«ۇرلانعان مالداردىڭ 15 دەرەگى ورىستە جوعالسا, قالعانى قورادان جوعالعان. سوڭعى كەزدەرى مال ۇرلىعى فاكتىسىنىڭ ءوسۋى مالدى كۇندەلىكتى قاراپ, قاداعالاپ, تۇگەندەمەۋ سالدارىنان دا بولىپ وتىر. سەبەبى, ونىڭ جازعى-قىسقى باعىمى, ازىعى, سۋارۋى, تۇراتىن ورنىنىڭ جايلىلىعىنا مال يەسى جاۋاپكەرشىلىكپەن قاراۋى كەرەك. وسى تۇستا, جىل باسىندا اۋدان اكىمدىگى مەن بارلىق اۋىلدىق وكرۋگ اكىمدەرىنە ەلدى مەكەندە باقتاشى ۇيىمداستىرۋ تۋرالى اۋداندىق پوليتسيا بولىمىمەن ۇسىنىستار جولدانعان بولاتىن. ناتيجەسىندە قازىرگى كەزدە 11 ەلدى مەكەندە ءىرى قارا مالداردى پادامەن باعۋ جۇمىستارى جولعا قويىلدى. ەندى قالعان اۋىلدار دا وسى باستامانى ءتيىمدى ۇيىمداستىرا ءبىلۋى كەرەك», دەيدى جاڭاقورعان اۋداندىق پوليتسيا ءبولىمىنىڭ ورىنباسارى, پوليتسيا مايورى ايبول جولداسباەۆ.
وڭىردە ىشكى ىستەر مينيسترلىگىنىڭ №854 بۇيرىعىنىڭ تالاپتارىن ىسكە اسىرۋ باعىتىندا «بوتەن م ۇلىكتى ۇرلاۋعا قارسى ءىس-قيمىل» جونىندەگى 2018-2020 جىلدارعا ارنالعان باعدارلاماسى جۇيەلى جۇزەگە اسىپ جاتىر. بۇل باعدارلامانىڭ نەگىزگى ماقساتى – مال ۇرلىعىنىڭ الدىن الۋ باعىتىنداعى شارالاردى جۇزەگە اسىرۋ. جوسپاردا مال ۇرلىعىن اشۋ جانە تەرگەپ-تەكسەرۋ بويىنشا كەنت جانە اۋىل اكىمدىكتەرىنىڭ, ۆەتەريناريالىق ينسپەكتسيالاردىڭ جانە ءىىو-نى قىزمەتكەرلەرىمەن بىرلەسىپ ءتيىستى ىلەسپە قۇجاتتارىنسىز مال تاسىمالداۋ فاكتىلەرىن انىقتاۋ جانە جولىن كەسۋ بويىنشا رەيدتىك ءىس-شارالاردى ۇنەمى وتكىزۋ كوزدەلگەن.
