قار ەرىمەي جاتىپ, جاڭبىر جاۋدى
سەيسەنبى, 5 ناۋرىز 2013 7:21
اۋا رايىن زەرتتەۋشىلەردىڭ الدىن الا بولجاۋى كەيدە شىندىقتىڭ اۋىلىنان الىستاپ كەتەتىنى جاسىرىن ەمەس. وسكەمەندە جەكسەنبى كۇنى 2-4 گرادۋس, ال دۇيسەنبىدە 2-4 گرادۋس جىلى بولادى دەپ حابارلاعان. سەنبەسەڭىز عالامتوردان قاراڭىز. بيىلعى كوكتەم اسا قاۋىپتى بولاتىن ءتۇرى بار. جەكسەنبى كۇنى وسكەمەن مەن وبلىستىڭ بىرقاتار اۋداندارىندا كۇن كۇرت جىلىپ, 10 گرادۋس جىلىلىقتى كورسەتتى. جاڭبىر تۇسكى 15.30-دا باستالىپ, سەبەلەپ تۇرىپ الدى. قالا كوشەلەرىندە ەرىگەن قار سۋى ارىق بولىپ اعىپ, تۇرعىندار ابىگەرگە ءتۇستى. ءدال قازىر وسكەمەندە 11 گرادۋس جىلى, اۋا رايى تۇنەرىپ, تاعى دا جاڭبىر جاۋاتىن ءتۇرى بار.
سەيسەنبى, 5 ناۋرىز 2013 7:21
اۋا رايىن زەرتتەۋشىلەردىڭ الدىن الا بولجاۋى كەيدە شىندىقتىڭ اۋىلىنان الىستاپ كەتەتىنى جاسىرىن ەمەس. وسكەمەندە جەكسەنبى كۇنى 2-4 گرادۋس, ال دۇيسەنبىدە 2-4 گرادۋس جىلى بولادى دەپ حابارلاعان. سەنبەسەڭىز عالامتوردان قاراڭىز. بيىلعى كوكتەم اسا قاۋىپتى بولاتىن ءتۇرى بار. جەكسەنبى كۇنى وسكەمەن مەن وبلىستىڭ بىرقاتار اۋداندارىندا كۇن كۇرت جىلىپ, 10 گرادۋس جىلىلىقتى كورسەتتى. جاڭبىر تۇسكى 15.30-دا باستالىپ, سەبەلەپ تۇرىپ الدى. قالا كوشەلەرىندە ەرىگەن قار سۋى ارىق بولىپ اعىپ, تۇرعىندار ابىگەرگە ءتۇستى. ءدال قازىر وسكەمەندە 11 گرادۋس جىلى, اۋا رايى تۇنەرىپ, تاعى دا جاڭبىر جاۋاتىن ءتۇرى بار.
بۇعان دەيىن قاتتى بوران سوعىپ, رەسپۋبليكالىق جانە وبلىس مارتەبەسىندەگى جولداردىڭ ءبىرازى جابىلىپ قالدى. جاڭبىردىڭ سالدارىنان جولداعى قار ەرىپ, كولىكتەردىڭ جۇرۋىنە نۇقسان كەلتىردى. سوندىقتان «وسكەمەن – ريددەر», شەمونايحانىڭ رەسەيمەن شەكارالاس تاس جولى جابىلدى. «وسكەمەن-زىريان» جولىندا كۇننىڭ كۇرت جىلۋىنان تاۋدان بىرنەشە قار كوشكىنى بولدى. بۇل جولدا ءجۇرۋ اسا قاۋىپتى.
دۇيسەنبى كۇنى توتەنشە جاعدايلار ءمينيسترى ۆ.بوجكو مەن اۋىل شارۋاشىلىعى مينيسترلىگىنىڭ سۋ شارۋاشىلىعى جونىندەگى كوميتەتىنىڭ توراعاسى يسلام ابىشەۆ وڭىرگە كەلىپ, تاسقىن قاۋپى جوعارى گلۋبوكوە اۋدانىنىڭ سەكيسوۆكا, زيموۆە اۋىلدارىندا, وسكەمەن مەن كورشى ەلدى مەكەندەردى ارالادى. شىنىندا دا, قاتتى نوسەر جاۋىن قالىڭ قاردىڭ تەز ەرۋىنە اسەر ەتۋدە. ءمينيستردىڭ ايتۋىنشا, ەرىگەن قار مەن جاۋىن توپىراققا ءسىڭىپ بىتكەن, ەندى ول بەتىنە شىعىپ ەلدى مەكەندەرگە جوڭكىلەتىن قاۋىپ بار. الدىن الا شارالار جاساماسا, ورنى تولماس وكىنىش ورىن الماق. وبلىستاعى سۋ قويمالارىنىڭ جاعدايى دا ءسوز بولدى.
كەشكىلىك وبلىستىق اكىمدىكتە وبلىس باسشىلارى مەن سالا باسقارمالارى جەتەكشىلەرىنىڭ قاتىسۋىمەن تاسقىننىڭ الدىن الۋ شارالارى جونىندە كەلەلى جيىن بولىپ ءوتتى. زىريان اۋدانىنداعى پۋتينتسەۆو, بۇقتىرما, تۇرعىسىن اۋىلدارىندا, كاتونقاراعاي, كۇرشىم, ءۇرجار, تارباعاتاي, زايسان, تاعى باسقا اۋدانداردا دا بيىل قار مولشەرى جىلداعىدان ەكى ەسەگە جۋىق ارتىق. ءمينيستردىڭ ايتۋىنشا, وبلىستا 80 مىڭنان استام ادام تۇراتىن 157 ەلدى مەكەندى قارعىن سۋ باسۋى مۇمكىن. سوندىقتان جۇرتشىلىقتى تابيعي اپاتتان ساقتاپ قالۋ ماقساتىندا ءتيىستى مەكەمەلەر مەن باسشىلار اۋقىمدى جۇمىس جاساۋلارى قاجەت. وبلىس اۋماعىندا 35 گيدرولوگيالىق جانە 29 مەتوبەكەت ورنالاستىرىلىپ, سول ارقىلى وزەن سۋلارىنىڭ جايىن بولجاپ وتىرۋ, مونيتورينگ ساراپتاما جاساۋ دا قولعا الىنىپتى. وبلىس اكىمى ب.ساپارباەۆ اۋدان, قالا باسشىلارىنا كۇن سايىن سەنبىلىكتەر وتكىزىپ, اپاتتىڭ الدىن الۋ جونىندە ناقتى تاپسىرما بەردى.
وڭداسىن ەلۋباي,
«ەگەمەن قازاقستان».
وسكەمەن.
