راتسيا ارقىلى ەۆرازيا كوشەسىندەگى 54-ءۇيدىڭ شاتىرىندا قىز بالا وزىنە قول جۇمساماق بولعان حاباردى ەستىسىمەن, سول ماڭدا كەزەكشىلىكتە جۇرگەن پوليتسيا قىزمەتكەرلەرى وقيعا ورنىنا اسىقتى. كۇن ەڭكەيىپ, قاراڭعىلىق تۇسە باستاعان شاق ەدى. اتالعان كوپقاباتتى ءۇيدىڭ كولبەۋ شاتىرىنىڭ ەرنەۋىندە وتىرعان قىز بالاعا الدىمەن جەتكەن نۇربولات ونى اڭگىمەگە تارتىپ, الدارقاتا وتىرىپ, جانىنا جەتىپ, قولىنان ۇستاي الدى.
- بويجەتكەن كەز كەلگەن ۋاقىتتا سەكىرىپ كەتۋى مۇمكىن ەدى. ويلانۋعا, قۇتقارۋشىلار بريگاداسىن شاقىرۋعا ۋاقىت تاپشى بولدى. سوندىقتان ءبىزدىڭ قىزمەتكەرلەر ءوز ءومىرىن قاتەرگە تىگىپ, كومەككە اسىقتى, - دەيدى باتىس قازاقستان وبلىستىق پوليتسيا دەپارتامەنتىنىڭ ءباسپاسوز قىزمەتىنىڭ وكىلى ءاليا ناۋرىزعاليەۆا.
شىنىمەن دە سول كۇنى مايدا جاۋىن جاۋىپ, شاتىر بەتى دىمقىل, سىرعاناق بولاتىن. قىزدى قۇتقارماق بولعان پوليتسيا قىزمەتكەرلەرىنىڭ ءوزى دە بيىكتەن قۇلاپ كەتۋى مۇمكىن ەدى. ابىروي بولعاندا ءبارى ساتىمەن اياقتالدى.
ورال قالالىق پوليتسيا باسقارماسى اباي بولىمىندە سۋيتسيد ارەكەتى بويىنشا وقيعانى رەسمي تىركەپ, تەرگەۋ جۇمىسىن باستادى. ءتيىستى ماماندارمەن اڭگىمەلەسكەننەن كەيىن بويجەتكەندى تۋىستارى الىپ كەتىپتى. بۇل وقيعادان الەۋمەتتىك جەلى ارقىلى حاباردار بولعان كوپشىلىك جەدەل دە ساۋاتتى ارەكەت ەتكەن قوس پوليتسيا قىزمەتكەرىن ماراپاتتاۋدى ۇسىنىپ جاتىر.
