فورۋمعا ەكى ەلدىڭ بيلىك ورگاندارى مەن ىسكەرلىك ورتانىڭ 150-دەن اسا, ونىڭ ىشىندە 100-گە جۋىق ۆەنگەرلىك بيزنەس وكىلى جينالدى.
«فورۋم ەكى ەل اراسىنداعى تىكەلەي ىسكەرلىك بايلانىستى جولعا قويۋدىڭ ۇتىمدى مەحانيزمىنە اينالدى. ۆەنگريا – قازاقستاننىڭ ەۋروپاداعى اسا ماڭىزدى ساۋدا-ەكونوميكالىق جانە ينۆەستيتسيالىق ارىپتەسىنىڭ ءبىرى. ءبىز ەكىجاقتى ەكونوميكالىق ءوزارا ءىس-قيمىلدىڭ ورىستەۋ تەندەنتسياسىن جوعارى باعالايمىز. ۆەنگريا كاسىپكەرلەرىنىڭ ءبىزدىڭ ەلىمىزبەن ءوزارا ءتيىمدى ىنتىماقتاستىق ورناتۋعا دەگەن قىزىعۋشىلىعى بارعان سايىن كۇشەيە تۇسۋدە», دەدى ۇلتتىق ەكونوميكا ءمينيسترى رۋسلان دالەنوۆ.
فورۋم ساۋدا جانە ينۆەستيتسيالىق ءوزارا ءىس-قيمىلدى تالقىلاۋداعى ماڭىزدى باسقوسۋعا اينالعان. مۇندا ەكونوميكانىڭ ءتۇرلى سالاسى قامتىلىپ, ەكىجاقتى ىنتىماقتاستىق جوبالارىنا جول اشىلادى.
رۋسلان دالەنوۆ قازاقستاندىق-ۆەنگەرلىك ساۋدا-ەكونوميكالىق جانە ينۆەستيتسيالىق ىنتىماقتاستىقتى دامىتۋدىڭ بولاشاعىنا باعا بەرە كەلىپ: «قازاقستان ۆەنگريانىڭ تمد ەلدەرىنىڭ ىشىندەگى 4-ءىرى ساۋدا ارىپتەسى. ەكى ەل اراسىنداعى 2018 جىلعى تاۋار اينالىمىنىڭ كولەمى – 139 ملن اقش دوللارى. بۇل رەتتە جەمىستى ىنتىماقتاستىققا اكەلەتىن بارلىق شارت جاسالعان. قازاقستاندىق-ۆەنگەرلىك ستراتەگيالىق كەڭەس, ەكونوميكالىق ىنتىماقتاستىق جونىندەگى ۇكىمەتارالىق كوميسسيا, ىسكەرلىك كەڭەس, اتوم ەنەرگياسى جونىندەگى جۇمىس توبى مەن تىكەلەي ينۆەستيتسيالاردىڭ بىرلەسكەن قورى تابىسپەن جۇمىس ىستەۋدە», دەدى.
فورۋم باعدارلاماسى بويىنشا قازاقستاندىق جانە ۆەنگەرلىك كاسىپكەرلەردىڭ اراسىندا بىرقاتار ەكىجاقتى كەزدەسۋلەر وتەدى. تاراپتار اگروونەركاسىپتىك كەشەن, جەڭىل جانە تاماق ونەركاسىبى, قۇرىلىس, حيميا جانە ماشينا جاساۋ سالاسىنداعى ىنتىماقتاستىق ماسەلەسىن تالقىلاۋدى جوسپارلاپ وتىر.
سونىمەن قاتار, بيزنەس-فورۋمنىڭ بارىسىندا قازاقستان رەسپۋبليكاسىنىڭ ۇلتتىق ەكونوميكا مينيسترلىگى مەن ۆەنگريا سىرتقى ىستەر جانە ساۋدا مينيسترلىگىنىڭ اراسىنداعى ەكونوميكالىق ىنتىماقتاستىق جونىندەگى ءوزارا تۇسىنىستىك تۋرالى مەموراندۋمعا قول قويىلدى.
