بۇگىنگى تاڭدا ورتالىقتاندىرىلعان سۋ جۇيەسىنە 400 ەلدى مەكەن قوسىلعان. 255 اۋىل جەرگىلىكتى سۋ كوزدەرىن پايدالانادى. «اۋماقتاردى دامىتۋ» مەملەكەتتىك باعدارلاماسى اياسىندا سوڭعى جىلدارى 36 ميلليارد تەڭگەگە 2 مىڭ شاقىرىمدىق سۋ قۇبىرلارى تارتىلىپ, 56 ەلدى مەكەنگە ساپالى اۋىز سۋ جەتكەن.
«بيىل يندۋستريا جانە ينفراقۇرىلىمدىق دامۋ مينيسترلىگى ارقىلى جانە وبلىستىق بيۋدجەتتتەن 2,7 ميلليارد تەڭگە ءبولىنىپ, 3 جوبا ۆلاسوۆكا, ۆوزۆىشەنكا, نوۆويشيمكا ەلدى مەكەندەرىندە جۇزەگە اسىرىلدى. 2 جوبا شەڭبەرىندە ساۋمالكول كەنتى مەن پەتروپاۆل قالاسىندا سۋمەن جابدىقتاۋ جۇمىستارى جالعاستىرىلادى. تۇتاستاي العاندا, 32 اۋىل تۇرعىندارى تىرشىلىك نارىمەن قامتاماسىز ەتىلەدى», دەيدى ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى ادىلبەك اۋباكىروۆ.
وتكىر ماسەلەلەردىڭ ءبىرى – سۋمەن جابدىقتاۋ نىساندارىن پايدالانۋ. 175 نىساننىڭ 92-ءى عانا مامانداندىرىلعان پايدالانۋشى ۇيىمدارعا سەنىمدى باسقارۋعا بەرىلگەن. سۋمەن جابدىقتاۋ نىساندارىنا يەنىڭ كوپتىگىنەن «قويشى كوپ بولسا, قوي ارام ولەدىنىڭ» كەرىن كەلتىرىپ وتىر.
«قازشۋشار «رمك -نىڭ وبلىستىق فيليالى «ەسىل سۋ» كاسىپورنىنىڭ ديرەكتورى قانات اسقاروۆتىڭ ايتۋىنشا, سۋ كوميتەتى ورتالىقتان باسقارۋدى ءوز مىندەتىنە الۋدى وتىنگەنمەن, يندۋستريا جانە ينفراقۇرىلىمدىق دامۋ مينيسترلىگى تاراپىنان بۇل ۇسىنىس قولداۋ تاپپاعانعا ۇقسايدى. وبلىس مۇنداي قادامعا دايىن كورىنەدى. بىراق رەسپۋبليكالىق ۆەدوموستۆونىڭ قورىتىندىسى وعان تەجەۋ سالىپ وتىرعاندىقتان, جەكە-دارا شەشىم قابىلداۋعا قاۋقارسىز.
