وندا سويلەگەن سوزىندە ايماق باسشىسى قۇمار اقساقالوۆ قوعامنىڭ بارلىق سالالارىندا بولىپ جاتقان اۋقىمدى جاڭعىرتۋلار, جەتىستىكتەر مەن تابىستار ءبىر شاڭىراق استىندا تاتۋ-ءتاتتى تۇرىپ, ورتاق ماقسات جولىندا جۇمىلا ەڭبەك ەتىپ جاتقان قازاق ۇلتى مەن ۇلىستاردىڭ باستى يگىلىگى بولىپ تابىلاتىنىن اتاپ كورسەتىپ, ەتنومادەني بىرلەستىكتەردىڭ ءبىر توپ وكىلىن قۇرمەت گراموتاسىمەن جانە العىس حاتپەن ماراپاتتادى.
سالتاناتتى شارا بۇدان كەيىن «ىنتىماعى جاراسقان قازاق ەلى» اتتى ۇلتتىق مادەني فەستيۆالعا جالعاسىپ, قازاق ەستراداسىنىڭ جەزتاڭداي ءانشىسى تامارا اسار مەن جەرگىلىكتى كوركەمونەرپازدار مۇشەلەرىنىڭ كونتسەرتتىك باعدارلاماسى تاماشالاندى.
اقشاڭقان كيىز ۇيلەر قاز-قاتار ءتىزىلىپ, ولاردا «شەبەرلەر» قالاسى», «اس - ادامنىڭ ارقاۋى», «ءبىر شاڭىراق استىندا» سەكىلدى تاعىلىمى مول شارالار ۇيىمداستىرىلدى. سونداي-اق «دوستىق اۋماعى» سپورتتىق ويىندار, «تۋعان جەر - تۋعان ەل. ءبىر حالىق - ءبىر ەل» كونتسەرتتىك, «MQYouthFest» جاس ورىنداۋشىلاردىڭ, «دوستىق شاڭىراعى», «مەنىڭ قالامنىڭ شەبەرلەرى», قازاقستاندىق پالۋان, الەم رەكوردشىسى سەرگەي تسىرۋلنيكوۆتىڭ شوۋ باعدارلامالارى ۇسىنىلدى.
العاش رەت ۇيىمداستىرىلعان «بوتاي» ۇلتتىق ويىنى كورەرمەندەردىڭ كوڭىلىنەن شىقتى.
