مىندەت جانە ەرلىك
بەيسەنبى, 1 قاراشا 2012 7:11
قاندىقول قاراقشىنى ۇستاۋ ءۇشىن تەك كۇشتىلىك ازدىق ەتەتىنى انىق. بۇل جاعدايدا, الدىمەن ادامنىڭ ەرجۇرەكتىلىگى, ياعني باتىرلىعى اسا قاجەت. مۇندايدا قورىققانعا قوس كورىنەدى دەيدى, ال قورىقپاعان جاۋىن قالايدا تىزە بۇكتىرە الاتىنىن بىلەدى. سونىڭ ءبىر دالەلىندەي, اقتوبە وبلىستىق ءىىد جپب اعا ينسپەكتورى ءاليحان تۇگىلتاەۆ اسا قاۋىپتى قىلمىسكەردى ۇستاۋدا ءوزىنىڭ باتىرلىعى مەن ەرجۇرەكتىلىگىن كورسەتتى. ول ءوزى قاتتى جاراقاتتانسا دا قاندىبالاق قىلمىسكەردىڭ قاشىپ كەتۋىنە جول بەرمەدى. ال قىلمىسكەردىڭ جولىن ءاليحاننىڭ ءوزى كەستى.
بەيسەنبى, 1 قاراشا 2012 7:11
قاندىقول قاراقشىنى ۇستاۋ ءۇشىن تەك كۇشتىلىك ازدىق ەتەتىنى انىق. بۇل جاعدايدا, الدىمەن ادامنىڭ ەرجۇرەكتىلىگى, ياعني باتىرلىعى اسا قاجەت. مۇندايدا قورىققانعا قوس كورىنەدى دەيدى, ال قورىقپاعان جاۋىن قالايدا تىزە بۇكتىرە الاتىنىن بىلەدى. سونىڭ ءبىر دالەلىندەي, اقتوبە وبلىستىق ءىىد جپب اعا ينسپەكتورى ءاليحان تۇگىلتاەۆ اسا قاۋىپتى قىلمىسكەردى ۇستاۋدا ءوزىنىڭ باتىرلىعى مەن ەرجۇرەكتىلىگىن كورسەتتى. ول ءوزى قاتتى جاراقاتتانسا دا قاندىبالاق قىلمىسكەردىڭ قاشىپ كەتۋىنە جول بەرمەدى. ال قىلمىسكەردىڭ جولىن ءاليحاننىڭ ءوزى كەستى.
ارال قالاسىندا بىرنەشە دۇركىن اۋىر قىلمىستار جاساسا دا ايلاسىن اسىرىپ ساقشىلاردان قۇتىلعان بۇزاقى قانات اقتوبە قالاسىنا كەلىپ, باس ساۋعالاعان. ەگەر مۇندا قاراسىن كورسەتپەي, ءۇنىن شىعارماي بۇقپانتايلاپ جۇرە بەرسە قولعا ىلىكپەس پە ەدى. بىراق ۇيرەنشىكتى كاسىبىنەن قول ۇزە الماعان قاراقشى عادەتتەنگەن ىسىنە قايتا كىرىسەدى. ءسويتىپ, اقتوبە قالاسىنىڭ شەت جاعىندا تۇرعان ءۇيدىڭ يەلەرى ۇيقىعا كەتتى-اۋ دەگەن كەزدە ءتۇن جامىلىپ شاتىر ارقىلى ىشكە ەنەدى. مۇندا كىمدەر تۇراتىنىن ول الدىن الا زەرتتەگەن. سوندىقتان ءۇي يەلەرىنەن وزىنە اسا قاۋىپ كەلمەيتىنىن دە بىلگەن. ءتاتتى ۇيقىدا جاتقان ولاردى سۋىق قارۋ كەزەنىپ وياتقاندا بايعۇس ەرلى-زايىپتىلاردىڭ ءتىل-اۋىزدارى بايلانىپ قالدى. قاتتى قورىققاننان شىبىن جاندارىن ساقتاپ قالۋ ءۇشىن, امال جوق, بار جيعان اقشالارى مەن تىققان باعالى زاتتارىن ۇستاتا بەردى.
بەيبىت جانداردى توناپ, قانى قارايعان قاراقشى وڭاي ولجاعا بىردەن قولى جەتكەنىنە ماساتتانىپ, سونان ءۇي يەسىنە ءوزىن قالانىڭ ءبىر شەتىنە جەتكىزىپ تاستاۋدى بۇيىردى. قارۋلى قىلمىسكەردەن تەز ارادا قۇتىلۋدى ءارى ونى وتباسىنان الاستاتۋ امالىن ويلاپ تۇرعان وتاعاسى «اۋدي» كولىگىن كولدەنەڭ تارتتى. ەگەر وسىدان پوليتسياعا حابار بەرەتىن بولساڭ اۋەلى كۇيەۋىڭدى, سوسىن قايتىپ كەلىپ ءوزىڭدى ولتىرەمىن, دەيدى ايەلگە مىلتىق اۋزىن تاقاعان قاراقشى. الايدا, بىرگە كەتسە كۇيەۋىنەن ايىرىلىپ قالامىن دەپ ويلاعان ايەل كولىكتى دە قوسا بەردىك ءوزىڭ الىپ كەت دەپ زار يلەدى. بىراق كوزى قىزارعان قىلمىسكەر ايتقانىنان تانباي ءۇي يەسىن تاپانشامەن ءتۇرتىپ, كۇشتەپ رولگە وتىرعىزدى. سونان قىلمىسكەردى كولىگىنە وتىرعىزعان كۇيەۋى اۋلادان شىعىپ كەتىسىمەن ايەل پوليتسياعا حابار بەردى.
ساقشىلار «ۇستاۋ» ارنايى جوسپارىن قۇردى. بارلىق نۇتەلەردە تۇرعان كەزەكشى پوليتسەيلەرگە حابار جىبەرىلدى. بۇل حاباردى جول بويىندا كولىك قوزعالىسى ەرەجەسىن باقىلاپ تۇرعان پوليتسيا مايورى ءاليحان تۇگىلتاەۆ پەن پوليتسيا اعا سەرجانتى ءىزباسار دارىباەۆ تا ەستىدى. كوپ كەشىكپەي ولار وزدەرىنە قاراي ءجۇيتكىپ كەلە جاتقان «اۋدي» كولىگىن بايقادى. ونىڭ ىشىندە كولىك جۇرگىزۋشىسىن كەپىلگە الىپ, جولىندا كەزدەسكەن كەدەرگىنى جويۋ ءۇشىن بارىنە بارۋعا دايىن قارۋلانعان اسا قاۋىپتى باسكەسەر وتىرعانىن بۇلار جاقسى ءبىلدى. سوندىقتان وتە ساق تا, باتىل قيمىلداماسا, قاتەلىك ورنى تولماس وكىنىشكە ۇشىراتۋى مۇمكىن ەدى.
ەكەۋى ەش كۇدىك تۋدىرماي ادەتتەگى جول بويىندا ءتارتىپ ساقتاپ جۇرگەن پوليتسەي رەتىندە «اۋدي» كولىگىن توقتاتتى. قۇجاتتارىن الىپ جۇرگىزۋشى سىرتقا شىقتى. مىنە, تاپ وسى ءساتتى كۇتىپ تۇرعان ءاليحان ىشكە اتىلا ەنىپ, قىلمىسكەردى باس سالدى. الايدا, ول دا دايىن وتىر ەكەن, اياق استىنا قولىنداعى جارىلعىش زاتتى تاستاپ جىبەردى. ءسويتتى دە ءوزى اشىق ەسىكتەن دالاعا ىتقىپ شىعۋعا ارەكەتتەندى. بىراق ونى ءاليحان ۇستاپ قالدى. بۇل كەزدە جارىلعىش زات تا جارىلىپ ۇلگەردى. وسى ءبىر قاس-قاعىم ءساتتى پايدالانعان قاراقشى قانات جانتالاسا قۇتىلماق بولدى. ال جارقىنشاق اياعىنا ءتيىپ جارالانسا دا ءاليحان قاشا جونەلگەن قىلمىسكەردى ىزباسارمەن بىرگە قايتا ۇستاۋعا ۇمتىلدى. ەكەۋلەپ ونى قۋىپ جەتىپ, ەكى بۇكتەدى. قولىن قايىرىپ كىسەن سالدى.
…كەيىن اقتوبە وبلىسىنىڭ ءىىد جپب اعا ينسپەكتورى, پوليتسيا مايورى ءاليحان تۇگىلتاەۆ اسا قاۋىپتى قارۋلانعان قىلمىسكەردى ۇستاۋداعى كورسەتكەن ەرلىگى ءۇشىن ەلباسىنىڭ جارلىعىمەن ءىىى ءدارەجەلى «ايبىن» وردەنىمەن ماراپاتتالدى.
الەكساندر تاسبولاتوۆ,
«ەگەمەن قازاقستان».
