ايتۋلى شارانى ۇيىمداستىرۋشى ديلارا سابىروۆا فەستيۆالدىڭ شاڭىراق كوتەرۋىنە «117» شىعارماشىلىق ستۋدياسى باستاماشى بولعانىن, حالىقارالىق, رەسپۋبليكالىق, ايماقتىق دودالاردا ولجا سالىپ جۇرگەن بي ۇجىمدارىنىڭ كەلگەنىن, بارلىق جانرلار, ءتىپتى ونىڭ ىشىندە كوشەلىك ستيلدەر دە قامتىلاتىنىن اتاپ كورسەتتى.
ساحنا شىمىلدىعى «توقتاماي بيلە» اتتى اۋەنمەن اشىلىپ, قيمىل-قوزعالىستارىمەن دە, كيىم ۇلگىلەرىمەن دە كوزدىڭ جاۋىن الاتىن مىڭ بۇرالعان بيشىلەر كەشتىڭ كوركىن كەلتىردى.
س.مۇقانوۆ اتىنداعى قازاق سازدى-دراما تەاترى جانىنان 2010 جىلى قۇرىلعان «الۋا» حالىق بي انسامبلىنە جاننا تەمىرباەۆا جەتەكشىلىك ەتەدى. وسى ۋاقىت ارالىعىندا سوچي, سانكت-پەتەربۋرگ, ماسكەۋ قالالارىندا ونەر كورسەتىپ, تالاي مارتە توپ جارىپتى. جارىسقا ابحازيادا وتەتىن حالىقارالىق سايىسقا قاتىساتىن 2 توپتى ۇكىلەپ اكەلىپتى.
ساحناعا «ەكسپرومت» حالىق بي تەاترىنىڭ ءسامبى تالداي ءيىلىپ تۇرعان, ۇرشىقشا ۇيىرىلگەن بالعىندارى كوتەرىلگەندە زال ءىشىن دۋ قول شاپالاق كومىپ كەتتى. بۇلاي بولاتىن ءجونى بار. توپتىڭ نەگىزگى جانكۇيەرلەرى – جاس بۋىن. سوندىقتان بولار قوشەمەتتەرىن ايامادى. بۇل جولى زاماناۋي حورەوگرافياعا نەگىزدەلگەن قويىلىمدى ۇسىنىپ, وتە ءساتتى شىقتى.
«بي ۇيىرمەسىنە مەنى اتام ەرتىپ اكەلدى. ءبىرىنشى كۇنى قاتتى قوبالجىدىم. بىراق جەتەكشىمىز وتە جارقىن ءارى اقكوڭىل ادام بولعاندىقتان, تەز ءتىل تابىسىپ كەتتىم. ءومىرىمدى ءبيسىز ەلەستەتە المايمىن», دەيدى «ەكسپرومت» حالىق بي ءانسامبلىنىڭ بەلدى مۇشەسى كارينا حۋساينوۆا.
