قۇرامىندا 15 مۇشەسى بار «ارۋ انالار» ءانسامبلىنىڭ ەڭ ەگدە ءانشىسى 92 جاستا ەكەن. انسامبل جەتەكشىسى كلارا باقتىعاليقىزىنىڭ ءوزى دە 83 جاستا. رەسپۋبليكالىق ارداگەرلەر كەڭەسىنىڭ مۇشەسى كلارا سارجانوۆا ءالى كۇنگە دەيىن وڭىردەگى قوعامدىق ىستەردىڭ بەل ورتاسىندا جۇرەدى. وسى كەزدەسۋدە دە جيىلعان جاستارعا ءوزىنىڭ ءومىر تاجىريبەسى, باسىنان كەشكەن وقيعالارى تۋرالى ايتىپ, اقىل-كەڭەسىمەن ءبولىستى.
– مەن قازىرگى جاستارعا, اسىرەسە قىز بالالارعا ءبىلىمدى بولۋعا ۇمتىلىڭدار دەر ەدىم. وقىعان قىزدىڭ, ءبىلىمدى ادامنىڭ قاشان دا ءباسى بيىك بولادى. سونىمەن بىرگە ۇلتتىق تاربيەنى, حالقىمىزدىڭ سالت-ءداستۇرىن دە ۇمىتپاۋ قاجەت, – دەدى كلارا باقتىعاليقىزى. ءوز ومىرىنەن ناقتى مىسالدار كەلتىرىپ, اڭگىمەسىن ازىلمەن ارلەپ سويلەيتىن اجەنىڭ لەبىزى ستۋدەنت جاستارعا قاتتى ۇنادى.
«ارۋ انالار» ءانسامبلىن كلارا سارجانوۆا «كوپ بالالى, كوپ ەتنوستى انالار توبى» دەپ اتايدى. شىنىندا دا توپ قۇرامىندا قازاقتان بولەك ۋكراين, گرەك, تاتار, ورىس ۇلتىنىڭ وكىلدەرى جينالعان. «حالىق ءانسامبلى» اتاعىن جەڭىپ العان توپتىڭ رەپەرتۋارىندا وتان, تۋعان جەر, وتباسى تاقىرىبىنداعى پاتريوتتىق اندەر وتە كوپ ەكەن.
– قازاق اندەرى وتە اۋەزدى, جانىما سونداي جاقىن. ءوزىم ءومىر بويى قاراپايىم قىزمەت ەتتىم. «ارۋ انالار» توبىنا قوسىلۋىم قىزىق بولدى. جەتەكشىمىز كلارا باقتىعاليقىزىمەن ماعان «التىن القا» بەلگىسىن تابىس ەتكەن سالتاناتتى جيىندا العاش تانىستىم. مەنى كورگەن بويدا-اق «گاليا, ءسىز ءان ايتا بىلەسىز بە؟ ءبىزدىڭ توپقا قوسىلىڭىز!» دەگەن ۇسىنىس ايتتى. ارينە, ءبىردەن كەلىستىم. سول كۇننەن بەرى مەنىڭ ەكىنشى ءومىرىم باستالعانداي بولدى, – دەيدى 7 بالانىڭ اناسى, 15 نەمەرە, 1 شوبەرە ءسۇيىپ وتىرعان گالينا زەنچۋرينا. ول «ورالىم – دوستىق قالاسى» ءانىن ەرەكشە شابىتپەن شىرقادى.
توپتىڭ تاعى ءبىر مۇشەسى, «التىن القا» يەگەرى ءمانشۇك ەرمۇقانوۆا ءمانشۇك مامەتوۆا اتىنداعى قىزىلوردا قىزدار ۋچيليششەسىندە ءمادينا ەراليەۆامەن بىرگە وقىپتى. جاستىق شاعىن, ستۋدەنتتىك ءومىرىن قىزىقتى ەتىپ بايانداپ بەرگەن ءمانشۇك اپاي دا عيبراتتى اڭگىمەسىمەن جاستاردى باۋراپ الدى. «ماماندىق تاڭداۋدا جانە جار تاڭداۋدا جاڭىلماڭىزدار, جاستار! ەڭبەكتەن قاشپاڭىزدار, ءۇلكەندى سىيلاڭىزدار! دەيدى ءانشى اجە.
«ارۋ انالار» ءانسامبلىنىڭ كوركەمدىك جەتەكشىسى, قازاقستان رەسپۋبليكاسى مادەنيەت قايراتكەرى ادىلبەك سۇلەيمەنوۆ – ەل اراسىندا 40 جىلدان اسا شىرقالىپ كەلە جاتقان بەلگىلى «اكە تۋرالى ءاننىڭ» اۆتورى.
