بۇگىندە «امانات» الاڭىنىڭ قوعامدىق شتابى قۇرىلدى. ونىڭ جۇمىسىنا ساراپشىلار 250-گە جۋىق ۇسىنىس جاسادى. سونىڭ نەگىزىندە وزەكتى دەگەن ماسەلەلەر ىرىكتەلىپ, جۇمىس ءجۇرگىزۋدىڭ ناقتى 5 باعىتى ايقىندالدى. ءبىرىنشى باعىت بويىنشا سايلاۋدىڭ دايىندىق شارالارىنا باقىلاۋ جاسالادى. سەبەبى زاڭعا سايكەس, ءاربىر ازاماتتىڭ سايلاۋعا قاتىسۋعا قۇقىعى بار. ول ءۇشىن بارلىق قاجەتتى جاعدايلار ۋاقتىلى جاسالۋى قاجەت. «قازىرگى كەزدە قوعامدا سايلاۋ ناۋقانىنا قاتىستى ساياسي بەلسەندىلىك ارتىپ كەلەدى. سايلاۋ قالاي وتەدى؟ بارلىعى قانشالىقتى زاڭدى ءارى اشىق بولادى؟ كەمشىلىك بولسا, ءبىز ايتايىق. بارلىق وبلىستاردى قاراپ شىقتىق. قولداۋ بار. «اماناتتىڭ» بەس باعىتى بەلگىلەندى. وسى بەس باعىت ورىندالسا, سايلاۋدىڭ ءادىل ءارى اشىق وتۋىنە جاعداي جاسالادى دەگەن پىكىر بار», – دەيدى قوعام قايراتكەرى مۇرات ابەنوۆ.
«اماناتتىڭ» ەكىنشى باعىتى – سايلاۋشىلاردىڭ قۇقىقتارى تۋرالى اقپاراتتى جان-جاقتى تاراتۋ. سونىڭ ىشىندە سايلاۋشىلاردىڭ قۇقىقتىق پروتسەدۋرالارى, سايلاۋ كەزەڭدەرى مەن مەرزىمدەرى, كانديداتتى قولداۋ, ونىڭ باعدارلاماسى تۋرالى اقپاراتتى الۋ جانە تاعى باسقا ماسەلەلەر بار. بۇدان بولەك, ساراپشىلار سايلاۋشىلاردىڭ قۇقىقتارى بۇزىلسا, ول تۋرالى قايدا جانە قالاي حابارلاۋعا بولاتىنىن تۇسىندىرەدى. ونلاين زاڭگەرلىك كەڭەس بەرۋ قىزمەتى دە بولادى.
ءۇشىنشى باعىت – ادالدىق. ول ءۇشىن قازاقستاننىڭ بارلىق ءوڭىرلەرىندە, ءاربىر سايلاۋ ۋچاسكەسىندە ءتاۋەلسىز باقىلاۋ جەلىسىن قۇرۋ جوسپارلانعان. قۇقىق بۇزۋشىلىق فاكتىلەرى بويىنشا جەدەل اقپارات الماسۋ جۇيەسى بولادى.
ءتورتىنشى باعىت – اشىقتىق. وسى باعىت اياسىندا تاۋەلسىز ديالوگ پلاتفورمالارى مەن پىكىرتالاس الاڭدارىن قۇرۋ جوسپارلانىپ وتىر. قوعامدىق تالقىلاۋلار ونلاين رەجىمدە دە ۇيىمداستىرىلادى. نەگىزگى ماقسات – اشىق جانە وبەكتيۆتى اقپارات تاراتۋ.
ال بەسىنشى باعىتقا سايكەس, قوعام مەن مەملەكەت اراسىنداعى تەڭ ىنتىماقتاستىقتى قۇرۋ جوسپارلانعان. «امانات» ازاماتتىق تۇعىرناماسى اتالعان بەس باعىتقا نەگىزدەلەدى. وسى باستامانىڭ اياسىندا بارلىق باعىتتار بويىنشا حالىقارالىق ۇيىمدارمەن, ورتالىق سايلاۋ كوميسسياسىمەن, جەرگىلىكتى سايلاۋ كوميسسيالارىمەن, جوعارعى سوتپەن, جەرگىلىكتى اتقارۋشى ورگاندارمەن, باس پروكۋراتۋرامەن, كانديداتتاردىڭ سايلاۋ شتابتارىمەن, بۇقارالىق اقپارات قۇرالدارىمەن, عىلىمي-ساراپتامالىق قوعامداستىق جانە ازاماتتىق سەكتور وكىلدەرىمەن ءارىپتەستىك بايلانىستارى ورناتىلادى. بارلىق وڭىرلەردە «امانات» ازاماتتىق پلاتفورماسىنىڭ وكىلدەرى بولادى.
