كەزدەسۋ بارىسىندا الداعى ۋاقىتتا جوعارى دەڭگەيدەگى ەكىجاقتى ساپارلارعا قاتىستى ماسەلەلەر تالقىلاندى. اتاپ ايتقاندا, قازاقستاندىق تاراپ يران يسلام رەسپۋبليكاسى پارلامەنتىنىڭ سپيكەرى ءالي ارداشير ءلاريدجانيدىڭ 2019 جىلعى 23-24 قىركۇيەكتە نۇر-سۇلتان قالاسىندا وتەتىن ەۋرازيا ەلدەرىنىڭ پارلامەنتتەرى سپيكەرلەرىنىڭ 4-ءشى وتىرىسىنا قاتىسۋىن كۇتۋدە.
تاراپتار كاسپي ماڭى مەملەكەتتەرىنىڭ باسشىلارى كاسپي تەڭىزىنىڭ قۇقىقتىق مارتەبەسى تۋرالى كونۆەنتسياعا قول قويىلعان اقتاۋ ءسامميتىنىڭ تاريحي ماڭىزدىلىعىن اتاپ ءوتتى.
يران ترانزيتتىك-كولىكتىك مارشرۋتتاردى ءارتاراپتاندىرۋ اياسىندا قازاقستان ءۇشىن ماڭىزدى ءرول اتقارادى. قازاقستان - تۇرىكمەنستان - يران تەمىرجولىن جانە كاسپي تەڭىزى ارقىلى تەڭىز باعىتىن ءتيىمدى پايدالانۋ قاجەتتىلىگى اتاپ ءوتىلدى. قازىرگى تاڭدا ەكىجاقتى ىنتىماقتاستىقتى دامىتۋعا, سونىڭ ىشىندە تەمىرجول, اۋىل شارۋاشىلىعى, تۋريزم جانە باسقا دا سالالارداعى ىنتىماقتاستىقتى دامىتۋ ءۇشىن بىرقاتار پەرسپەكتيۆالىق باعىتتار بار.
سوڭعى جىلدارى قازاقستان مەن يران اراسىنداعى تاۋار اينالىمى كولەمىنىڭ قىسقارۋى بايقالۋدا. 2018 جىلى بۇل كورسەتكىش 516 ملن اقش دوللارىن قۇرادى. وسى رەتتە ءسىم باسشىسى يراندىق بيزنەستى قازاقستاننىڭ اۋماعىنداعى ءتۇرلى ينۆەستيتسيالىق جوبالاردى ىسكە اسىرۋعا شاقىردى, سونىڭ ىشىندە اگروونەركاسىپ جانە تاۋ-كەن سالالارىندا.
قازاقستان-يران ۇكىمەتارالىق كوميسسياسىنىڭ 16-شى وتىرىسىنىڭ ءوتۋى كەلەسى جىلى نۇر-سۇلتاندا جوسپارلانىپ وتىر.
ايتا كەتەيىك, قازىرگى تاڭدا كونۆەنتسيانى ازەربايجان, قازاقستان جانە تۇرىكمەنستان راتيفيكاتسيالادى. كونۆەنتسيانىڭ ماقساتى كاسپي تەڭىزىن, سونىڭ ىشىندە ونىڭ سۋىن, ءتۇبىن, جەر قويناۋىن, تابيعي رەسۋرستارىن جانە تەڭىزدەگى اۋە كەڭىستىگىن پايدالانۋ تۋرالى تاراپتاردىڭ قۇقىقتارى مەن مىندەتتەرىن انىقتاۋ جانە رەتتەۋ بولىپ تابىلادى. كونۆەنتسيا ۇلتتىق ايماقتاردى, يۋريسديكتسيالار مەن ەگەمەندىكتى دەليميتاتسيالاۋ, جەر قويناۋىن پايدالانۋ, ترانزيت جانە تاسىمالداۋ, سۋ استى قۇبىرلارى مەن كابەلدەرىن توسەۋ, كاسپي تەڭىزىنىڭ قورشاعان ورتانى قورعاۋ جانە بيولوگيالىق رەسۋرستارىن يگەرۋ ماسەلەلەرىن رەتتەيدى.
