تارازى
جۇما, 10 تامىز 2012 18:48
«قازاقستان رەسپۋبليكاسى قۇقىق قورعاۋ ورگاندارىنىڭ قىزمەتكەرلەرىن كەزەكتەن تىس اتتەستاتتاۋدان وتكىزۋ تۋرالى» پرەزيدەنت جارلىعىن ورىنداۋ تالاپقا ساي جۇزەگە اسىرىلۋدا. بۇل ماقساتتا رەسپۋبليكا بويىنشا بىرقاتار ءتيىستى ءىس-شارالار جۇرگىزىلىپ كەلەدى. سونىڭ ءبىرى دە بىرەگەيى رەتىندە ايتارىمىز, پرەزيدەنت جانىنداعى جوعارعى اتتەستاتتاۋ كوميسسياسىنان وتكەن قۇقىق قورعاۋ ورگاندارى قىزمەتكەرلەرى ەندى بىرتىندەپ ورتالىق اتتەستاتتاۋ كوميسسياسىنداعى سىناقتان وتۋدە.
جۇما, 10 تامىز 2012 18:48
«قازاقستان رەسپۋبليكاسى قۇقىق قورعاۋ ورگاندارىنىڭ قىزمەتكەرلەرىن كەزەكتەن تىس اتتەستاتتاۋدان وتكىزۋ تۋرالى» پرەزيدەنت جارلىعىن ورىنداۋ تالاپقا ساي جۇزەگە اسىرىلۋدا. بۇل ماقساتتا رەسپۋبليكا بويىنشا بىرقاتار ءتيىستى ءىس-شارالار جۇرگىزىلىپ كەلەدى. سونىڭ ءبىرى دە بىرەگەيى رەتىندە ايتارىمىز, پرەزيدەنت جانىنداعى جوعارعى اتتەستاتتاۋ كوميسسياسىنان وتكەن قۇقىق قورعاۋ ورگاندارى قىزمەتكەرلەرى ەندى بىرتىندەپ ورتالىق اتتەستاتتاۋ كوميسسياسىنداعى سىناقتان وتۋدە.
ماسەلەن, اعىمداعى جىلعى 21 مامىردان 19 ماۋسىمعا دەيىن قارجى پوليتسياسىنىڭ 68 قىزمەتكەرى, ولاردىڭ قاتارىندا ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى توراعاسىنىڭ ورىنباسارلارى, اگەنتتىك اپپاراتىنىڭ جەتەكشىسى, ورتالىق اپپارات دەپارتامەنتتەرىنىڭ باستىقتارى, وبلىستار, استانا جانە الماتى قالالارىنىڭ قارجى پوليتسياسى دەپارتامەنتتەرىنىڭ باستىقتارى مەن ولاردىڭ ورىنباسارلارى, قارجى پوليتسياسى اكادەمياسىنىڭ باستىعى ەل پرەزيدەنتى جانىنداعى جوعارعى اتتەستاتتاۋ كوميسسياسىندا سىناقتان ءوتتى.
اتتەستاتتاۋدان وتۋشىلەر قازاقستان رەسپۋبليكاسى زاڭناماسىن ءبىلۋ جانە لوگيكالىق ويلاۋ قابىلەتىن كورسەتەتىن تەستىلەردى, دەنە شىنىقتىرۋ جانە اتىس دايىندىعى نورماتيۆتەرىن تاپسىردى, سونداي-اق پسيحولوگپەن سۇحباتتاستى. پرەمەر-ءمينيستردىڭ توراعالىعىمەن ءوتكەن جوعارعى اتتەستاتتاۋ كوميسسياسىنىڭ قىزمەتكەرلەرىمەن بولعان اڭگىمەلەسۋ ءناتيجەسىندە 3 قىزمەتكەر جوعارى لاۋازىمعا تاعايىنداۋعا ۇسىنىلۋعا جاتسا, 45 قىزمەتكەر لاۋازىمدارىنا تولىق سايكەس كەلەتىن بولدى, ال 8 قىزمەتكەر لاۋازىمدارىنا ءسايكەس كەلمەيدى جانە تومەن لاۋازىمعا تاعايىندالۋعا ۇسىنىلدى. بۇلاردىڭ 2-ءى قارجى پوليتسياسىنىڭ اۋماقتىق دەپارتامەنتتەرىنىڭ باستىقتارى, 6-ى – دەپارتامەنت باستىقتارىنىڭ ورىنباسارلارى. سونىمەن قاتار, 1 قىزمەتكەر لاۋازىمىنا سايكەس كەلمەيدى دەپ تابىلىپ, باسقا قىزمەتكە اۋىستىرۋعا ۇسىنىلدى, 11 قىزمەتكەر قارجى پوليتسياسى ورگاندارىنان جۇمىستان شىعارىلۋعا جاتقىزىلدى, ولاردىڭ 2-ءى – اۋماقتىق دەپارتامەنت باستىقتارى, 9-ى – دەپارتامەنت باستىقتارىنىڭ ورىنباسارلارى.
جوعارعى اتتەستاتتاۋ كوميسسياسى قورىتىندىلاردى شىعارعان كەزدە تەستىلەۋ مەن پسيحولوگپەن بولعان سۇحباتتىڭ ناتيجەلەرىن, قىزمەتكەرلەردىڭ دەنە شىنىقتىرۋ جانە اتىس دايىندىعىمەن قاتار, ولاردىڭ جەدەل-قىزمەتتىك جۇمىسىنىڭ ناتيجەلەرىن دە ەسكەردى. وسىلايشا, جوعارعى اتتەستاتتاۋ كوميسسياسىندا 68 قارجى پوليتسيا قىزمەتكەرىنىڭ 29 پايىزى سىناقتان وتە المادى.
اتتەستاتتاۋدى وتكىزۋدىڭ باستى مىندەتى – قارجى پوليتسياسى ورگاندارىنىڭ قۇرامىن قوعامنىڭ تالاپتارىنا ساي ءوزىنىڭ قىزمەتتىك مىندەتتەرىن ءتيىمدى اتقارا الاتىن قىزمەتكەرلەرمەن قالىپتاستىرۋ. وسىعان سايكەس, كەزەكتەن تىس اتتەستاتتاۋ باستالماستان بۇرىن-اق تاپسىرىلعان جۇمىستى ءتيىستى دەڭگەيدە ۇيىمداستىرا الماعاندارى ءۇشىن 37 باسشى لاۋازىمدارىنان بوساتىلعان ەدى. ولاردىڭ قاتارىندا: اگەنتتىك توراعاسىنىڭ 2 ورىنباسارى; ورتالىق اپپارات دەپارتامەنتتەرىنىڭ 6 باستىعى; اۋماقتىق دەپارتامەنتتەردىڭ 9 باستىعى; اۋماقتىق دەپارتامەنتتەر باستىقتارىنىڭ 20 ورىنباسارى بولدى.
تالاپقا سايكەس كەلمەۋىنە بايلانىستى قىزمەتىنەن بوساتىلعان اتالعان 37 قىزمەتكەردى جانە اتتەستاتتاۋدان وتە الماعانداردى قوسا ساناعاندا, قارجى پوليتسياسى ورگاندارىنان باسشىلىق لاۋازىمداعى 57 ادام جۇمىستان شىعارىلدى. سونىمەن قاتار, جوعارعى اتتەستاتتاۋ كوميسسياسىنىڭ قاتاڭ تالاپتارىن ەسكەرىپ, 9 قىزمەتكەر كەزەكتەن تىس اتتەستاتتاۋدان وتۋدەن باس تارتىپ, وزدەرى جۇمىستان شىعۋعا ءوتىنىش جازدى.
وسىلايشا, اعىمداعى جىلدىڭ باسىنان قارجى پوليتسياسى ورگاندارىنىڭ باسشىلىق قۇرامى 85 پايىزعا جاڭارتىلدى. ەندى كۇنى كەشە عانا كەزەكتەن تىس اتتەستاتتاۋدىڭ ەكىنشى كەزەڭى دە اياقتالدى. ورتالىق اپپاراتتىڭ جانە تاعايىندالۋى اگەنتتىكتىڭ نومەنكلاتۋراسىنا كىرەتىن اۋماقتىق قارجى پوليتسياسى ورگاندارى مەن قارجى پوليتسياسى اكادەمياسىنىڭ قىزمەتكەرلەرى اگەنتتىك جانىنداعى ورتالىق اتتەستاتتاۋ كوميسسياسىندا سىناق تاپسىردى. مۇندا اتتەستاتتاۋدى 533 قىزمەتكەر ءوتۋى ءتيىس بولاتىن, الايدا 19 قىزمەتكەر ورتالىق اتتەستاتتاۋ كوميسسياسىنىڭ جوعارى تالاپتارىن ەسكەرە كەلە, لاۋازىمدارىنان بوساتۋ تۋرالى بايانات جازىپ, اتتەستاتتاۋدان وتۋدەن باس تارتتى, 2-ءى ورتالىق اسكەري-مەديتسينالىق كوميسسياعا قارالۋعا جىبەرىلدى, 4 قىزمەتكەر ۋاقىتشا ەڭبەك قابىلەتسىزدىگىنە بايلانىستى اتتەستاتتاۋدان وتپەدى.
ناتيجەسىندە ورتالىق اتتەستاتتاۋ كوميسسياسىنان 508 قىزمەتكەر ءوتتى, ولاردىڭ 283-ءى اگەنتتىك قىزمەتكەرلەرى, 225-ءى اۋماقتىق دەپارتامەنتتەر مەن قارجى پوليتسياسى اكادەمياسىنىڭ قىزمەتكەرلەرى. ولاردىڭ ءبارى ەل زاڭناماسىن ءبىلۋ, ويلاۋ قابىلەتتىگىن انىقتاۋعا باعىتتالعان تەستىلەۋدى جانە اسكەري دايىندىق نورماتيۆتەرىن تاپسىرىپ, پسيحولوگ ماماندارىمەن سۇحباتتاستى. ءسويتىپ, 52 قىزمەتكەر ءوز قىزمەتتەرىنە سايكەس كەلەدى جانە كادرلىق رەزەرۆكە ەنگىزۋ نەمەسە جوعارى لاۋازىمدارعا تاعايىندالۋعا بولادى دەپ تابىلدى, 393 قىزمەتكەر اتقارىپ وتىرعان لاۋازىمدارىنا سايكەس كەلەدى دەپ تانىلدى. ال 38-ءى اتقارىپ وتىرعان لاۋازىمدارىنا سايكەس كەلمەيتىن بولعاندىقتان, تومەن لاۋازىمدارعا تاعايىندالۋعا ۇسىنىلدى. 16 ادام لاۋازىمدارىنا سايكەس ەمەس دەپ تابىلىپ, 9 قىزمەتكەر قارجى پوليتسياسى ورگاندارىنان جۇمىستان شىعارىلاتىن بولدى.
سونىمەن, 508 قىزمەتكەردىڭ 63-ءى نەمەسە 12,4 پايىزى اتتەستاتتاۋدان وتە المادى, ولاردىڭ 38-ءى – اۋماقتىق دەپارتامەنتتەر مەن قارجى پوليتسياسى اكادەمياسىنىڭ باسقارمالارى مەن بولىمدەرىنىڭ باستىقتارى. كەزەكتەن تىس اتتەستاتتاۋ ءناتيجەسىندە اۋماقتىق قارجى پوليتسياسى ورگاندارىنىڭ باسشىلىق قۇرامىنىڭ ورتا بۋىنى 27 پايىزعا جاڭارتىلدى. ويتكەنى, اتتەستاتتاۋدى وتكىزۋدىڭ باستى ماقساتى, جوعارىدا ايتقانىمىزداي, قارجى پوليتسياسى ورگاندارىنىڭ كادرلىق قۇرامىن قوعامنىڭ تالاپتارىنا ساي ءوزىنىڭ قىزمەتتىك ءمىندەتتەرىن ءتيىمدى اتقارا الاتىن قىزمەتكەرلەرمەن تولىقتىرۋ بولىپ تابىلاتىندىعى بەلگىلى.
كەزەكتەن تىس اتتەستاتتاۋدىڭ كەلەسى كەزەڭى, ياعني اۋماقتىق قارجى پوليتسياسى ورگاندارى جانە قارجى پوليتسياسى اكادەمياسىنىڭ جانىنداعى اۋماقتىق اتتەستاتتاۋ كوميسسيالارىنداعى سىناقتار وسى تامىز ايىندا وتەدى. وعان اۋماقتىق قارجى پوليتسياسى ورگاندارى مەن قارجى پوليتسياسى اكادەمياسىنىڭ 2450 قىزمەتكەرى قاتىسادى. قازىر پرەمەر-مينيستر جانە اگەنتتىك توراعاسىمەن كەلىسىلگەن بارلىق 17 اۋماقتىق اتتەستاتتاۋ كوميسسيالارىنىڭ قۇرامدارى بەكىتىلدى. ولاردىڭ جۇمىسىنا اۋماقتىق دەپارتامەنتتەر جانە قارجى پوليتسياسى اكادەمياسىنىڭ باستىقتارى جەتەكشىلىك ەتەدى. اشىقتىق پەن شىنايىلىقتى قامتاماسىز ەتۋ ماقساتىندا اتتەستاتتاۋ كوميسسيالارى جۇمىسىنا قوعامدىق جانە بۇقارالىق اقپارات قۇرالدارىنىڭ وكىلدەرى تارتىلۋدا.
الەكساندر تاسبولاتوۆ,
«ەگەمەن قازاقستان».
