ەرتەگىدە كونەكوز سيقىرشى, وزگە كەيىپكەرلەردىڭ ورەسى مەن قابىلەتىن سىناۋ ءۇشىن ءۇش كەزەڭنەن تۇراتىن ەرەكشە ويىن ويناۋعا شاقىرادى. العاشقىدا ولار ءوز ونەرلەرىن كورسەتسە, ەكىنشى كەزەڭدە «قىز قۋ», «تەڭگە ءىلۋ», «ۇشتى-ۇشتى» سىندى ۇلتتىق ويىنداردا باق سىناپ, سوڭعى كەزەڭىن جاھاندىق جاڭالىقتاردان حابار بەرەتىن قىزىقتى سۇراقتارمەن ءتۇيىندەيدى. ويىن جارىس ءتۇرىندە ءوتىپ, وعان زالدا وتىرعان بالدىرعاندار ارالاسىپ, قويىلىم ودان ءارى قىزا تۇسەدى. بىراق كوڭىلدى, زەرەك بالالاردىڭ اراسىندا جالقاۋلىققا ۇگىتتەيتىن ءبىر كەيىپكەر بار. ول – قۇلتەمىر. العاشىندا جارىسقا قاتىسۋشى جەتى ويىنشىق باس-باسىنا تارتىپ, ۇپايدى تەك وزدەرىنە ەنشىلەۋگە تىرىسادى. كەيىننەن قۇلتەمىردىڭ ارام ويىن ءبىلىپ, بىرلىك پەن ۇيىمشىلدىققا ۇيىسادى. سول ارقىلى قۇلتەمىردى ءوز ورتالارىنان الاستايدى. جەتى ويىنشىق جەڭىسكە ءبىر-ءبىرىن الالاماي, تاتۋلىقپەن بىرگە جەتەدى. سوڭىندا ءبارى بىرگە «قارا جورعا» مەن «قاماجايدى» ماساتتانا بيلەيدى.
«داناگوي قازاق حالقى «ءجۇز جىلدىعىن ويلاعان حالىق اعاش ەگەدى, مىڭ جىلدىعىن ويلاعان حالىق ۇرپاق تاربيەلەيدى» دەپ بەكەر ايتپاسا كەرەك. كەلەشەكتىڭ ىرگەتاسىن بۇگىننەن باستاپ قالاۋدى ۇلى مۇراتىنا بالاعان بابالارىمىز ۇرپاق ءتاربيەسىنە اسا ءمان بەرگەن. بۇل قويىلىمنىڭ ماقساتى دا – ۇلتقا ۇيىتقى بولاتىن ۇلاعاتتى ۇرپاق تاربيەلەۋ. الىبەكتىڭ دراماتۋرگياسى ءبۇگىنگى قوعامدا ورىن الىپ جاتقان تۇيتكىلدى ءماسەلەلەرمەن تىكەلەي بايلانىس ورناتادى. زامان تۇرعىسىنان ۋاقىتپەن بىرگە جۇيتكىپ كەلە جاتقان عالامدىق ماسەلەلەر, ادامزاتتىڭ قۇنسىزدانعان اسىل قاسيەتتەرى, دراماتۋرگ تاراپىنان وتكىر سىنالىپ كەلە جاتىر. وسى سەبەپتى قالامى جۇيرىك, شابىتى ارىندى قالامگەرگە تەاتر باسشىلىعى ەرتەگى جازىپ بەرۋىن قولقالاعان بولاتىن», دەيدى ج.ايماۋىتوۆ اتىنداعى پاۆلودار وبلىستىق قازاق مۋزىكا-دراما تەاترى ادەبي-دراما ءبولىمىنىڭ مەڭگەرۋشىسى نۇركەن تۇرلىبەك.
الىبەك بايبول – «تەمىر جول ۆوكزالى», «قۇلدار پاتشالىعى», «وي ۇشقىندارى» اتتى 3 پروزالىق كىتاپتىڭ جانە 8-گە جۋىق پەسانىڭ اۆتورى. «گۇلدىڭ اتى – ماحاببات» اتتى پەساسى م.اۋەزوۆ اتىنداعى قازاق مەملەكەتتىك اكادەميالىق دراما تەاترى ۇيىمداستىرعان جاس دراماتۋرگتەر بايقاۋىندا 40 شىعارمانىڭ ىشىنەن ۇزدىك بەستىككە ەنسە, 2018 جىلى «ءارىپتەر الەمىنە ساياحات» پەساسى ع.ءمۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا ساحنالانعان بولاتىن.
«تۋىندىمنىڭ نەگىزگى ايتار ويى, تۇپكى يدەياسى – كەز كەلگەن جاراتىلىستىڭ بويىنداعى باۋىرماشىلدىق, جاقىندىق, ىزگىلىك اتاۋلىنى جوعالتپاۋ جولىنداعى كۇرەس. سونىڭ اياسىندا كىشكەنتاي كورەرمەن قازاقتىڭ سالت-ساناسى, ادەت-عۇرپى, ءمادەنيەتىمەن جاقىنىراق تانىسۋعا مۇمكىندىك الادى. پاۆلودار وبلىستىق ج.ايماۋىتوۆ اتىنداعى مۋزىكا-دراما تەاترىنىڭ ۇجىمىنا العىسىم زور. اسىرەسە شىعارمامنىڭ قانات قاعۋىنا مۇرىندىق بولعان تەاتر باسشىسى ارمان تەمىربەك مىرزاعا, كوركەمدىك جەتەكشى, ونەر جاناشىرى ەرلىك جۋاسبەككە, ەرتەگىنىڭ قويۋشى رەجيسسەرى, بولاشاعىنان زور ءۇمىت كۇتتىرەتىن تالانت يەسى – ءادىلەت اقانعا, جۇدىرىقتاي جۇمىلعان بارشا تەاتر ۇجىمىنا ريزاشىلىعىمدى ءبىلدىرگىم كەلەدى. بۇگىندەرى «دراماتۋرگتەر جوق!» دەگەن جاتتاندى ءسوز كوپ ايتىلىپ جۇرگەنى بەلگىلى. مۇنىمەن كەلىسپەيمىن. ويتكەنى ءبىز – بارمىز. ءانناس باعدات, ىقىلاس شالعىنباي, قولعانات مۇرات, ايدانا الامان, ءالىشەر ايتۋار, حان اسانوۆ, مەرەي قوسىن سەكىلدى قاتارلاس-قاناتتاستارىمنىڭ اياق الىسىنا كوڭىلىم تولادى ءارى كەلەشەكتە وسى جاس قالامگەرلەرگە ءۇمىت ارتامىن», دەيدى الىبەك بايبول.
