تۋرابيلەردى تاڭداۋ ماقساتىن كوزدەگەن قوعامدىق كەڭەس قىزىلجار وڭىرىندە ءوز جۇمىسىن باستاپ كەتتى
سەنبى, 7 شىلدە 2012 7:31
وتكەن عاسىردىڭ الپىسىنشى جىلدارىندا, ءبىزدىڭ بالا كەزىمىزدە, اۋىلداعى ۇلكەندەردىڭ قولدارىنا سۋ قۇيىپ, قىزمەت قىلساق, ولار كوبىنەسە: «ءوسكەندە مۇعالىم بول!» دەپ باتا بەرۋشى ەدى. ءويتكەنى, ول ۋاقىتتا ۇستاز بەدەلى اسا جوعارى بولاتىن… ال, جەتپىسىنشى جىلداردان بەرى قاراي اقساقالدارىمىز جەتكىنشەكتەرگە: «سۋديا بول!», «پروكۋرور بول!» دەۋگە كوشتى. مۇنداي باتا «ومىرشەڭ» بولىپ شىعىپ, كۇنى بۇگىنگە دەيىن جالعاسىپ كەلە جاتقانى انىق. ارينە, «اكىم بول!», «بيزنەسمەن بول!», «بانكير بول!» دەۋشىلەر دە از ەمەس قازىر. «زامانىنا قاراي امالى» دەگەن وسى. قوعامدا رۋحاني قۇندىلىقتاردىڭ قادىرى كەتىپ, ءوزىمشىل پسيحولوگيانىڭ بەلەڭ الىپ بارا جاتقانىنا ءبىر مىسال بۇل.
سەنبى, 7 شىلدە 2012 7:31
وتكەن عاسىردىڭ الپىسىنشى جىلدارىندا, ءبىزدىڭ بالا كەزىمىزدە, اۋىلداعى ۇلكەندەردىڭ قولدارىنا سۋ قۇيىپ, قىزمەت قىلساق, ولار كوبىنەسە: «ءوسكەندە مۇعالىم بول!» دەپ باتا بەرۋشى ەدى. ءويتكەنى, ول ۋاقىتتا ۇستاز بەدەلى اسا جوعارى بولاتىن… ال, جەتپىسىنشى جىلداردان بەرى قاراي اقساقالدارىمىز جەتكىنشەكتەرگە: «سۋديا بول!», «پروكۋرور بول!» دەۋگە كوشتى. مۇنداي باتا «ومىرشەڭ» بولىپ شىعىپ, كۇنى بۇگىنگە دەيىن جالعاسىپ كەلە جاتقانى انىق. ارينە, «اكىم بول!», «بيزنەسمەن بول!», «بانكير بول!» دەۋشىلەر دە از ەمەس قازىر. «زامانىنا قاراي امالى» دەگەن وسى. قوعامدا رۋحاني قۇندىلىقتاردىڭ قادىرى كەتىپ, ءوزىمشىل پسيحولوگيانىڭ بەلەڭ الىپ بارا جاتقانىنا ءبىر مىسال بۇل. باتا بەرگىش ۇلكەندەرىمىز: «قارا قىلدى قاق جاراتىن سۋديا بول!» نەمەسە «ادىلدىككە اراشا تۇسەتىن پروكۋرور بول!» دەپ ايتىپ جاتسا, ءبىرسارى عوي. كوپشىلىگىنىڭ كوكەيىندەگىسى – ەرتەڭ زاڭگەرلىك ءبىلىم الىپ, سوت, پروكۋراتۋرا ورگاندارىندا قىزمەت ىستەسەڭ, قولىڭدا بال تاتيتىن بيلىگىڭ بولادى, ال بال ۇستاعان بارماعىن جالاماي قويمايدى, جاعدايىڭ جامان بولمايدى دەگەنگە سايادى دا.
تامىرى تەرەڭدە جاتقان وسىنداي ۇستەم قوعامدىق پىكىردىڭ ىقپالىمەن بۇگىندە زاڭگەرلىك ءبىلىم الىپ شىققانداردىڭ تالايىنىڭ ارمانى – سۋديا اتانۋ. ويتكەنى, قۇقىقتىق مەملەكەت قۇرۋعا ۇمتىلىس تانىتىپ جاتقان تاۋەلسىز ەلىمىزدە سۋديانىڭ مارتەبەسى وتە جوعارى – اۋداندىق سوتتىڭ قاتارداعى سۋدياسىنا دەيىن پرەزيدەنت جارلىعىمەن تاعايىندالادى. وزگە قۇقىق قورعاۋ ورگاندارىنىڭ قىزمەتكەرلەرىنە قاراعاندا سۋديالاردىڭ ەڭبەكاقىسى دا جوعارىلاۋ, الەۋمەتتىك جەڭىلدىكتەرى دە قىزىعارلىقتاي. الايدا, بۇدان سۋديالار تۋرالى ەرتەدەن قالىپتاسقان كەرەعار پىكىردىڭ وزگەرگەنى شامالى. جۇرتتىڭ سوزىنە قۇلاق ءتۇرسەڭ, تۋعانى جوق تۋرا بيلەردەن تۋعانى كوپ يمانسىز بيلەر كوپ سياقتى. ەلباسى «الەۋمەتتىك-ەكونوميكالىق جاڭعىرتۋ – قازاقستان دامۋىنىڭ باستى باعىتى» اتتى جولداۋىندا: «سۋديالار سوت تورەلىگىن تەك زاڭ مەن ار-وجداندى باسشىلىققا الا وتىرىپ شىعارۋعا ءتيىس. سۋديالار جاساعىن قالىپتاستىرۋدىڭ ءتارتىبىن تۇبەگەيلى تۇردە قايتا قاراۋ قاجەت», دەپ اتاپ كورسەتكەن بولاتىن. جوعارعى سوتتان باستاپ, ءبۇكىل سوت جۇيەسىنە وزدەرىنىڭ جاۋاپكەرشىلىگى مەن بىلىكتىلىگىن ارتىرۋ, ءسويتىپ ءوز جۇمىسىن جەتىلدىرۋ ءمىندەتتەرى قويىلدى. سۋديالاردىڭ زاڭدى بۇزۋى جۇرتتىڭ بارىنە جاريا ەتىلەتىندەي توتەنشە وقيعا بولۋعا ءتيىس,» – دەپ قاداپ ايتىلۋى ەلىمىزدىڭ سوت جۇيەسىنىڭ قازىرگى قالىپتاسقان جاعدايىنا بەرىلگەن ءادىل باعا ەكەندىگى داۋسىز.
وسى ورايدا سولتۇستىك قازاقستان وبلىستىق سوتىنىڭ توراعاسى نۇرعازى ابدىقانوۆ جوعارىدان نۇسقاۋ كۇتىپ وتىرماي, بولاشاق سۋديالار جاساعىن قالىپتاستىرۋ ءتارتىبىن جەتىلدىرۋ ماقساتىمەن قوعامدىق كەڭەس قۇرۋ جونىندە ەلىمىزدە العاشقى بولىپ, يگى باستاما كوتەردى. ونىڭ قۇرامىنا قىزىلجار وڭىرىنە تانىمال تۇلعالار – بۇرىنعى ماجىلىسمەندەر يۆان چيركالين مەن رايسا پوليششۋك, بەلگىلى جۋرناليستەر زاۋرە جۇماليەۆا مەن حاليا جولداسپاەۆا, پەتروپاۆل قالاسىنىڭ قۇرمەتتى ازاماتى راۆيل ريازاپوۆ, جەرگىلىكتى ءماسليحاتتاردىڭ دەپۋتاتتارى, ۇكىمەتتىك ەمەس ۇيىمداردىڭ جەتەكشىلەرى مەن وكىلدەرى ەنگىزىلدى. قوعامدىق كەڭەس العاشقى وتىرىسىندا-اق ءسولتۇستىك قازاقستان وبلىسى مەن باسقا وڭىرلەردەگى بىرنەشە سۋديالىق بوس ورىنداردان ۇمىتكەر مامانداردىڭ كانديداتۋرالارىن ەگجەي-تەگجەيلى تالقىلادى. ءماجىلىس زالىنا يمەنە كىرگەن, بۇگىنگىنىڭ ءبيى بولۋدى كوكسەگەن 13 زاڭگەردىڭ بارىنە الۋان ساۋالدار قويىلىپ, بىلىمىمەن قوسا ادامگەرشىلىك قاسيەتى, پاراسات-پايىمى جان-جاقتى تارازىلاندى. «الۋان-الۋان جۇيرىك بار الىنە قاراي شاباتىن» دەمەكشى, سىناققا تۇسكەندەردىڭ ءبارى دە ءوز دايىندىقتارىنىڭ دەڭگەيىن لايىقتى كورسەتكەندەرىمەن, كەڭەس مۇشەلەرىنە ايرىقشا ۇناعاندارى دا بار. ولاردىڭ اراسىندا, اسىرەسە, قىزىلجارلىقتار قۇرمەتىنە بولەنگەن ايگىلى زاڭگەر اكەسىنىڭ جولىن قۋعان, مامانداندىرىلعان اۋدانارالىق ەكونوميكالىق سوت كەڭسەسىنىڭ مەڭگەرۋشىسى داۋرەن قايرات ۇلى, ءۇش تىلگە جەتىك, وبلىستىق سوت كەڭسەسى مەڭگەرۋشىسىنىڭ ورىنباسارى زافاربەك قۇنيازوۆ, جاس تا بولسا, ءتاجىريبەلى مامان ەكەندىگى اڭعارىلعان تاڭات سماعۇلوۆ, وبلىستىق ادۆوكاتتار القاسىنىڭ ادۆوكاتى ءاليا جۇماباەۆا, سوتتالعاندار قۇقىعىن قورعاۋمەن اينالىسىپ ءجۇرگەن زاڭ ماگيسترى ەلۆيرا ورازىمبەتوۆا ەسىمدەرى ەرەكشە اتالدى.
– سۋديالار قاتارىنا كەزدەيسوق, جوعارى سەنىم بىلدىرۋگە مورالدىق قۇقىعى جوق, لايىقسىز ادامدار ءوتىپ كەتپەۋى ءۇشىن وسىنداي «قوعامدىق سۇزگىنىڭ» بولعانى ءجون دەپ بىلەمىن. سىزدەردى ءسولتۇستىكقازاقستاندىقتار جاقسى بىلەدى. سىزدەر دە ءوز جەرلەستەرىڭىز جايلى حاباردارسىزدار. سوندىقتان, ءوزارا سەنىم احۋالىن تۋعىزىپ, ەكىجاقتى بايلانىس ورناتۋ ارقىلى بولاشاق سۋديالاردى ىرىكتەۋ ءىسىن بىرلەسىپ جەتىلدىرە تۇسەمىز دەپ ويلايمىن, – دەدى نۇرعازى ابدىقانوۆ قوعامدىق كەڭەس مۇشەلەرىمەن ءوزارا پىكىر الىسۋ بارىسىندا.
بۇل جولى ەسىمدەرى وبلىستىق گازەتتەردە كۇنى بۇرىن جاريالانعان سۋديالىقتان ۇمىتكەرلەردىڭ ەشقايسىسى تۋرالى تەرىس اقپارات تۇسپەگەندىكتەن, ولاردىڭ ءبارىن دە ىرىكتەۋدىڭ ەكىنشى كەزەڭىنە جىبەرۋ جايلى شەشىم ءبىراۋىزدان قابىلداندى. مەنى تاعى ءبىر سۇيىنتكەن ءجايت: بولاشاقتا سۋديا بولۋدى ماقسات ەتكەن قازاق جاستارىنىڭ ءبارى دە ءوز انا تىلدەرىن بىلەتىندىگى.
سولتۇستىك قازاقستان وبلىستىق سوتىنا نۇرعازى ابدىقانوۆ توراعالىق ەتكەلى بەرى وقىس ءجايتتار تۋرالى ەستىگەن جوقپىز. ءسىرا, جەرگىلىكتى سوت بيلىگىنىڭ باسىنا تۋعانى جوق تۋرا بي كەلگەن بولار. نۇرعازى ابەن ۇلىنىڭ وبلىستىق سوت جانىنان بولاشاق سۋديالاردى ىرىكتەۋمەن اينالىساتىن قوعامدىق كەڭەس قۇرۋ جونىندەگى باستاماسى دا سونى اڭعارتىپ تۇرعان سياقتى.
كارىباي مۇسىرمان, «قىزىلجار اقپارات» جشس ديرەكتورى- باس رەداكتورى, سولتۇستىك قازاقستان وبلىستىق
سوت جانىنداعى قوعامدىق كەڭەستىڭ مۇشەسى.
