ورتالىق سايلاۋ كوميسسياسىنىڭ حاتشىسى ءسابيلا مۇستافينانىڭ ايتۋىنشا, قاسىم-جومارت كەمەل ۇلى «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 54 جانە 55-بابىنا سايكەس ءتيىستى قۇجاتتارىن وتكىزگەن.
«2019 جىلعى 9 ماۋسىمعا تاعايىندالعان قازاقستان پرەزيدەنتىنىڭ كەزەكتەن تىس سايلاۋىندا قاسىم-جومارت كەمەل ۇلى توقاەۆتى قازاقستان رەسپۋبليكاسى پرەزيدەنتتىگىنە كانديدات رەتىندە تىركەۋ تۋرالى قاۋلى جوباسى دايىندالدى. قاۋلى جوباسىندا كەلەسى ماسەلەلەر قاراستىرىلعان: ق.ك.توقاەۆ 2019 جىلعى 9 ماۋسىمعا تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىندا قازاقستان رەسپۋبليكاسى پرەزيدەنتىنە كانديدات رەتىندە تىركەلسىن. پرەزيدەنتكە كانديدات ق.ك.توقاەۆقا ءتيىستى كۋالىك بەرىلسىن. ق.ك.توقاەۆ ارناۋلى ۋاقىتشا شوتتى اشۋ ءۇشىن «قازاقستان حالىق جيناق بانكى» اق-قا پرەزيدەنتتىككە كانديدات بولىپ تىركەلگەنى تۋرالى مالىمەتتەر ۇسىنىلسىن. باق-تا ق.ك.توقاەۆتىڭ قازاقستان رەسپۋبليكاسى پرەزيدەنتتىگىنە كانديدات بولىپ تىركەلگەنى تۋرالى حابار جاريالانسىن», دەدى س.مۇستافينا.
ورتالىق سايلاۋ كوميسسياسىنىڭ مۇشەلەرى قاۋلى جوباسىنا داۋىس بەرىپ, ول ءبىراۋىزدان قابىلداندى. بۇدان سوڭ, ورتالىق سايلاۋ كوميسسياسىنىڭ توراعاسى بەرىك يماشەۆ پرەزيدەنتتىككە كانديدات قاسىم-جومارت توقاەۆتىڭ جۇمىس ساپارىندا بولۋىنا بايلانىستى ءتيىستى كۋالىكتى ونىڭ سەنىمدى وكىلى - «Nur Otan» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆقا تابىس ەتتى.
