شاھارداعى جاسىل ەكونوميكا باسقارماسىنىڭ وكىلدەرى قولدارىنا فوتواپپارات الىپ, قالا كوشەلەرىن جاپپاي سۋرەتكە ءتۇسىرىپ وتىرماق. ولار تەكسەرىس ءناتيجەسىندە انىقتالعان لاس جەرلەردىڭ ءتىزىمىن اكىمدىكتەگىلەرگە جىبەرەدى. بۇل جۇمىستار الەۋمەتتىك جەلىلەر ارقىلى دا باقىلانادى. ياعني قاي اۋداننىڭ اۋماعى بارىنشا تازا بولسا, سول اۋداننىڭ باسشىسىنىڭ جۇمىسىنا بەس بالدىق كورسەتكىش بويىنشا جاقسى دەگەن باعا قويىلادى. ال تازا قالا ۇدەسىنەن شىعا الماعاندارعا, بۇل ماسەلەگە سەرگەك قاراۋعا تۋرا كەلەدى. مامانداردىڭ سوزىنشە, تەكسەرىس قاعازىندا 13 تارماق بار.
«ونىڭ ەڭ نەگىزگىلەرىن اتاپ وتەر بولساق, جولدار مەن جول جيەكتەرىنە, جاياۋ جۇرگىنشىلەر جولى مەن ارىقتاردىڭ تازالىعىنا, قوقىس توگەتىن الاڭدارعا اسا ءمان بەرىلەدى. سەبەبى قىس بويى قاراۋسىز قالعان ماڭعا قوقىس جينالىپ قالدى. وسى باعىت بويىنشا اپتا سايىن اۋدانداردى ارالايتىن بولامىز. اعاشتاردى سانيتارلىق كەسۋ جۇمىستارى مەن وزەن ارنالارىنا دا ءجىتى نازار اۋدارامىز», دەيدى جاسىل ەكونوميكا باسقارماسىنىڭ باس مامانى الەكساندر سەرگەەۆ.
