«ءوندىرىستىڭ وسىمىنە ەت ونىمدەرى, بالىق ونىمدەرى, ءسۇت ونىمدەرى, استىقتى تەرەڭدەتە وڭدەۋ, مايلى داقىلداردى وڭدەۋ جانە قانت وندىرىسى ايتارلىقتاي ۇلەسىن قوساتىن بولادى. ەت ءوندىرۋ ونەركاسىبىن دامىتۋ 4 ەت كومبيناتىن جاڭعىرتۋ جانە جىلدىق قۋاتتىلىعى 27 توننا بولاتىن ەت وڭدەيتىن 3 جاڭا ەت كومبيناتىن سالۋ ەسەبىنەن قامتاماسىز ەتىلەتىن بولادى, بۇل 8%-عا وسىمدى قامتاماسىز ەتەدى», دەدى س.وماروۆ.
ونىڭ ايتۋىنشا, 2019 جىلعى اقپاندا الماتى وبلىسىندا جىلدىق قۋاتتىلىعى 8 مىڭ توننا بولاتىن ەمپاير فۋد (يران) ەت وڭدەۋ كەشەنى پايدالانۋعا بەرىلدى.
«بيىل جىلىنا 5 مىڭ توننا ەت وڭدەيتىن «ەرەمەنتاۋ اقباس» جشس ەت وڭدەۋ كەشەنىن پايدالانۋعا بەرۋ جوسپارلانۋدا. قازىر تايسون فۋد (اقش), دانبيا ( ۇلىبريتانيا), گراند فارم (قحر), باۋمانن (گەرمانيا), ينالكا/كرەمونيني (يتاليا), جانە سەدار ميتس (اۆستراليا) سياقتى ترانسۇلتتىق كومپانيالاردى تارتۋ بويىنشا جۇمىس جۇرگىزىلۋدە», دەدى ول.
مينيسترلىكتىڭ اقپاراتىنا سايكەس, جيىنتىق قۋاتتىلىعى 23 مىڭ توننا ءبولاتىن 4 سۇت وڭدەيتىن كاسىپورىندى جاڭعىرتۋ ەسەبىنەن سۇت وڭدەۋ كولەمىن ارتتىرۋ قامتاماسىز ەتىلەدى.
«ولار قىشقىل ءسۇت ونىمدەرىن, سارى ماي مەن ىرىمشىكتىڭ تۇرلەرىن وندىرەتىن «ەميل» جشس (شقو), «گورمولزاۆود» جشس (اقمولا وبلىسى), «دەپ» جشس (قوستاناي وبلىسى) جانە «ەسىل ماي شايقاۋ كومبيناتى» جشس (اقمولا وبلىسى), سونداي-اق تۇركىستان وبلىسىنداعى «Golden Camel Group» جشس بولىپ تابىلادى, بۇل كاسىپورىندار اعىمداعى جىلى ءوندىرىس كولەمىن 12%-عا ۇلعايتۋعا مۇمكىندىك بەرەدى», دەدى س.وماروۆ.
بۇدان سوڭ, ول زاماناۋي تەحنولوگيالاردى قولدانا وتىرىپ, كراحمال, گليۋتەن, گليۋكازو-فرۋكتوزا ءشارباتى سياقتى استىق تۇرلەرىنىڭ تەرەڭ وڭدەلەتىنىن ايتتى.
«وتكەن جىلى سولتۇستىك قازاقستان وبلىسىندا بيدايدى تەرەڭ وڭدەيتىن, 55 مىڭ توننا كراحمال, 5 مىڭ توننا گليۋتەن وندىرەتىن قۋاتتىلىعى تاۋلىگىنە 250 توننا شيكىزات بولاتىن «بيووپەرەيشن» جشس-نىڭ يننوۆاتسيالىق زاۋىتى ىسكە قوسىلدى. اعىمداعى جىلدىڭ قورىتىندىلارى بويىنشا 1,2 مىڭ توننا گليۋتەن جانە 4 مىڭ توننا كراحمال ءوندىرۋ جوسپارلانۋدا. سونداي-اق, قوستاناي وبلىسىندا وسىعان ۇقساس بيوگرەين جوباسىن ىسكە اسىرۋ باستالدى», دەدى مينيستر.
ونىڭ ايتۋىنشا, مايلى داقىلدار ءوندىرىسىن ارتتىرۋدى «تايىنشا ماي» جشس جانە «ەفكو الماتى» جشس سياقتى ترانسۇلتتىق كومپانيالاردىڭ قاتىسۋىمەن بولاتىن جوبالار قامتاماسىز ەتەتىن بولادى.
«وسىمدىك شارۋاشىلىعى ونىمدەرىن قايتا وڭدەۋ سالاسىندا, اتاپ ايتقاندا كارتوپتى قايتا وڭدەۋ بويىنشا جىلدىق قۋاتتىلىعى 140 مىڭ توننا بولاتىن فارم فريتتس (نيدەرلاند) ترانسۇلتتىق كومپانياسىنىڭ قاتىسۋىمەن ءىرى ينۆەستيتسيالىق جوبانى ىسكە اسىرۋ جوسپارلانىپ وتىر. وسى جوبانى ىسكە اسىرۋعا الماتى وبلىسى اكىمدىگىنىڭ جاعداي جاساۋىن سۇرايمىز», دەدى س.وماروۆ.
اتالعان جۇمىستى ەكسپورتقا باعدارلانعان سالالاردى دامىتۋعا بولىنگەن قاراجات شەڭبەرىندە قازىرگى زامانعى وڭدەۋشى وندىرىستەردى قارجىلاندىرۋ ارقىلى جالعاستىرۋ جوسپارلانىپ وتىر.
«وڭدەۋشى قۋاتتىلىقتاردى شيكىزاتپەن قامتاماسىز ەتۋ ماقساتىندا 2019 جىلى اگروونەركاسىپتىك كەشەننىڭ باسىم باعىتتارى بويىنشا سالالىق باعدارلامالاردى ىسكە اسىرۋ جالعاساتىن بولادى. مال شارۋاشىلىعىندا اعىمداعى جىلى ەتتى باعىتتاعى 2000 وتباسىلىق فەرما قۇرۋ جانە سيىر ەتىن ءوندىرۋدى 10%-عا ارتتىرۋ جوسپارلانۋدا», دەدى اۋىل شارۋاشىلىعى ءمينيسترى.
سونداي-اق ول قۇس وسىرەتىن فابريكالاردى كەڭەيتۋ كەرەك ەكەنىن ايتتى.
«قۇس ءوسىرۋ بويىنشا قولدانىستاعى 8 قۇس فابريكاسىن كەڭەيتۋ كۇتىلۋدە, ناتيجەسىندە قۇس ەتىن ءوندىرۋ 11%-عا ارتاتىن بولادى. بۇدان باسقا, جالپى قۋاتتىلىعى 18 مىڭ باس بولاتىن 19 وندىرىستىك جانە 31 وتباسىلىق تاۋارلىق ءسۇت فەرماسى قۇرىلادى», دەدى ول.
