رەسپۋبليكالىق «Nomad explorer» ەكسپەديتسياسىنىڭ مۇشەلەرى «وڭتۇستىك اڭىزدارى» تاقىرىبىمەن وتكەن ساياحاتتا اقمەشىت ۇڭگىرىنە ايالداپ, دومالاق انا كەسەنەسىنە زيارات جاسادى. سونداي-اق شايانداعى اپپاق يشان مەشىتىنىڭ تاريحىمەن تانىستى. ولكەتانۋشى, «وڭتۇستىك اڭىزدارى» باعىتىنىڭ اۆتورى ەرلان سىزدىقتىڭ ايتۋىنشا, ساياحاتشىلاردىڭ العان اسەرى كەرەمەت. ولاردى ولكەنىڭ تابيعاتى مەن اڭىزدارى قاتتى قىزىقتىرعان.
ۇيىمداستىرۋشىلاردىڭ ايتۋىنشا, بۇعان دەيىن رەسپۋبليكا كولەمىندە 3 ەكسپەديتسيا وتكەن, دەگەنمەن اۋقىمى جانە قاتىسۋشىلار سانى جاعىنان ەڭ ۇلكەنى – وسى «وڭتۇستىك اڭىزدارى» بولىپ وتىر. ايتا كەتەلىك, مارعۇلان سەيسەمباەۆتىڭ باستاماسىمەن قۇرىلعان ەكسپەديتسيا قۇرامىندا ەلگە تانىمال قوعام قايراتكەرلەرى, زيالى قاۋىم وكىلدەرى, ولكەتانۋشىلار, جۋرناليستەر, كاسىپكەرلەر مەن سپورتشىلار جانە باسقا دا سالا وكىلدەرى بار.
"وڭتۇستىك اڭىزدارى" ەكسپەديتسياسى ءبىر اپتاعا جوسپارلانعان. بىرنەشە جىلدان بەرى ەلىمىزدىڭ كورىكتى جانە تاريحي ماڭىزى بار جەرلەرىنە ساياحات جاساپ, ىشكى ءتۋريزمدى دامىتۋعا اتسالىسىپ جۇرگەن «Nomad Explorer» ەكسپەديتسياسىنىڭ باعىتى جامبىل جانە تۇركىستان وبلىستارىن قامتيدى. ساياحاتشىلار ساپار بارىسىندا اقسۋ شاتقالدارى, اقمەشىت ۇڭگىرى سياقتى تابيعي جانە ارىستان باب كەسەنەسى, قوجا احمەت ياساۋي كەسەنەسى, دومالاق انا مازارى, كونە ساۋران, وتىرار قالالارى سياقتى تاريحي ەسكەرتكىشتەردى كورەدى. ەسكەرتكىشتەردى تاماشالاۋمەن قاتار, ەكسپەديتسيا مۇشەلەرى ترەنينگتەرگە قاتىسىپ, پىكىر الماسۋ الاڭىندا قوزعالعان تاقىرىپ اياسىندا ويلارىن بىلدىرمەك.
تۇركىستان وبلىسى
