قايتا تۇرلەنگەن ۆەلوسيپەد جولى ادام تانىماستاي وزگەرگەن. ونىڭ اۋماعىندا پامپ-ترەك, دەرت-پارت, سكەيت-پارت سىندى ارناۋلى جولاقتار پايدا بولعان. سىيىمدىلىعى 200 كورەرمەنگە ارنالعان سۋ جاڭا تريبۋنا مەن اينالمالى جارىق ورناتىلعان. كاسىبي سپورتشىلاردان بولەك سپورتتى جانىنا سەرىك ەتكەن كەز-كەلگەن ازامات مۇندا كەلىپ بوي سەرگىتىپ, سپورتپەن شۇعىلدانا الادى. كەلەم دەۋشىلەردىڭ جاس ەرەكشەلىكتەرىنە دە شەكتەۋ جوق. الداعى ۋاقىتتا جاڭا ۆەلوسيپەد جولىندا جەرگىلىكتى جانە حالىقارالىق دەڭگەيلەردە جاپپاي سپورتتىق جانە مادەني شارالار وتكىزۋ جوسپارلانىپ وتىر.
«قور قاشاندا سپورتتىڭ جانە سپورت ينفراقۇرىلىمىنىڭ دامۋىنا ەرەكشە كوڭىل بولەدى. وسىعان بايلانىستى ۆەلو جولداردى قالپىنا كەلتىرۋ جۇمىستارىن قارجىلاندىرۋ تۋرالى شەشىم قابىلداندى. بۇل جاس ازاماتتاردىڭ جانە جاس ۇرپاقتىڭ سۇيىكتى ورنى بولاتىنىنا سەنىمدىمىن, مۇندا بولاشاق چەمپيونداردىڭ العاشقى قادامدارى جاسالادى. دەنى ساۋ ۇرپاق –تۇعىرلى ۇلتتىڭ بولاشاعى», دەدى احمەتجان ەسىموۆ.
سونداي-اق ا. ەسىموۆ قوردىڭ قايىرىمدىلىق ساياساتىن قايتا قاراۋ تۋرالى باياندادى. اتاپ ايتقاندا, قور مەرەيتويلىق ءىس-شارالاردى جانە قوعامدىق بىرلەستىكتەردىڭ كوممۋنالدىق ماسەلەلەرىن شەشۋدەن باس تارتىپ وتىر. الەۋمەتتىك ماڭىزى بار جوبالاردى دامىتۋ, بالالاردى وڭالتۋ, ءبىلىم بەرۋدى دامىتۋ جانە مەديتسينالىق كومەكتى كەڭەيتۋ بۇدان بىلاي قايىرىمدىلىق ساياساتتىڭ باستى باعىتىنا اينالماق.
– قالامىزدا بۇقارالىق سپورتپەن اينالىسام دەگەن جانعا بارلىق جاعداي جاسالعان. بۇگىنگى ۆەلوسيپەد جولىنىڭ ىسكە قوسىلۋى دا بىزدەر ءۇشىن ۇلكەن قۋانىش. اسىرەسە ءبىز سياقتى زەينەت جاسىنداعى ازاماتتار مەن جاستار ءۇشىن تاپتىرماس مۇمكىندىك, – دەدى قالا تۇرعىنى سەرىك بايسەڭگىروۆ.
ايتا كەتكەن ءجون, «Samruk-Kazyna Trust» الەۋمەتتىك جوبالاردى دامىتۋ قورى «سامۇرىق-قازىناعا» كىرەتىن بارلىق كومپانيالاردىڭ اتىنان جالپى قۇنى 4,8 ملرد تەڭگە بولاتىن, الەۋمەتتىك ماڭىزدى ماسەلەلەردى شەشۋگە باعىتتالعان 15 جوبانى جۇزەگە اسىرعان. سال اۋرۋىنا شالدىققان 1170 بالاعا تەگىن وڭالتۋ كۋرستارى ۇيىمداستىرىلىپ, مەكتەپ جاسىنداعى 9000-نان استام ءجاسوسپىرىم قوردىڭ قولداۋىمەن وقۋ جانە سپورت ۇيىرمەلەرىنە تەگىن قاتىسىپ ءجۇر.
