التايداعى احۋال الاڭدارلىق
جۇما, 8 ناۋرىز 2013 7:41
2010 جىلعى كەندى التايداعى سۋ تاسقىنى 17 ناۋرىزدا ورىن العان. ال بيىل ناۋرىز تۋىسىمەن-اق كۇننىڭ كوزى ەلجىرەپ, قىس بويى تىنباي جاۋعان قالىڭ قاردىڭ كوبەسى سوگىلىپ, قالا مەن دالادا سۋ اعىل-تەگىل اقتى. سوعان قاراعاندا, بيىل كوكتەمگى سۋ تاسقىنى ەرتە كەلەتىن ءتۇرى بار. وسىدان ەكى-ءۇش كۇن بۇرىن وسكەمەننىڭ چەرنياحوۆسكي كوشەسىندەگى ەكى-ءۇش ءۇيدىڭ اۋلاسىنا سۋ كىرىپ, تۇرعىنداردى ابىگەرگە سالدى.
جۇما, 8 ناۋرىز 2013 7:41
2010 جىلعى كەندى التايداعى سۋ تاسقىنى 17 ناۋرىزدا ورىن العان. ال بيىل ناۋرىز تۋىسىمەن-اق كۇننىڭ كوزى ەلجىرەپ, قىس بويى تىنباي جاۋعان قالىڭ قاردىڭ كوبەسى سوگىلىپ, قالا مەن دالادا سۋ اعىل-تەگىل اقتى. سوعان قاراعاندا, بيىل كوكتەمگى سۋ تاسقىنى ەرتە كەلەتىن ءتۇرى بار. وسىدان ەكى-ءۇش كۇن بۇرىن وسكەمەننىڭ چەرنياحوۆسكي كوشەسىندەگى ەكى-ءۇش ءۇيدىڭ اۋلاسىنا سۋ كىرىپ, تۇرعىنداردى ابىگەرگە سالدى.
– ادەتتە, وسكەمەن قالاسىندا قار بارىنشا قالىڭ جاۋدى دەگەن جىلداردىڭ وزىندە تاسقىن قالانىڭ شەتكەرگى اۋماقتارىن عانا الىپ جاتاتىن. ال بيىلعى جاۋعان قاردىڭ كوپتىگى سونداي, ەندى قاۋىپ-قاتەر ورتالىق كوشەلەردىڭ وزىنە دە ءتونىپ تۇرعانداي. ويتكەنى, قالا كوشەلەرىندەگى قاردىڭ قالىڭدىعى ءبىر مەترگە جۋىقتايدى. مۇنداي جاعدايدا ەگەر كۇن كۇرت جىلىناتىن بولسا, قالانى قاق جارىپ اعاتىن ءۇلبى وزەنى ءوز ارناسىنان شىعىپ كەتۋى ابدەن مۇمكىن, – دەيدى وسكەمەن قالاسىنىڭ اكىمى سەرىك تاۋكەباەۆ.
تاسقىن قاتەرى وبلىس ورتالىعىندا عانا ەمەس, باسقا وڭىرلەردە دە بارىنشا كۇشەيە تۇسۋدە.ۇلان اۋدانىنىڭ ورتالىعى قاسىم قايسەنوۆ كەنتىندەگى 4-ءشى شاعىن اۋدانىنىڭ جەكە مەنشىك سەكتورىنداعى بىرنەشە ءۇيدى سۋ باسۋ قاۋپى ورىن الدى. وسىنداعى 34-ءشى ءورت ءسوندىرۋ ءبولىمىنىڭ 12 ادامى مەن بىرنەشە تەحنيكاسى سۋدىڭ ارناسىن باسقا جاققا بۇرىپ ۇلگەردى. سۋىت حابارلار باسقا وڭىرلەردەن دە كەلىپ تۇسۋدە.
ءدال قازىرگى شاقتا التايدىڭ اۋا رايى سان قۇبىلىپ تۇر. سارسەنبى كۇنى اۋا تەمپەراتۋراسى 13 گرادۋسقا دەيىن كوتەرىلىپ, قاتتى داۋىل سوقتى. 8 ناۋرىزدا كۇن كۇرت سۋىتىپ, كەي جەرلەردە 20-25 گرادۋسقا دەيىن سۋىتپاق. داۋىلدىڭ جىلدامدىعى سەكونتىنە 18-23, كەي جەرلەردە 26 سەكونتكە جەتپەك. جاقىندا قر توتەنشە جاعدايلار جونىندەگى مينيستر ۆ. بوجكو وڭىردە بولعان كەزدە كوكپەكتى, گلۋبوكوە اۋداندارىندا قاردىڭ قالىڭدىعى 3-4 مەترگە جەتكەنىن كوزبەن كورىپ, كومەك جاسايتىنىنا ۋادە بەرىپ كەتكەن. بيىل قار بارلىق جەردە جىلداعى نورمادان ەكى-ءۇش ەسە ارتىق. بىراق, ارنايى قىزمەت ورىندارى مەن تۇرعىنداردىڭ وزدەرى دە ارقانى كەڭگە سالماي, اۋلالاردا تاۋ بولىپ جاتقان قاردى اۋلاققا اپارىپ تاستاۋعا كوڭىل بولگەندەرى ءجون. ءبىر سوزبەن ايتقاندا, كەندى التايعا قاۋىپ بۇلتى ءتونىپ تۇر.
وسى رەتتە وبلىس باسشىلىعىن تولعاندىرىپ وتىرعانى قارجى ماسەلەسى ەكەندىگىن ايتا كەتپەكپىز. بيىلعى تاسقىنمەن ويداعىداي كۇرەسۋ ءۇشىن, ەڭ الدىمەن, تۇرعىنداردىڭ بەلسەندىلىگى جانە مول قارجى قاجەت. وبلىستىق بيۋدجەتتىڭ مۇمكىندىگى شەكتەۋلى. ەستۋىمىزشە, ۆ.بوجكو وبلىسقا كومەكتىڭ بولاتىندىعىن, بىراق بىردەن بولەتىندەي مول قارجىنىڭ جوقتىعىن ايتىپ كەتكەن. ەندەشە, ىسكە ۇكىمەتتىڭ ارالاسقانى ءجون ەكەنى انىق. مۇندايدا بارىنشا ساق بولعانعا نە جەتسىن!
وڭداسىن ەلۋباي,
«ەگەمەن قازاقستان».
وسكەمەن.
