ايماقتار • 26 ءساۋىر، 2019

پرەمەر-مينيستر قۇرىلىس جۇمىستارىن تاۋلىك بويى جۇرگىزۋدى تاپسىردى

846 رەت كورسەتىلدى

تۇركىستان وبلىسىنا جۇمىس ساپارىمەن كەلگەن پرەمەر-مينيستر اسقار مامين قر تۇڭعىش پرەزيدەنتى – ەلباسى نۇرسۇلتان نازارباەۆتىڭ تۇركىستان قالاسىن تۇركى الەمىنىڭ مادەني-رۋحاني ورتالىعى رەتىندە دامىتۋ جونىندە بەرگەن تاپسىرمالارىنىڭ ورىندالۋ بارىسىن باقىلادى. سونداي-اق بيىل 23 ناۋرىزدا وڭىرگە جۇمىس ساپارى اياسىندا پرەزيدەنت قاسىم-جومارت توقاەۆ بەرگەن تاپسىرمالاردى ەسكەرە وتىرىپ، قالا قۇرىلىسىن جالعاستىرۋدىڭ كەشەندى ماسەلەلەرىن قارادى.

بۇگىندە قالانىڭ اكىمشىلىك-ىسكەرلىك ورتالىعىندا بوي كوتەرىپ جاتقان وبلىس اكىمدىگى، باسقارمالار جانە دەپارتامەنتتەر عيماراتتارى، مەديا-ورتالىق پەن كونگرەسس-حوللدىڭ قۇرىلىس الاڭدارىندا جۇمىس قىزۋ. ۇكىمەت باسشىسىنىڭ ساپارى بارىسىندا الەۋمەتتىك نىساندار دا نازاردان تىس قالمادى. حالىقتىڭ جايلى ءومىر ءسۇرۋىن قامتاماسىز ەتۋ ماقساتىندا جۇرگىزىلىپ جاتقان اباتتاندىرۋ جانە كورىكتەندىرۋ جۇمىستارى دا جوسپارعا ساي جۇرگىزىلۋدە. تۇڭعىش پرەزيدەنت ساياباعى، قالالىق ويىن-ساۋىق پاركى، مۋزىكالىق فونتان، امفيتەاتر جانە ارباتتاعى قۇرىلىس جۇمىستارىن دا كەستە بويىنشا جۇرگىزىپ، ۋاقىتىندا اياقتاۋ مىندەتتەلگەن.

قۇرىلىس جۇمىستارىمەن تانىسىپ شىققان پرەمەر-مينيستر تۇركىستان قالاسىنىڭ 2019–2020 جىلدارعا ارنالعان كەشەندى قۇرىلىس جانە دامىتۋ جوسپارىن ىسكە اسىرۋ ماسەلەلەرى جونىندە جۇمىس كەڭەسىن وتكىزدى. تۇركىستان وبلىسىنىڭ اكىمى ءو. شوكەەۆ قۇرىلىس، تاريحي-مادەني نىسانداردى رەكونسترۋكتسيالاۋ، تۇرعىن ءۇي ماسەلەلەرىن شەشۋ، ينجەنەرلىك-كوممۋنيكاتسيالىق ينفراقۇرىلىم جۇرگىزۋ، جولداردىڭ ساپاسىن ارتتىرۋ، تۋريزم، اۋىل شارۋاشىلىعى سالالارىن، ارنايى ەكونوميكالىق ايماقتى دامىتۋ باعىتىندا اتقارىلىپ جاتقان جۇمىستار تۋرالى باياندادى. ەلباسى تاپسىرماسىنا سايكەس 29 نىساننىڭ قۇرىلىسى وڭىرلەر، ۇلتتىق كومپانيالار جانە بيزنەس وكىلدەرىنە بەكىتىلگەن. وبلىس اكىمىنىڭ ايتۋىنشا، بۇگىندە 10 نىساندا قۇرىلىس جۇمىستارى وندىرىستىك كەستەگە سايكەس جۇرگىزىلۋدە، ال 4 نىساندا قۇرىلىس جۇمىستارى باياۋ بولسا، 2 نىساندا جۇمىس باستالماعان. بيىل 7 نىسان پايدالانۋعا بەرىلەدى. ونىڭ ىشىندە اكىمشىلىك-ىسكەرلىك ورتالىعىندا سالىنىپ جاتقان 900 ورىندىق مەكتەپتىڭ قۇرىلىسى بار. سونداي-اق، وبلىس اكىمى «رۋحاني-مادەني ورتالىقتا» سالىنىپ جاتقان 9 نىسانعا توقتالدى. ولاردىڭ ۇشەۋىندە  قۇرىلىس جۇمىستارى باياۋ، ال تاعى ۇشەۋىندە قۇرىلىس الاڭى قورشالعانىمەن جۇمىس باستالماپتى. بايانداماسىنىڭ سوڭىندا وبلىس اكىمى بىرقاتار ماسەلەلەر بويىنشا ۇكىمەت تاراپىنان قولداۋ قاجەتتىگىن ايتتى.

كەڭەستى قورىتىندىلاعان پرەمەر-مينيستر ا.مامين قۇرىلىس جۇمىستارىن قارقىنداتۋدى جانە شارۋانى جوسپار بويىنشا اتقارۋدى تاپسىردى. «كۇشەيتىلگەن جۇمىس تارتىبىنە كوشەمىز»، — دەپ ۇكىمەت باسشىسى، «ەكى اپتا ىشىندە قۇرىلىس جۇمىستارىن تاۋلىك بويعى رەجيمگە كوشىرۋدى» تاپسىردى.


تۇركىستان وبلىسى

سوڭعى جاڭالىقتار

«وميكرون» «تويوتانى» قىسپاققا الدى

تەحنولوگيا • بۇگىن، 14:00

15169 ادام كوروناۆيرۋس جۇقتىردى

كوروناۆيرۋس • بۇگىن، 09:17

ۇقساس جاڭالىقتار