رۋحانيات • 03 مامىر، 2019

وسكەمەندە جۇرسىنعالي احمەروۆ اتىنداعى كابينەت اشىلدى

946 رەت كورسەتىلدى

وسكەمەندەگى س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىندە جۇرسىنعالي احمەروۆتىڭ قۇرمەتىنە تسيفرلى گۋمانيتاريستيكا كابينەتى اشىلدى. سالتاناتتى شاراعا قورعانىس ءمينيسترى نۇرلان ەرمەكباەۆ پەن عالىمنىڭ جارى شولپان توعىسوۆا ارنايى قاتىستى.

شارا الدىندا تاريح جانە ارحەولوگيا سالاسىنىڭ دامۋىنا ولشەۋسىز ۇلەس قوسقان عىلىم قايراتكەرى، ۇلاعاتتى ۇستاز جۇرسىنعالي احمەروۆتى ەسكە الۋعا ارنالعان دوڭگەلەك ۇستەل ۇيىمداستىرىلدى. دوڭگەلەك ۇستەلدە ءسوز العان قورعانىس ءمينيسترى بۇل شارانىڭ تاربيەلىك ءمانى زور ەكەندىگىن اتاپ ءوتتى. «جۇرسىنعالي احمەروۆ بەرگەنىنەن بەرەرى مول ارداقتى ۇستاز ەدى. ءبىز ول كىسىنىڭ ىسكەرلىگىن ەرەكشە اتاپ وتكىمىز كەلەدى. الداعى ۋاقىتتا ءبىز تاريح عىلىمدارىنىڭ دامۋىنا زور ۇلەس قوسقان جۇرسىنعالي احمەروۆتىڭ تاعى بىرنەشە ەڭبەگىن جيناقتاپ، ونى تسيفرلاندىرۋ جۇيەسىنە ەنگىزەتىن بولامىز»،  دەدى دوڭگەلەك ۇستەلدى اشقان ۋنيۆەرسيتەت رەكتورى مۇحتار تولەگەن.

جۇرسىنعالي احمەروۆتىڭ جۇبايى شولپان توعىسوۆا ءوز سوزىندە عالىم بار عۇمىرىن ءبىلىم سالاسىنا ارناپ، زەينوللا ساماشەۆ سىندى بىلىكتى ارحەولوگتاردىڭ بىرنەشە بۋىنىن تاربيەلەپ شىعارعانىن تىلگە تيەك ەتتى. «ءبىز وتباسىن قۇرعان سوڭ مەن جامبىل اتىنداعى دارىندى بالالارعا ارنالعان مەكتەپ-ينتەرناتىندا جۇمىس ىستەدىم. سول كەزدە ول ماعان اۋىرلىق سالماۋ ءۇشىن بالالارعا ءوزى قارادى. كەيدە بالالار اۋىرىپ قالسا: «شولپان، قىزداردى اۋرۋحاناعا اپارىپ كەلە الاسىڭ با؟» دەپ جايلاپ سۇرايتىن ەدى. سوندا مەن: «ينتەرناتتاعى بالالاردى قايدا قالدىرامىن، ولاردىڭ ساباقتارىن كىم وقىتادى؟» دەيمىن عوي ك ۇلىپ. ول بولسا: «وندا سەن جۇمىسىڭنان قالما. ءبىزدىڭ ەلىمىزگە ءبىلىمدى بالالار كەرەك» دەپ تۇسىنىستىك تانىتىپ، بالالاردى دارىگەرگە قاراتۋعا ءوزى باراتىن ەدى. الايدا ول جۇمىستان ەش سەبەپسىز قالىپ كورگەن ەمەس. جۇرسىنعالي تاڭعى بەستەن تۇرىپ، ساباق بەرۋگە تىڭعىلىقتى دايىندالاتىن ەدى. وسىدان-اق ونىڭ جاۋاپكەرشىلىگى جوعارى، جانى جايساڭ ازامات ەكەنىن بايقاۋعا بولادى»، دەيدى شولپان توعىسوۆا. 

شارا بارىسىندا جۇرسىنعالي احمەروۆتىڭ ەڭبەكتەرى جيناقتالعان كىتاپتىڭ تۇساۋكەسەرى ءوتتى.

سوڭعى جاڭالىقتار

دجەرۆونتا دەۆيس جەڭىل سالماقتى تاڭدادى

كاسىپقوي بوكس • بۇگىن، 17:45

ۇقساس جاڭالىقتار