30-دان استام ازيا ەلدەرىنىڭ جوعارى لاۋازىمدى وكىلدەرى ەكونوميكالىق ىنتىماقتاستىقتى كەڭەيتۋ جانە عىلىمي-تەحنيكالىق الماسۋلاردى تەرەڭدەتۋ ماسەلەلەرىن تالقىلادى. سونداي-اق, قاتىسۋشىلار سوڭعى بىرنەشە ونجىلدىقتار بويى الەمنىڭ باسىم وڭىرىنە اينالعان جانە ەلەۋلى ءوسىم قارقىنىن كورسەتىپ وتىرعان ازيا ەلدەرىنىڭ اراسىنداعى ديالوگتى ودان ءارى نىعايتۋ ماسەلەلەرىن قاراستىردى.
فورۋمدا ءسوز سويلەگەن قازاقستاندىق دەلەگاتسيانىڭ باسشىسى قازاقستان ازياداعى ءوزارا ءىس-قيمىل جانە سەنىم شارالارى جونىندەگى كەڭەستى (اوسشك) شاقىرۋدىڭ باستاماشىسى, سونداي-اق بىرقاتار ازيالىق ۇيىمداردىڭ بەلسەندى مۇشەسى ەكەنىن اتاپ ءوتتى. ول قاتىسۋشىلاردى سەنىم مەن ىنتىماقتاستىقتى ودان ءارى نىعايتۋ ءۇشىن ازيا وڭىرىندەگى حالىقارالىق ۇيىمداردىڭ ءوزارا ءىس-قيمىلىن تەرەڭدەتۋگە شاقىردى.
قازاقستاننىڭ وكىلى ازيالىق دامۋ بانكى, ازيالىق ينفراقۇرىلىمدىق ينۆەستيتسيالار بانكى, يسلام دامۋ بانكى جانە باسقا دا قۇرىلىمدار سياقتى مامانداندىرىلعان كونتينەنتالدىق قارجى ينستيتۋتتارىن بىرلەسكەن قىزمەتكە تارتۋدىڭ ماڭىزدىلىعىن باسا ايتتى.
قازاقستاندىق دەلەگاتسيا «شاعىن جانە ورتا بيزنەس - ورنىقتى ەكونوميكالىق وركەندەۋدىڭ جاڭا درايۆەرى» اتتى اىد بيزنەس-فورۋمىنا قاتىستى. ىسكەرلىك بايلانىستار ورناتىلىپ, قازاقستاندىق ىسكەرلىك ورتالاردىڭ ازيالىق ارىپتەستەرمەن ىنتىماقتاستىعىن نىعايتۋعا باعىتتالعان ەكىجاقتى كەزدەسۋلەر وتكىزىلدى.
قازاقستان 2003 جىلى ازياداعى ىنتىماقتاستىق جونىندەگى ديالوگتىڭ مۇشەسى بولدى. بۇل حالىقارالىق الاڭ ىنتىماقتاستىقتىڭ ءارتۇرلى باعىتتارى بويىنشا كونسۋلتاتسيالار وتكىزۋ, شەشىمدەر قابىلداۋ مەن شارالاردى جۇزەگە اسىرۋعا ارنالعان كوپجاقتى فورۋم بولىپ تابىلادى. قازاقستان اىد-عا قاتىسۋ ارقىلى وتاندىق كاسىپورىنداردىڭ سىرتقى ەكونوميكالىق قىزمەتىنە جانە ەكىجاقتى ءارى كوپجاقتى قاتىناستاردى نىعايتۋعا قولايلى جاعدايلار جاسايدى. ەنەرگەتيكا, كولىك جانە اۋىل شارۋاشىلىعى سالاسىنداعى ىنتىماقتاستىقتى دامىتۋعا ەرەكشە نازار اۋدارىلادى.
