سونداي باتىر توبەتتەردىڭ ءبىرى – زيۋيت. ول كۇنى كەشە عانا پوليتسيا قىزمەتكەرى ا.ومىرزاقوۆقا قوستاناي قالاسىنداعى چايكينا كوشەسىندە 1615, 94 گرامم كولەمىندە گەروينى بار كۇدىكتىنى ۇستاۋعا كومەكتەستى.
جالپى, 2002 جىلدان بەرى قوستاناي وبلىستىق پوليتسيا دەپارتامەنتىنە قاراستى كينولوگيا ورتالىعى جەمىستى جۇمىس ىستەپ كەلەدى. ءازىر ورتالىقتا ءتورت اياقتى 27 «ءتارتىپ ساقشىسى» بار. كينولوگيا قىزمەتىنىڭ ينسپەكتورى, اعا لەيتەنانت سەرگەي گاپونوۆتىڭ ايتۋىنشا, وبلىستا مۇنداي ماڭىزدى قىزمەتتە 73 يت ءجۇر.
- كۇشىك كەزىندە الماتىدان اكەلەمىز, سوسىن ءبىزدىڭ اسكەريلەر وزدەرى باپتايدى. ءاربىر ساربازعا 2 يتتەن بەكىتىلگەن. نەمىس تۇقىمى, لابرودور سياقتى ءىز كەسۋگە قابىلەتتى جانۋارلاردى الامىز. ارقايسىسىنىڭ كۇتىمى ءار ءتۇرلى. ءبىر يت كۇنىنە شامامەن 400 گرامم ەت, 700 گرامم جارما جەيدى. سايكەسىنشە, ولاردىڭ قىزمەتتەرى سان قيلى, ويتكەنى, ءبىر يت بىرنەشە تاپسىرمانى ورىنداي المايدى. سوندىقتان, ولار ءىز كەسۋشى, ەسىرتكى ىزدەۋشى, جارىلعىش زاتتار ىزدەۋشى, شابۋىلداۋشى يتتەر بولىپ بولىنەدى, - دەيدى تاجىريبەلى مامان.
اقىلدى جانۋارلاردىڭ جەتىستىگى جايلى ايتا بەرۋگە ابدەن بولادى, بىراق ەل اۋزىندا جۇرگەن ەرلىكتەرىنىڭ ءبىرى مىناداي. 2014 جىلى وبلىس ورتالىعىنداعى ايگىلى «ليۋبيمايا ەۆا» دۇكەنىنە قارۋلانعان قاراقشىلار باسىپ كىرىپ, اقشا اكەتكەن بولاتىن. ءيىسشىل يتتەردىڭ كومەگىمەن ءتارتىپ ساقشىلارى قىلمىسكەرلەردى دەرەۋ قولعا ءتۇسىردى. كينولوگيا ورتالىعىنداعى يتتەر قىزمەتتەرى ءۇشىن كوتەرمەلەنىپ تە وتىرادى. اتاپ ايتساق, رەكس اتتى توبەت سادوۆىي اۋىلىنداعى قارۋ ۇرلىعىن اشۋعا كومەكتەسكەنى ءۇشىن سونداي قۇرمەتكە يە بولعان. ءيىسشىل يتتەر, اسىرەسە, ناشاقورلارمەن كۇرەستە كوپ پايداسىن تيگىزىپ كەلەدى.
سونىمەن قاتار اۋىر قىلمىستاردى دا اشۋعا كينولوگ مامانداردىڭ كومەگى قاجەت ەكەندىگىن ايتا كەتكەن ءجون.
