تورعاي دالاسىندا قازىر قىزعالداق ماۋسىمى, قىزىلدى-جاسىلدى كىلەم توسەگەندەي كوكتەمنىڭ قۇلپىرعان شاعى. امانگەلدى پوسەلكەسىنىڭ ىرگەسىنە اق شاڭقان ۇيلەر جاعالاي تىگىلگەن. ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» اتتى ماقالاسى اياسىندا وتكەن مەرەكەگە جينالعانداردى وبلىستىق مادەنيەت باسقارماسىنىڭ باسشىسى ەرلان قالماقوۆ وبلىس اكىمى ارحيمەد مۇحامبەتوۆتىڭ اتىنان قىزعالداقتار مەرەكەسىمەن قۇتتىقتادى.
اۋدان اكىمى ءامىرحان اسانوۆ قىزعالداقتار مەرەكەسى جاس ۇرپاقتى تۋعان جەرگە پاتريوتتىق سەزىمدە تاربيەلەۋدەگى ۇلكەن شارا ەكەنىن ايتتى.
حالقىمىزدىڭ رۋحاني ومىرىمەن استاسقان تابيعات بايلىعى قىزعالداق قازاق جەرىنىڭ ءبىر ماقتانىشى بولىپ سانالادى. قىزعالداق فەستيۆالىندە حالقىمىزدىڭ داستۇرلەرى مەن سالتىن جاڭعىرتقان قولونەرشىلەر, زەرگەرلەر ءوز قولىنان شىققان ونەر بۇيىمدارىن كوپشىلىككە كورسەتتى. ولاردىڭ قالاي جاسالاتىنىن قىزىقتاۋشىلار كوپ بولدى. ايتىس, ات جارىس, بالۋان كۇرەسى, قىز قۋ, توعىز قۇمالاق جارىسى, كونتسەرت فەستيۆال قىزىعىن ەسەلەي ءتۇستى.
«فەستيۆال وتە مازمۇندى, قىزىق بولىپ جاتىر. قىستان كىسىلىپ شىققان حالىق سىلكىنىپ, كوڭىل كوتەرىلىپ قالدى», دەيدى امانگەلدى اۋدانىنىڭ تۇرعىنى تولەباەۆ سەرىك.
امانگەلدى اۋدانىنداعى تويتوبە ناعىز مەرەكە مەكەنىنە اينالدى.
