جاس اقىنداردى تاجىريبەلى اقىنداردىڭ الدارىنا شىعارىپ, شابىستارىن بايقاپ, اقىل-كەڭەستەرىن بەرىپ, بولاشاق ومىرگە قولداۋ بولارعا باتا بەرۋ, سونىمەن قاتار ايتىس ونەرىن ناسيحاتتاۋ ماقساتىنداعى شاراعا اقتاۋ قالاسىنداعى «جىر جەبە» ايتىسكەر اقىندار مەكتەبىنىڭ تۇلەكتەرى مەن اقتاۋ قالاسى № 8 ورتا مەكتەپ وقۋشىلارى قاتىستى.
سوڭعى جىلدارى اقىن فارحاد مۋساەۆ اقتاۋ قالاسىنان وبلىستىق مادەنيەت باسقارماسىنىڭ قولداۋىمەن «جىر جەبە» اتتى ايتىسكەر اقىندار مەكتەبىن اشىپ, شاكىرت تاربيەلەپ كەلەدى. ولاردىڭ بىرقاتارى وبلىستىق, رەسپۋبليكالىق ايتىستاردا جەڭىمپاز, جۇلدەگەر اتانىپ, وبلىسىمىزعا ولجامەن ورالىپ ءجۇر. جۋىردا ءساۋىر ايىندا الماتىدا بولعان رەسپۋبليكالىق " ۇلى دالا دارىندارى" اتتى ونەرپازدار بايقاۋىندا مەكتەپ تۇلەگى مەيىربەك سالاماتوۆ 1-ورىن يەمدەنىپ, ت.جۇرگەنوۆ اتىنداعى ونەر اكادەمياسىنىڭ وقۋ گرانتىن جەڭىپ الدى. سونداي-اق, جۇماباي ماعجان امانكەلدى ۇلى, سالاماتوۆ مەيىربەك ءجاۋمىت ۇلى, سۇيەموۆ الشىن قانبەرگەن ۇلى, ساردار ەرداۋلەت بەردىxان ۇلى, قۋانىش جولداس, قايىربەك تەڭەل. اقىندار «قۇلمامبەت ايتىس» تۇرىمەن كەزەكتەسىپ ايتىسىپ, شاراعا قاتىسۋشىلاردى ءبىر سىلكىنتىپ تاستادى, دەيدى "وتپان" مكقك ءبولىم مەڭگەرۋشىسى جومارت ايداربەك.
اقىنداردىڭ قاتارىندا ادايدىڭ جەتى قايقىسى وسكەمباي قالمامبەت ۇلىنىڭ ۇرپاعى قايىربەك تەڭەل مەن قۋانىش جولداس – ماڭعىستاۋ ونەر كوللەدجىنىڭ جىر-تەرمە ءبولىمىنىڭ ستۋدەنتتەرى. سولاردى كەزەك-كەزەك جىرلاتىپ, كۇي تارتقىزىپ, جىرشى-كۇيشىلەردىڭ سۇلۋ سوزدەرى مەن كۇمبىرلەگەن كۇيلەرىن تىڭداپ, قاتىسۋشىلار ءبىر مارقايىپ قالدى.
اقىندار مەن جىرشىلاردىڭ جىرىنان شابىتى ويانعان ي.سۇيەۋباەۆ اتىنداعى مەكتەپتىڭ 9-سىنىپ وقۋشىسى, «سازگەن» ونەر مەكتەبىنىڭ تۇلەگى راقىمجان جاڭاباەۆ ءوزى سۇرانىپ, كورەرمەندەر الدىنا شىعىپ جىردان شاشۋ شاشتى. شارا ءداستۇرى بويىنشا قارت اقىن جاس جۇيرىكتەرگە باتا بەرۋ كەرەك بولاتىن. شاراعا ارنايى شاقىرىلعان اقىن دەنساۋلىعىنا بايلانىستى كەزدەسۋگە كەلە الماعاندىقتان, بۇرىنعىلاردىڭ جولىمەن دەپ شارانى جۇرگىزۋشى جاس جۇيرىكتەرگە اعالىق باتاسىن بەردى.
كاسىپورىن اتىنان ايتىسكەر اقىندارعا ەستەلىككە ماڭعىستاۋلىق اقىن-جىراۋلاردىڭ جىر جيناقتارى تارتۋ ەتىلدى.
