− ءبىز قازاقستاننىڭ كەيىنگى تولقىن جاستارىنا ۇشۋ ۇتقىرلىعى مەن قولجەتىمدىلىگى قاجەت ەكەنىن تۇسىنەمىز. لوۋكوستەردىڭ كلاسسيكالىق ۇلگىسى بويىنشا جاسالعان FlyArystan دەر كەزىندە پايدا بولدى. ءبىز ىشكى جانە حالىقارالىق باعىتتاردا جولاۋشىلار اعىنى ەداۋىر وسەتىنىن بولجادىق. ۋاقىت وتە كەلە شەتەلدىك اۋەجايلارمەن بايلانىس ورناتۋدى كوزدەپ وتىرمىز. ءبىز وڭىرلەر ەكونوميكاسىنىڭ قارقىندى ءوسۋىن بايقايمىز جانە وسى دامۋدىڭ ءبىر بولىگى بولاتىنىمىزعا ۇمىتتەنەمىز», دەدى «ەير استانا» اۋە كومپانياسىنىڭ پرەزيدەنتى پيتەر فوستەر. اتالعان اۋە كومپانياسى بيىل 29 ناۋرىزدا الماتى-تاراز-الماتى, سونداي-اق الماتى-ورال-الماتى باعىتتارى بويىنشا بيلەت ساتا باستادى. كەيىننەن الماتىدان نۇر-سۇلتانعا, قاراعاندىعا, پاۆلودار مەن شىمكەنتكە بيلەت ساتىلا باستادى. بۇگىندە رەسپۋبليكانىڭ التى قالاسىنا اۋە بيلەتتەرى ساتىلۋدا.
FlyArystan اۋە كومپانياسى 2022 جىلى 4 ملن ادامعا دەيىن جولاۋشى تاسىمالداۋدى كوزدەپ وتىر. اتالعان اۋە كومپانياسىنىڭ ماركەتينگ جانە ساتۋ ءبولىمىنىڭ ديرەكتورى جانار جايلاۋوۆانىڭ ايتۋىنشا, قازىرگى ۋاقىتتا نەبارى 2 ۇشاق اۋە رەيستەرىن ورىندايدى.
− قىركۇيەك ايىندا تاعى ءبىر ۇشاق قوسىلادى. سوندىقتان قاي ءوڭىردىڭ اۋەجايى ءوتىنىم بەرەدى, سول باعىتقا قاراي رەيس اشىلادى. ال جولاۋشىلاردىڭ سانىنا كەلسەك, بيىل جوسپار بويىنشا FlyArystan اۋە كومپانياسىنىڭ قىزمەتىن قولدانۋشىلاردىڭ سانى 700 مىڭ ادام بولادى دەپ بەلگىلەپ وتىرمىز. كەلەسى 2020 جىلى 2,5 ملن ادام, ال 2022 جىلى 4 ملن ادامعا جەتكىزەمىز, – دەدى ج.جايلاۋوۆا. FlyArystan اۋە كومپانياسى وكىلىنىڭ مالىمەتىنشە, بۇگىنگە دەيىن 45 مىڭعا جۋىق بيلەت ساتىلدى جانە ونىڭ 85%-ىن «باگاجسىز» تاريفتەر قۇرايدى.
