الماتى – ازاتتىقتىڭ بەسىگىنە بالانعان, ەلدىگىمىزدىڭ ىرگەسى قالانعان قاستەرلى قالا ەكەنىن ايتقان مەملەكەت باسشىسى بارشا قازاقستان حالقىن ىنتىماق مەرەكەسىمەن قۇتتىقتادى.
– قۇرمەتتى الەۋمەت, قادىرلى قاۋىم, ارداقتى الماتىلىقتار! بۇگىن ەرەكشە كۇن. تاتۋلىق مەرەكەسى. ەلىمىز بۇل مەرەكەنى ەرەكشە جاقسى كورەدى. سوندىقتان بارشاڭىزدى شىن جۇرەكتەن قۇتتىقتايمىن. ۇلت پەن ۇلىستىڭ ىنتىماعىن دارىپتەيتىن وسىناۋ مەرەكەنىڭ قادىر-قاسيەتىن ءبارىمىز جاقسى بىلەمىز. ەكى كۇن بۇرىن عانا وتكەن قازاقستان حالقى اسسامبلەياسىنىڭ باسقوسۋىندا ءسويلەگەن سوزىندە ەلباسىمىز ەل ءىشىندەگى مىزعىماس تاتۋلىقتىڭ ماڭىزدىلىعىن اتاپ ءوتتى. تاريحتىڭ سان قيلى سىن ساعاتتارىندا قازاق جەرىن پانالاپ كەلگەن كوپتەگەن ۇلت وكىلدەرى ءبىر ءۇيدىڭ بالاسىنداي تۋىس, باۋىر بولدى. زاماننىڭ تاۋقىمەتىنە قاراماستان, ءبىزدىڭ حالقىمىز سولاردىڭ ءبارىن باۋىرىنا باسىپ, بارىمەن ءبولىستى. ەگەمەندىك العان جىلدارى كوپەتنوستى, كوپكونفەسسيالى ەلىمىزدىڭ كەلەشەگى تۋرالى ءتۇرلى تەرىس بولجامدار ايتىلدى. الايدا, ەلباسىمىزدىڭ ارقاسىندا قازاقستان بۇگىندە ءتۇرلى ەتنوس وكىلدەرىنىڭ كيەلى شاڭىراعىنا اينالدى.
«ءبىرىڭدى قازاق, ءبىرىڭ دوس, كورمەسەڭ ءىستىڭ ءبارى بوس» دەپ ۇلى اباي ايتقانداي, ءبىز ەلىمىزدىڭ جەمىستى ءارى جەڭىستى كۇندەرىنە ىنتىماعىمىز ارقىلى جەتتىك. قىمباتتى الماتىلىقتار, تابيعاتى تاڭعاجايىپ ارۋ الماتى – بىرەگەي, بالاماسى جوق شاھار. ونىڭ جىلناماسى – بۇكىل وتانىمىزدىڭ جارقىن ايناسى. جاس مەملەكەتىمىزدىڭ جەتىستىكتەرىن دۇنيە جۇزىنە العاش تانىتقان دا وسى الماتى. الاتاۋ باۋرايىنداعى اسەم قالا بۇگىندە قازاق زيالىلارىنىڭ قۇتتى مەكەنى بولىپ وتىر. الماتى – عىلىمنىڭ ورداسى, ونەردىڭ بەسىگى, شىعارماشىلىقتىڭ شاڭىراعى, – دەدى قاسىم-جومارت توقاەۆ.
مەرەكەلىك شارادا ەلىمىزدى مەكەندەگەن ءتۇرلى ۇلت وكىلدەرىنىڭ تانىم-تاريحىنان سىر شەرتەتىن كورمە ۇيىمداستىرىلىپ, وتاندىق ونەرپازدار ءان مەن كۇيدەن شاشۋ شاشتى. «جىگىتتەر» كۆارتەتى, «سالتانات» بي انسامبلى, «اسىلىم» بي توبى, ارداق بالاجانوۆا, مەرۋەرت ءتۇسىپباەۆا, ءالي وقاپوۆ, دينارا سۇلتان, كامشات جولدىباەۆا سىندى ونەرپازدار مەرەكەنىڭ اجارىن ارتتىردى.
الماتى
