قازاقستان پرەزيدەنتى ق.توقاەۆ كەزەكتەن تىس سايلاۋ وتكىزۋ تۋرالى ءوز سوزىندە ەلدەگى الەۋمەتتىك-ساياسي كەلىسىمدى قامتاماسىز ەتۋ جانە الەۋمەتتىك-ەكونوميكالىق دامۋ مىندەتتەرىن شەشۋ ءۇشىن بولاشاق ساياسي باعىتقا قاتىستى «بەلگىسىزدىكتى جويۋ كەرەك» ەكەنىن اتاپ كورسەتتى. بۇل تۇرعىدا ۇمىتكەردىڭ قازىرگى ساياسي باعىتتىڭ دايەكتىلىگى مەن ساباقتاستىعىن قامتاماسىز ەتۋ قابىلەتى سايلاۋشىلاردىڭ نەگىزگى ولشەمى بولىپ تابىلادى.
كەزدەسۋ بارىسىندا ساراپشىلار قازاقستاننىڭ ىشكى جانە سىرتقى ساياساتىنىڭ نەگىزگى اسپەكتىلەرىن قاراستىرىپ, 2019 جىلعى 9 ماۋسىمعا جوسپارلانعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن تالقىلادى.
قسزي-دىڭ ديرەكتورى زارەما ءشاۋكەنوۆا الداعى سايلاۋدىڭ ماڭىزدىلىعىنا توقتالدى. ونىڭ ايتۋىنشا, داۋىس بەرۋ ناتيجەلەرى ۇمىتكەردىڭ سايلاۋالدى باعدارلامالارىنىڭ نەگىزىندە قازاقستاننىڭ بولاشاق دامۋىن انىقتايدى.
تالقىلاۋ بارىسىندا الەۋمەتتىك جۇمىس جونىندەگى ۇلتتىق رەسۋرستىق ورتالىقتىڭ ديرەكتورى ءلازات نۇرقاتوۆا بارلىق قازاقستاندىقتاردىڭ ءومىر ءسۇرۋ دەڭگەيى مەن ساپاسىن كوتەرۋ ءۇشىن مەملەكەتتىڭ الەۋمەتتىك باستامالارىن جالعاستىرۋدىڭ ماڭىزدىلىعى مەن ءبىرىنشى كەزەكتىلىگى تۋرالى پىكىرىن ءبىلدىردى. سونىمەن قاتار ورتالىق ازيا وڭىرىندەگى ەتنوسارالىق جانە كونفەسسياارالىق قاتىناستاردى زەرتتەۋ ورتالىعىنىڭ جەتەكشىسى ايگۇل سادۋاقاسوۆا ءسوز سويلەپ, ەتنوسارالىق جانە كونفەسسياارالىق ءبىرلىك پەن كەلىسىمنىڭ ساقتالۋى تۋرالى ماسەلە مەملەكەتتىك دامۋدىڭ ماڭىزدى اسپەكتىلەرىنىڭ ءبىرى بولىپ قالا بەرەتىنىن ايتتى.
قسزي ديرەكتورىنىڭ ورىنباسارى سانات كوشكىمباەۆ ەلىمىزدىڭ سىرتقى ساياساتى تۋرالى اڭگىمەلەپ بەردى. ونىڭ پىكىرىنشە, سايلاۋدىڭ ناتيجەلەرى ەلىمىزدىڭ سىرتقى ساياساتىنا جاڭا سەرپىن بەرەدى جانە حالىقارالىق ارەناداعى سەنىمدى ءارىپتەس ەل رەتىندە قازاقستاننىڭ بەدەلىن نىعايتادى.
تالقىلاۋعا ازيالىق زەرتتەۋلەر ينستيتۋتىنىڭ ديرەكتورى سۇلتان اكىمبەكوۆ, «قوعامدىق پىكىر» زەرتتەۋ ينستيتۋتىنىڭ جوبالار جونىندەگى ديرەكتورى بوتاگوز راقىشەۆا, «قاسيەتتى قازاقستان» عىلىمي-زەرتتەۋ ورتالىعىنىڭ جەتەكشىسى بەرىك ابدىعالي ۇلى, ۇلتتىق عىلىمي-پراكتيكالىق ورتالىق باسقارماسىنىڭ جەتەكشىسى انار فازىلجان, قوعام قايراتكەرى, بلوگەر عالىم بايتۇق, ىشكى جانە سىرتقى ساياسات سالاسىنداعى ساراپشىلار بەلسەندى قاتىستى.
