ايتىس الدىمەن ءوڭىردىڭ اۋداندارى مەن قالالارىندا ءوتىپ, وبلىستىق دەڭگەيدەگى ءسوز سايىسىنا ىرىكتەلگەن 20 جاس اقىن قاتىستى. جىر بايگەسىنىڭ جىل سايىن جاڭالىعى دا بولىپ وتىرادى. سونداي جاڭا ەسىمدەر جۇلدىزداي جارقىراپ, بيىل دا كورىندى.
ءسوز ونەرىنىڭ مايەگىنە سۋساعان ۇزىنكول جۇرتشىلىعىنىڭ ايىزىن قاندىرعان ايتىستا قازىلار القاسى ءۇشىنشى جۇلدەنى سارىكول اۋدانىنىڭ ۇكىلەگەن ءۇمىتى قۇندىز ادىرباەۆا مەن تاراندىق ەركەبۇلان اسەتكە, قوستاناي اۋدانىنان دوسبول مىسىرعا ءبولدى. ەكىنشى ورىنعا ۇزىنكول اۋدانىنان اقجۇنىس ءجۇرسىن مەن تاران اۋدانىنان كەلگەن بەكزات راتبەك لايىق دەپ شەشتى. كورەرمەننىڭ نازارىن ءاپ دەگەندە وزىنە اۋدارعان مەڭدىعارالىق عانيمات ناعاشىباي ءبىرىنشى ورىندى الدى. ال باس جۇلدەگە قازىلار القاسىنىڭ دا, كورەرمەننىڭ دە قالاۋى جانكەلدين اۋدانىنىڭ تاس تۇلەگى بەكزات باۋىرجانعا ءتۇستى.
«وقۋشىلار ايتىسى وبلىستا 27 جىلدان بەرى ۇزىلمەي ءوتىپ كەلەدى. بۇگىنگى جاس ۇرپاق قازاقتىڭ كيەلى ءسوز ونەرىن تۇششىنۋى, قازاقتىڭ باي ءتىلىنىڭ قازىناسىنان سۋسىنداۋى ءۇشىن مۇنداي شارا كەرەك. تۇلپاردى تاي كەزىنەن جەتەلەمەسە, باپتاماسا ول بايگەنىڭ الدىن, مارەنى كەسپەس ەدى. ايتىس تا سولاي. جىل سايىن بالالاردىڭ اۋزىنان جارق ەتكەن جاقسى شۋماقتار, ورالىمدى ويلار ەستىپ, قۋانىپ وتىرامىز» دەيدى وقۋشىلار ايتىسىنىڭ قازىلار القاسىن 27 جىل بويى باسقارىپ كەلە جاتقان جازۋشى عۇمار احمەتچين.
وقۋشىلار ايتىسىنا بالا كەزىندە قاتىسقان, بۇگىندە بەلگىلى ايتىس اقىنى, جۋرناليست, جىرشى بولىپ قالىپتاسقان سالتانات وتەلباەۆا مەن قىدىربەك قيىسقان وزدەرى وسى شارانى وتكىزۋگە, ونىڭ ۇزىلمەي جالعاسۋىنا اتسالىسىپ ءجۇر. وسى جولى ولار ايتىستىڭ قازىلار القاسىنىڭ مۇشەسى بولدى.
قوستاناي
