كەشتەۋ بولسا دا ءمالىم بولعان وقيعاعا بايلانىستى كوڭىلدى وسىلاي جۇباتىپ العانىمىزبەن, وگەي انانىڭ قاتىگەزدىگى, قورعانسىز قىزداردىڭ دەنەسىنە عانا ەمەس, جۇرەگىنە تۇسكەن جارا تۋرالى اقپاراتتار ەڭسەنى ەزىپ, اۋىر ويعا جەتەلەيدى. ءيا, الەۋمەتتىك جەلىدە اقپارات جاريالانباي تۇرىپ, تۇركىستان وبلىسى جەتىساي اۋدانىندا مەكتەپ مۇعالىمدەرى وقۋشىلاردىڭ دەنەسىنەن ىسىك پەن ۇرىپ-سوعۋ ىزدەرىن بايقاپ, پوليتسيا قىزمەتكەرلەرىن شاقىردى. بالالاردى جابىرلەگەن ايەل ءبىردەن پوليتسياعا جەتكىزىلدى. الەۋمەتتىك جەلى بەلسەندىسى تاراتقان اقپاراتقا قاراعاندا, اپالى-ءسىڭلىلى – 16, 14 جانە 12 جاستاعى قىزداردىڭ كورمەگەن قورلىعى قالماعان. وگەي اناسى, 1991 جىلعى جۇلدىز كامەلەت جاسىنا تولماعان قىزداردى ۇرىپ-سوققانى ازداي, جانتۇرشىگەرشىك ءتاسىلمەن دەنەلەرىنە جاراقات سالىپ, ازاپتاعان. ونىڭ مۇنداي قاتىگەزدىككە نە سەبەپتى بارعانى ازىرگە بەيمالىم. وگەي انا جۇلدىز 2016 جىلى جەرگىلىكتى ازاماتقا تۇرمىسقا شىققان. جابىرلەنگەن ءۇش قىز ازاماتتىڭ العاشقى ايەلىنەن تۋعان. اۋدان اكىمىنىڭ كەڭەسشىسى ايدار سەيدازىمنىڭ ايتۋىنشا, وتباسىنىڭ الەۋمەتتىك جاعدايى جامان ەمەس. وتاعاسى كولىك ءجوندەۋمەن اينالىسادى. وگەي انانىڭ بالالاردى ۇرىپ-سوعۋى اكەلەرى ۇيدە جوق كەزدە بولعان كورىنەدى. كورشىلەرى دە كۇدىكتەنەر ەشتەڭە بايقاماعان. 2017 جىلى ولاردىڭ اراسىندا ءبىر ۇل دۇنيەگە كەلگەن. تۋىستارىنىڭ ايتۋىنشا, وسى كەزدەن باستاپ كەلىننىڭ مىنەز-قۇلقىندا وزگەرىستەر بايقالىپتى. بىراق وعان ءمان بەرمەگەن. جۇلدىز قىزداردى ۇرىپ-سوعىپ جانە ونى ەشكىمگە ايتپاۋدى ەسكەرتىپ وتىرعان. قىزدار بۇل تۋرالى ەشكىمگە ءتىس جارماعان. وعان قورقىنىش پەن قورعانسىزدىق قانا ەمەس, «اكەمىز تاعى دا اجىراسىپ كەتپەسىن» دەگەن جاناشىرلىق وي دا سەبەپ بولعان سياقتى.
ءيا, انانىڭ جىلى الاقانىن, مەيىرىمىن اڭساعان, ساعىنعان, ارمانداعان قىزدار وزدەرىنىڭ باۋىرى, ەكى جاسار ءىنىسىنىڭ ەرتەڭىن ەسكەرگەن دە بولار. باۋىرىنىڭ تولىق وتباسىندا تاربيەلەنگەنىن قالاعان شىعار. بىراق وگەي انانىڭ قاتىگەزدىگى شەكتەن شىقتى. قىزداردىڭ تۋعان اناسى بۇگىندە شىمكەنت قالاسىندا تۇرىپ جاتقان كورىنەدى. ەستۋىمىزشە, ەكى ارادا بايلانىس ۇزىلگەن. قىزدارىنا قارايلاماعان انانى قاتىگەز نەمەسە مەيىرىمسىز دەپ كىنالاۋعا قاقىمىز جوق. ال وتباسىنداعى جاعدايدى قىزدارىنىڭ قاباعىنا قاراپ-اق ءبىلۋگە بولاتىن وتاعاسىنىڭ وسى ۋاقىتقا دەيىن ەشتەڭە بىلمەي كەلگەنى كوپشىلىكتى تاڭعالدىرىپ وتىر. وگەي انا قىزداردىڭ دەنەسىنىڭ كوزگە كورىنە بەرمەيتىن جەرلەرىن كوگەرتىپ كەلگەنى ايتىلۋدا. اكەلەرى بايقاماعان بولار, بىراق قىزدارىمەن ءجيى اڭگىمەلەسسە, قاسىندا كوبىرەك بولسا بىردەن-اق اڭعارار ەدى. بۇل دا بۇگىنگى اتا-انا مەن بالالار اراسىنداعى الشاقتىقتى بىلدىرەدى. قىزداردىڭ اتا-اجەلەرى دە الىستا ەمەس. سوڭعى جىلدارى ەرلى-زايىپتىلاردىڭ اجىراسۋ دەرەكتەرىنىڭ ارتا ءتۇسۋى دە وي سالادى. ءيا, ءبىز كىنالىنى ىزدەپ وتىرعان جوقپىز, جۇرتتى دۇرلىكتىرگەن وسى وقيعانىڭ سەبەبىن بىلسەك دەيمىز.
وسى وقيعاعا بايلانىستى وتكەن ءباسپاسوز ءماسليحاتىندا تۇركىستان وبلىستىق پوليتسيا دەپارتامەنتى ءباسپاسوز قىزمەتىنىڭ جەتەكشىسى سالتانات قاراكوزوۆا وگەي اناسىنىڭ قاتىگەزدىكپەن بالالارىن ۇرىپ-سوعىپ, دەنە جاراقاتتارىن سالۋ ارقىلى زورلىق كورسەتكەنى انىقتالعانىن ءمالىم ەتتى. قازىرگى تاڭدا بالالار جەتىساي اۋداندىق ورتالىق اۋرۋحاناسىندا دارىگەرلەر قاراۋىندا. ولاردىڭ دەنساۋلىعى مەن ءومىرىنە ەش قاۋىپ جوق. اتالعان وقيعاعا قاتىستى پىكىر بىلدىرگەن ىشكى ىستەر مينيسترلىگىنىڭ رەسمي وكىلى ءنۇردىلدا وراز ماسەلەنى مينيستر ەرلان تۇرعىمباەۆ ءوز باقىلاۋىنا العانىن حابارلادى. ماسەلەنىڭ ءمان-جايىن انىقتاۋ ءۇشىن ارنايى كوميسسيا قۇرىلدى. ءبىلىم جانە عىلىم ءمينيسترى كۇلاش ءشامشيدينوۆانىڭ تاپسىرماسىمەن ءمينيستردىڭ كەڭەسشىسى رايسا شەر جەدەل تۇردە تۇركىستان وبلىسىنا اتتانعان.
تۇركىستان وبلىسى
