حالىققا ىڭعايلى قىزمەت كورسەتۋ ءۇشىن اتالعان قابىلداۋ ورىندارىنا 150 ادامعا دەيىن جۇمىلدىرىلىپ, ءساۋىر ايىندا 14 مىڭنان استام تۇرعىننان ءوتىنىش قابىلداعان. ناتيجەسىندە 6 مىڭعا جۋىق وتباسىعا قارجىلاي كومەك تاعايىندالعان. بىلتىر شىمكەنتتە 10 مىڭنان استام وتباسى اتاۋلى الەۋمەتتىك كومەك العان. بيىل بۇل كورسەتكىشتىڭ سانى ارتا تۇسپەك.
مەملەكەت تاراپىنان بەرىلگەن الەۋمەتتىك كومەككە العاشقىلاردىڭ ءبىرى بولىپ 7 بالانىڭ اناسى مامراحان بەكمەتوۆا يە بولدى. قۋانىشى قوينىنا سىيماعان انا بۇل قارجىنى كۇنكورىستى جاقسارتۋعا جۇمسايتىندىعىن ايتىپ, قۇجاتتارىن ەش قيىندىقسىز قابىلداعان جۇمىسپەن قامتۋ ورتالىعىنىڭ ماماندارىنا العىس ءبىلدىردى.
«شىمكەنت قالاسى بويىنشا اتاۋلى الەۋمەتتىك كومەككە ءوتىنىش بىلدىرگەن وتباسىلاردىڭ ءساۋىر ايىندا تاپسىرعان قۇجاتتارىنىڭ بارلىعى قامتىلادى. سونىمەن قاتار قالا تۇرعىندارىنىڭ الەۋمەتتىك كومەك الا الماي قالامىن دەگەن كۇدىگىن تۋدىرماۋ ءۇشىن ءوتىنىش بىلدىرگەن وتباسىلاردىڭ ءىس-قاعازدارىن تولىققاندى زاڭ اياسىندا قاراپ, نازارعا الامىز», دەيدى شىمكەنت قالاسى اكىمىنىڭ ورىنباسارى گۇلجان قۇرمانبەكوۆا.
كوپبالالى انالار مەن الەۋمەتتىك از قامتىلعان وتباسىلار اتاۋلى الەۋمەتتىك كومەككە قارالعان قاراجات بارلىعىمىزعا بىردەي جەتپەيدى, دەپ الاڭداعان بولاتىن. الايدا سالا جاۋاپتىلارى ەلباسى تاپسىرماسىمەن بولىنگەن قارجىلاي كومەكتىڭ جەتكىلىكتى ەكەندىگىن ايتىپ, كومەككە ءزارۋ تۇرعىنداردىڭ الاڭداۋىنا ەش نەگىز جوق ەكەندىگىن ءتۇسىندىردى.
