەندى بولدى. 1968 مەن 1997 جىلدارى ارالىعىندا تۋعان جىلتىرلىق ازاماتتار بۇگىنگى شاراعا دەمەۋشىلىك جاسادى, – دەيدى جىلتىر اۋىلدىق وكرۋگى اكىمى اپپاراتىنىڭ جەتەكشى مامانى مۇراتبەك ءۇبنيازوۆ.
