ايماقتار • 27 ءساۋىر، 2019

شەرحان مەن ناسىر باۋىندا «تاۋپىستەلى تاعىلىمى» ءوتتى

905 رەت كورسەتىلدى

تۇركىستان وڭىرىندە «مارحابات – ميراس» قوعامدىق قورى ىرگەلى ىستەردى قولعا الىپ، تانىمدىق-تاربيەلىك ءمانى زور كەزدەسۋلەر مەن كونفەرەنتسيالار ۇيىمداستىرىپ كەلەدى.

وسىدان ءۇش جىل بۇرىن قوعامدىق قور تاعى ءبىر يگى ءىستى قولعا الىپ، جازۋشى مارحابات بايعۇتتىڭ ۇيىتقى بولۋىمەن «تاۋپىستەلى تاعىلىمى» جوباسىنىڭ تۇساۋىن كەسكەن بولاتىن. «تۇركى تىلدەس، تۇگەل بول» تاقىرىبىندا وتكەن كونفەرەنتسيا دا كوپشىلىكتىڭ ەسىندە. كوركەم ادەبيەتتى ناسيحاتتاۋدا، جەلكىلدەپ ءوسىپ كەلە جاتقان جاس جەتكىنشەكتەردى ءبىلىمدى ءھام ۇلتجاندى ەتىپ تاربيەلەۋگە زور سەپتىگىن تيگىزگەن «تاۋپىستەلى تاعىلىمىن» ءاربىر 3 جىل سايىن ءداستۇرلى تۇردە وتكىزۋ تۋرالى كەلىسىلگەن ەدى. مىنە وسى جوبا اياسىندا تۇلكىباس اۋدانى، پىستەلى اۋىلىندا وتكەن «تاۋپىستەلى تاعىلىمىنىڭ» بيىلعى ءىس-شاراسى «شەرحان مەن ناسىر باۋىندا» دەپ اتالدى.

«رۋحاني جاڭعىرۋ: بولاشاققا باعدار» باعدارلاماسى اياسىندا تۇلكىباس اۋدانى اكىمدىگى مەن «مارحابات-ميراس» قوعامدىق قورىنىڭ ۇيىتقى بولۋىمەن، حالىقارالىق «الاش» سىيلىعىنىڭ يەگەرى، جازۋشى مارحابات بايعۇتتىڭ يدەياسىمەن وتكەن بۇل كەزدەسۋگە ونىڭ ءبىر توپ ارىپتەستەرى سوناۋ نۇر-سۇلتان، الماتى، تارازدان عانا ەمەس، كورشى وزبەكستاننان دا ارنايى كەلدى.  كوك ماساتى كىلەم ۇستىندە قونىس تەپكەن پىستەلى جۇرتى قوناقتاردى زور قۇرمەتپەن قارسى الدى. ولار جازۋشى مارحابات اعانىڭ شاڭىراعىندا بالداي ءتاتتى قىمىزدان ءىشىپ، شەرحان مەن ناسىر باۋىنىڭ تاريحىنا قاندى. بۇل باۋعا شيرەك عاسىردان استام ۋاقىت بۇرىن زاڭعار جازۋشى ناسىر فازىل مەن شەرحان مۇرتازا تال وتىرعىزىپتى. قوس تۇلعانىڭ ەككەن تالدارى قۇت بولىپ دارىپ، باۋ جايقالىپ وسكەن. جىلدان-جىلعا اۋماعى كەڭەيىپ، جەمىسىمەن قۋانتقان. قىپ-قىزىل بولىپ ۋىلجىپ پىسكەن المادان تىستەگەندەر ونىڭ ءدامىن كوپكە دەيىن ۇمىتپاعان. ناسىر فازىلدىڭ 90 جىلدىعىنا جانە شەرحان مۇرتازانىڭ رۋحىنا ارنالعان جيىندا ۇرپاقتار ساباقتاستىعى ورناپ، اعا بۋىن ومىردەن كورگەن-بىلگەندەرىن، تۇيگەن ويلارىن جاس بۋىن وكىلدەرىمەن ءبولىستى. جاستار ارناۋ ولەڭدەرىن وقىدى.

باسقوسۋدا وبلىس اكىمىنىڭ ورىنباسارى مالىك وتارباەۆ ماقامى بولەك جازۋشى مارحابات بايعۇتتىڭ تۋعان جەرىنە الىستان ات ارىتىپ كەلگەن قوناقتارعا، ادەبيەتكە جاناشىر جاستارعا العىسىن ايتتى. سونداي-اق، جيىن بارىسىندا اۋدان رۋحانياتىنىڭ كەمەلدەنۋىنە ەلەۋلى ۇلەس قوسىپ جۇرگەن ىسكەر اكىم نۇربول تۇراشبەكوۆ «مارحابات-ميراس» قورىنىڭ ۇيىتقى بولۋىمەن ءوتىپ جاتقان ءاربىر جوبا، ءاربىر جيىن ويى ورامدى، ءسوزى وتكىر تالاي قالامگەردىڭ، جاس بۋىننىڭ قاناتىن كەڭ جايۋىنا سەپتىگىن تيگىزىپ كەلە جاتقانىن اتاپ ءوتتى.   «كەمەڭگەر جازۋشى شەرحان مۇرتازا «تۇلكىباسى – تۇلپارلار تۋعان جەر، سۇڭقارلار قونعان جەر» دەپ سۋرەتتەگەن تۇلكىباس جەرى – قازاقتىڭ ماقتانىشىنا اينالعان كوپتەگەن تۇلعالار تۋىپ-وسكەن قاسيەتتى مەكەن. وسىنداي كيەلى مەكەندە قانات قاعىپ، ءبىلىم قۋىپ، جازۋشىلىق پەن جۋرناليستيكانى قاتار الىپ جۇرگەن ازاماتتىڭ ءبىرى مارحابات بايعۇت! ونىڭ شىعارمالارى قازاق ادەبيەتىنىڭ دامۋىنا سۇبەلى ۇلەس قوسىپ، مازمۇنى تەرەڭ، تاعىلىمى مول بولعاندىقتان قالىڭ وقىرماننىڭ جۇرەگىنە جول تاۋىپ، رۋحىن شىڭداپ، ادەبيەت سۇيەر قاۋىمنىڭ كوزايىمىنا اينالعان. اعامىزدىڭ مۇرىندىق بولۋىنىڭ ارقاسىندا قۇرىلعان «مارحابات-ميراس» قورى قانشاما تالانتتى جاستاردى قولداۋ ماقساتىندا ءتۇرلى جوبالاردى جۇزەگە اسىردى. سونىڭ ءبىرى – «تاۋپىستەلى تاعىلىمى». مىنەكەي، بۇگىنگى باسقوسۋدىڭ ماقساتى – حالىق اراسىندا كوركەم ادەبيەتتى ناسيحاتتاۋ، بولاشاق جاستاردى پاتريوتتىق رۋحتا تاربيەلەۋ، ولاردى كىتاپ الەمىنە شاقىرۋ ارقىلى وي-ورىستەرىن كەڭەيتۋ، دامىتۋ، دارىندى جاستاردىڭ شىعارماشىلىعىنا قولداۋ كورسەتۋ بولىپ تابىلادى»، - دەپ، جينالعان قاۋىمعا شىعارماشىلىق تابىس تىلەدى. ال نەسىپبەك ءداۋتاي ۇلى، نارماحان بەگالى، ەسەنعالي راۋشانوۆ سىندى قارىمدى قالامگەرلەر جاستارعا ءتالىم مەن تاربيەسى مول ءاپسانالار ايتىپ، سانا-سەزىمدەرىنە ساۋلە جۇگىرتتى. باسقوسۋ سوڭىندا ولار جاستارعا جولاشار باتا بەرىپ، اق جول تىلەدى.


سوڭعى جاڭالىقتار

سينگاپۋردىڭ سوڭعى اۋىلى

الەم • بۇگىن، 17:55

پەتر يان ۇزدىكتەر قاتارىنا ەندى

جەكپە-جەك • بۇگىن، 16:05

ۇقساس جاڭالىقتار