ايانبايتىنى انىق
جۇما, 22 ماۋسىم 2012 7:31
فۋتبول
سونىمەن, قازىرگى كۇندەرى پولشا مەن ۋكراينادا ءوتىپ جاتقان ەۋروپا چەمپيوناتى دا بەل ورتاسىنان اۋدى. بۇل كەز تۋرنيرگە قاتىسۋشى كوماندالاردىڭ تەڭ جارتىسىنىڭ جارىس جولىنان شىعىپ قالىپ, تاعى ءبىر جارتىسىنىڭ جورىقتى جالعاستىرۋعا بەت الۋىمەن ەرەكشەلەندى. ەندى جانكۇيەر جۇرتتىڭ نازارى نەگىزگى توپتان ىلگەرى وزىپ كەتكەن سەگىز كومانداعا اۋىپ وتىر.
جۇما, 22 ماۋسىم 2012 7:31
فۋتبول
سونىمەن, قازىرگى كۇندەرى پولشا مەن ۋكراينادا ءوتىپ جاتقان ەۋروپا چەمپيوناتى دا بەل ورتاسىنان اۋدى. بۇل كەز تۋرنيرگە قاتىسۋشى كوماندالاردىڭ تەڭ جارتىسىنىڭ جارىس جولىنان شىعىپ قالىپ, تاعى ءبىر جارتىسىنىڭ جورىقتى جالعاستىرۋعا بەت الۋىمەن ەرەكشەلەندى. ەندى جانكۇيەر جۇرتتىڭ نازارى نەگىزگى توپتان ىلگەرى وزىپ كەتكەن سەگىز كومانداعا اۋىپ وتىر.
بۇرناعى كۇنى قۇرامالار ءبىر كۇندىك تىنىس الدى. ال كەشە تۇندە العاشقى شيرەك فينالدىق ويىن بولىپ ءوتتى. بۇل جولى الاڭعا پورتۋگاليا جانە چەحيا فۋتبولشىلارى شىقتى. بۇگىن گەرمانيا مەن گرەكيا كوماندالارى كەزدەسەدى. وسى پلەي-وفف ويىندارى ءبىر جاساقتى ماڭدايىنان شەرتىپ الىپ, جارتىلاي فينالعا شىعارعانعا دەيىن جالعاسادى. ال وسى كەزەڭگە ۇجىمدار ءارتۇرلى ويىنمەن, ءارتۇرلى جۇكپەن, ءارتۇرلى كوڭىل-كۇيمەن جەتتى. ەندى توپتارداعى احۋالدارعا قىسقاشا شولۋ جاساپ وتەيىك.
A توبى. بۇل ناعىز سەنساتسيالى توپ بولدى. سايىستىڭ الدىندا ونىڭ فاۆوريتتەرى رەتىندە رەسەي مەن پولشا اتالدى. ءبىرىنشى تۋر بۇل بولجامنىڭ دۇرىس ەكەنىنە جەم تاستاعانداي كورىندى. اقىر سوڭىندا جارىستى ناشار باستاعان ەكى كوماندا توپتان سۋىرىلىپ شىعىپ, كەلەسى كەزەڭگە بەت الدى. مۇندا, اسىرەسە, كەرەكتى كەزىندە جەڭىسكە دەگەن جىگەر تانىتا بىلگەن چەحتاردى ەرەكشە اتاپ وتۋگە بولادى. ال قانداي ءبىر جولمەن بولسا دا ناتيجەگە جەتۋدى ءبىرىنشى كەزەككە قوياتىن, تورەشىنىڭ كوزىن الا بەرە لاس ءتىرلىكتەرگە ەرىك بەرە سالاتىن گرەكتەردىڭ ويىنى ونشالىقتى قۇرمەت تۋدىرا المادى. بۇل قۇرامانىڭ الدىندا باس يەتىن ءبىر عانا نارسەمىز – ول قايتپاس قايسارلىعى, تاباندىلىعى بولسا كەرەك.
ال رەسەي وزىنە ءوزى ىستەدى. ونىڭ ەشكىمگە وكپەلەيتىن رەتى جوق. كوماندانىڭ ليدەرلەرى سانالعان پيتەرلىك جۇپ – ارشاۆين مەن كەرجاكوۆتىڭ ويىندارى ۇلگى تۇتۋدان كوپ كەيىن جاتتى. جۇلدىزى ەندى جانا ما دەگەن ءۇمىت وياتقان دزاگوەۆ تەكەتىرەستىڭ تەكپىسىمەن ەمەس, قاراپايىم عانا بۇزاقى قىلىقتىڭ اسەرىنەن جازا العانى قارىن اشتىردى. ۇلى فۋتبولشى بولاتىن ادام مۇنى ىستەمەس ەدى. پولياكتارعا كەلسەك, ولاردىڭ وسى چەمپيوناتقا كۇرەسسىز قوسىلىپ كەتكەنى بولماسا, وعان دەيىنگى باقىلاۋ كەزدەسۋلەرىندە ونشالىقتى جارقىراپ كورىنە العان جوق-تىن. ءتۋرنيردىڭ بايگەسىندە اقىرى ول ءوز بويىنان بيىككە سەكىرە المادى. سونىمەن بىرگە, پولشا قۇراماسى وسى كەزگە دەيىن ءوز ەلىندە وتكەن ەۋروپا چەمپيوناتتارىندا ءوز توبىندا ەڭ سوڭعى ورىندا قالىپ قويعان ءبىرىنشى كوماندا بولدى.
بۇل توپتان شىققان ەكەۋدىڭ وسىدان ارىعا ۇزاي قويۋى قيىن.
B توبى. بۇل كۆارتەتتى جانكۇيەرلەر مەن ماماندار ءاۋ باستان «جانكەشتىلەر توبى» دەپ اتادى. شىنىندا مۇندا كىل سايدىڭ تاسىنداي كوماندالار جينالىپتى. سودان دا بولار, ولاردىڭ بارلىق ماتچتارى ىمىراعا كونبەيتىن ناعىز كەسكىلەسكەن كۇرەسپەن ءوتتى. توپتا بىردە-ءبىر تەڭ ويىن تىركەلگەن جوق. سول تالاستىڭ اراسىندا باسىندا بولجانعان ەكى ءفاۆوريتتىڭ ءبىرى – گەرمانيانىڭ 3 رەت جەڭىسكە جەتىپ, 9 ۇپاي العانى, ال ەكىنشىسى – گوللانديانىڭ سول 3 كەزدەسۋدى تۇگەل ۇتىلىسقا جىبەرىپ, بىردە-ءبىر ۇپاي الا الماعانى قىزىق بولدى. وسىلاردىڭ ورتاسىنداعى پورتۋگاليا مەن دانيا وزدەرىنە لايىقتى ونەر كورسەتتى. اسىرەسە, كريشتيانۋ رونالدۋ باستاعان پورتۋگالداردىڭ بارلىق كەزدەسۋدى ۇلكەن ورلەۋمەن وتكىزگەنى, تۋرنير ۇزاعان سايىن شابىسىنا شابىس قوسا تۇسكەنى, جالپى, بۇل قۇرامانىڭ كەلەشەگى الدا ەكەنىن بايقاتتى. سوڭعى ويىندا تاعى ۇتىلعانى بولماسا, داتتار دا ەشكىمگە ەسە جىبەرە قويمايتىن ۇجىم بولىپ كورىندى.
ال اتاقتى «نەمىس ماشينەسى» تۋرالى ايتار ءسوز از. ول ازىرگە بىردە-ءبىر ەلەۋلى قاتەلىككە جول بەرە قويمادى. شيرەك فينالدىڭ سىنىنان گەرمانيا دا, پورتۋگاليا دا سۇرىنبەي وتۋگە ءتيىس.
C توبى. بۇل تورتتىكتە ەشقانداي دا سەنساتسيا ورىن العان جوق. اراسىندا كوڭىلدى ازداعان كۇمان كەۋلەگەنمەن, شيرەك فينالعا جۇرت الدىن الا بەلگىلەپ قويعان ەكى قۇراما – يسپانيا مەن يتاليا ءوتتى. راس, دارەجەلەرى مەن مارتەبەسى جوعارى بۇل ەكەۋدىڭ جۇبى اراسىنا حورۆاتيا سىنا قاعىپ كەتە جازدادى. بىراق شارشى جەيدەلى جىگىتتەر تىنىشتىقتى بۇزۋشىلار قالپىنان ارىعا اسا المادى. ءايتكەنمەن, حورۆاتتار ۇيلەرىنە ەڭسەلەرى جوعارى بولىپ قايتۋعا ءتيىس.
ەكىنشى كەزەڭگە جولداما العان يتاليانىڭ ويىنى ءارى-ءسارى كۇيدە قالدىردى. بۇعان كوماندا قۇرامىن جاساقتاۋداعى پروبلەمالار قاتتى اسەر ەتكەندەي. سوندىقتان جاتتىقتىرۋشىعا ويىن سحەماسىن ءجيى اۋىستىرىپ وتىرۋعا تۋرا كەلدى. ءتۋرنيردىڭ باسىندا فاۆوريت ءرولى يسپانياعا تەلىندى. ءناتيجەسىندە, ءبىرىنشى ورىن العان «قىزىل فۋريا» سول سەنىمدى اقتاعانداي بولدى. بىراق يسپاندار توپتاعى باسقا كوماندالاردان وق بويى الدا بولدى دەپ ەشكىم ايتا الماس ەدى. بىردە ولار شىنىمەن باسىم ءتۇستى, ەندى بىردە ساتتىلىكتەن سەرىك تاپتى.
بۇلاردىڭ شيرەك فينالداعى ايقاستارى وڭايعا تۇسپەيدى. دەگەنمەن, يسپانداردىڭ فرانتسۋزداردان اسۋعا تولىق مۇمكىندىگى بار.
D توبى. قازاق: «سوڭعى تۇيەنىڭ جۇگى اۋىر», دەيدى. قاۋىم ءىشىندەگى ءتۋرنيردى كەش باستاپ, كەش اياقتاعان بۇل تورتتىكتىڭ ءجۇگى راسىندا دا اۋىرلاۋ سوقتى. چەمپيونات الدىندا ەڭ جۇمباعى كوبى سانالعان كۆارتەت اقىرعى ساتىنە دەيىن سول جۇمباق قالپىن ساقتاپ, الدىڭعى ەكى ورىن ءۇشىن ايقاسىپ باقتى. وسى شايقاستار ولاردىڭ شامالارى دا بىردەي ەكەندىكتەرىن تانىتتى. مۇندا سوڭعى ويىندا «ەسىكتى تارس جاۋىپ» كەتكەن شۆەدتەردى دە, بارىن سالعانىمەن, بايانىن جاساي الماعان ۋكراينداردى دا توپتىڭ اۋتسايدەرىنە بالاي سالۋ قيىن. ال العا شىققان اعىلشىندار مەن فرانتسۋزداردىڭ ءتۋرنيردى الا-قۇلا وتكىزگەنىن كوز كوردى. دەگەنمەن, پلەي-وففتىڭ اتى – پلەي-وفف, ول ەشكىمنىڭ ىرعالىپ-جىرعالعانىن كوتەرمەيدى. سوندىقتان ۇجىمداردىڭ ەندى ايانبايتىنى انىق.
بۇل ەكى قۇرامانىڭ اراسىنان انگليانىڭ جارتىلاي فينالعا شىعۋ مۇمكىندىگى باسىم سياقتى.
سەرىك ءپىرنازار,
«ەگەمەن قازاقستان».
ويلار, پىكىرلەر, كوزقاراستار
پاولو بەنتۋ,
پورتۋگاليا قۇراماسىنىڭ باس جاتتىقتىرۋشىسى:
– ەندى كوماندالاردىڭ نە بۇك, نە شىك تۇسەتىن كەزەڭى كەلدى. ويىنشىلار قارسىلاستىڭ كۇشتى جاعىن دا, ءالسىز تۇسىن دا جاقسى بىلەدى. بىزدىڭشە, ەكى قۇرامانىڭ جەڭىسكە دەگەن مۇمكىندىگى بىردەي. دەگەنمەن, ءبىزدىڭ دايىندىعىمىز وتە جاقسى.
لوران بلان,
فرانتسيا قۇراماسىنىڭ باس جاتتىقتىرۋشىسى:
– وتكەن ويىندا شۆەتسيا ءبىزدى وڭدى-سولدى ۇتتى. ەگەر يسپانيامەن شايقاستا سونداي ويىن كورسەتەر بولساق, ءبىز الاڭدا ەشتەڭە دە بىتىرە المايمىز.
پەرلۋيدجي كوللينا, ۋەفا تورەشىلەر كورپۋسىنىڭ باسشىسى:
– ۋكراين شابۋىلشىسى ماركو دەۆيچتىڭ انگليا قاقپاسىنا سوققان دوبى تازا گول ەدى. ءبىز قاتەلىك جىبەرىپ الدىق. مەنىڭ جەكە باسىم مۇنداي ءنارسەنىڭ بولعانىن قالاماس ەدىم, بىراق بولىپ قالدى. تورەشىلەر دە ادام عوي, قاتەلەسەدى. ال بۇل وقيعانى ءبىز 2 شىلدە كۇنى تالقىلاپ, ءتيىستى شارا قولدانامىز.
مەرگەندەر كوشى
ماريو گومەس (گەرمانيا) – 3
الان دزاگوەۆ (رەسەي) – 3
ماريو مادجۋكيچ (حورۆاتيا) – 3
نيكلاس بەندتنەر (دانيا) – 2
زلاتان يبراگيموۆيچ (شۆەتسيا) – 2
پەتر يراچەك (چەحيا) – 2
ميكاەل كرون-دەلي (دانيا) – 2
ۆاتسلاۆ پيلارج (چەحيا) – 2
كريشتيانۋ رونالدۋ (پورتۋگاليا) – 2
فەرناندو توررەس (يسپانيا) – 2
سەسك فابرەگاس (يسپانيا) – 2
اندرەي شەۆچەنكو (ۋكراينا) – 2
ايتپاقشى…
* ەۋروپا فۋتبول ۇيىمى حورۆاتيا فۋتبول وداعىنا قارسى ءۇشىنشىمارتە تارتىپتىك ءىس كوتەردى. سەبەپ: اتالمىش ەل قۇراماسىنىڭيسپانياعا قارسى ويىنى كەزىندە كوماندا فاناتتارى ستاديونداپەتارد پەن فەيەرۆەركتەر اتىپ, تريبۋناعا ناسىلشىلدىك مازمۇنداعىباننەرلەر مەن سيمۆوليكا الىپ شىققان.
