وسى باعىتتا قانداي جۇمىستار اتقارىلدى؟ الدا قانداي جۇمىستار جوسپارلانعان؟ كەشە ورتالىق كوممۋنيكاتسيالار قىزمەتىندە وتكەن ارنايى بريفينگتە ەنەرگەتيكا مينيسترلىگىنىڭ باسشىلىعى وسى تۋرالى باياندادى.
بۇگىندە قازاقستاننىڭ بارلىق ەلەكتر ستانسالارىنىڭ جالپى قۋاتى 21 گۆت-عا تەڭ. «قازاقستاندىق كۇن ەنەرگەتيكاسى قاۋىمداستىعى» زتب ديرەكتورلار كەڭەسىنىڭ توراعاسى نۇرلان قاپەنوۆ وسىلاي دەدى. ونىڭ ايتۋىنشا, 2018 جىلدىڭ قورىتىندىسى بويىنشا الەمدىك كۇن ەنەرگەتيكاسىنىڭ بەلگىلەنگەن قۋاتى 500 گۆت-دان استى. 2018 جىلدىڭ ىشىندە 100 گۆت-دان استام قۋات ءوندىرەتىن فوتوەلەكترلىك ستانسالار سالىندى.
ن.قاپەنوۆتىڭ ايتۋىنشا, عالامشاردا ەلەكتر قۋاتىن ءوندىرۋ ءۇشىن كۇن ەنەرگياسىن پايدالاناتىن 90 ەل بار. 32 ەلدە 1 گۆت-دان استام قۋات وندىرەتىن ستانسالار ورناتىلعان. كۇننەن ەنەرگيا وندىرەتىن نىسانداردىڭ قۋاتىن 300-دەن 500 گۆت-عا كوبەيتۋگە 2 جىل ۋاقىت كەتىپتى. سالىستىرۋ ءۇشىن ايتار بولساق, اەس-تەردىڭ قۋاتى شامامەن 400 گۆت-نى قۇرايدى. بەدەلدى الەمدىك ساراپشىلار 2019 جىلى الەمدە 129 گۆت فوتوەلەكترلىك كۇن ەلەكتر ستانسالارى سالىنادى دەگەن بولجام جاساپ وتىر.
بىلتىر ەلىمىزدە وندىرىلگەن «جاسىل» ەنەرگيانىڭ كولەمى 1,35 ملرد كۆت-عا جەتىپ, ەلەكتر ەنەرگياسىنىڭ جالپى كولەمىندەگى ۇلەس سالماعى 1,27 %-دى قۇراعان بولاتىن. الداعى ۋاقىتتا بۇل كورسەتكىش قارقىندى تۇردە ءوسۋى ءتيىس.
