قوعام • 16 ءساۋىر، 2019

جالاقىنى ارتتىرۋ ءتارتىبىن ءتۇسىندىردى

1192 رەت كورسەتىلدى

ءبىلىم جانە عىلىم ءمينيسترى كۇلاش ءشامشيدينوۆا ءبىلىم بەرۋ سالاسىندا جۇرگىزىلىپ جاتقان جۇمىستار تۋرالى ۇكىمەتتە وتكەن ءباسپاسوز كونفەرەنتسياسىندا ايتىپ بەردى. ونىڭ ايتۋىنشا، 2019 جىلعى 1 ماۋسىمنان باستاپ ءبىلىم بەرۋ سالاسىنىڭ قىزمەتكەرلەرى جاڭا ەسەپتەۋ كەستەسى بويىنشا ەڭبەكاقى الا باستايدى. بيۋدجەت سالاسىنىڭ تومەنگى جالاقى الاتىن قىزمەتكەرلەرىنىڭ جالاقىسىن ەسەپتەۋگە كوەففيتسيەنتتەردىڭ جاڭا كەستەسى ەنگىزىلەدى.

– ءبىلىم بەرۋ ۇيىمدارى قىز­مەت­كەرلەرى جالاقىسىن 10-نان 30 پايىزعا دەيىن سارالانعان تۇردە ۇلعايتۋ جوس­پارلانۋدا. كوەففيتسيەنتتەر كەستەسى ءبىلىم بەرۋ دەڭگەيىنە، بىلىكتىلىككە، جۇمىس جاعدايىنا قاراي نەگىزگى بۋىنداعى قىزمەتكەرلەرگە (وعان كوللەدج وقىتۋشىلارى، مۇعالىمدەر، پسيحولوگتار، الەۋمەتتىك پەداگوگتار، بالاباقشا تاربيەشىلەرى، قوسىمشا ءبىلىم بەرۋ سالاسىنىڭ پەداگوگتارى جاتادى); كومەكشى قىزمەتكەرلەرگە (بالاباقشالارداعى بالا باعۋ­شى­لار، مەكەمەلەردى تازالايتىن قىزمەتكەرلەر، اۋلا تازالاۋشىلار، كۇزەتشىلەر) جانە باسقارۋشىلارعا (كوللەدج، مەكتەپتەر باسشىلارى، بالاباقشا مەڭگەرۋشىلەرى) قاتىستى بولادى. ءسويتىپ بيۋدجەت سالاسىنىڭ از جالاقى الاتىن قىزمەتكەرلەرىنىڭ ەڭبەكاقىسىن ارتتىرۋعا بولىنگەن قاراجاتتىڭ 75 پايىزى ءبىلىم سالاسىنا جۇمسالادى، – دەدى ك.ءشامشيدينوۆا. 

سونداي-اق ءبىلىم جانە عىلىم ءمينيسترى 2018 جىلدان باستاپ 208 مىڭ مۇعالىم ءبىلىم بەرۋدىڭ جاڭار­تىلعان مازمۇنى بويىنشا 30 پا­يىزدىق قوسىمشا اقى، بىلىكتىلىك سىناقتارىن ءساتتى تاپسىرعان 60 مىڭ مۇعالىم 30-50 پايىز ارالىعىندا ۇستەمەاقى الاتىنىن اتاپ ءوتتى.

«تەستىلەۋگە پەداگوگتار جىلىنا ەكى رەت – مامىر جانە قاراشا ايلارىندا قاتىسادى. ءۇش جىل ىشىندە بىلىكتىلىك ارتتىرۋ كۋرستارىنان ورتا ءبىلىم بەرۋدىڭ جاڭارتىلعان مازمۇنى بويىنشا 144 مىڭ مۇعالىم، 82 مىڭ پسيحولوگ جانە سىنىپ جەتەكشىلەرى، 15 مىڭ كوللەدجدىڭ ينجەنەرلىك-پەداگوگيكالىق قىزمەتكەرى، 2،4 مىڭ جوو وقىتۋشىلارى وتەدى»، دەدى ك.ءشامشيدينوۆا.

ونىڭ ايتۋىنشا، مەكتەپتەگى وقۋ باعدارلامالارىنا ينتەگراتسيالاۋ، اT-داعدىلاردى دامىتۋ، جوبالىق جانە زەرتتەۋ جۇمىستارىن جۇرگىزۋ، ءبىلىم بەرۋدى ينتەگراتسيالاۋ جانە ولاردى تاجىريبە جۇزىندە قولدانۋ، وقۋ جوسپارىن تولىقتىراتىن جانە بالالاردى دامىتۋعا باعىتتالعان سىنىپتان تىس ءىس-شارالار جالعاسادى.

تجكبب جانە جوعارى ءبىلىم جۇيەسىندە ءبىلىم بەرۋ باعدارلامالارىن جاڭارتۋ ەڭبەك نارىعىنىڭ تالاپتارىن، كاسىپتىك ستاندارتتاردى، WorldSkills ستاندارتتارىن، جەتەكشى شەتەل ۋنيۆەرسيتەتتەرىمەن ءبىلىم بەرۋ باعدارلامالارىن ۇيلەستىرۋدى، كاسىپكەرلىك نەگىزدەرىن، جوبالىق ءبىلىم بەرۋدى ەسكەرە وتىرىپ جالعاسادى.

«ستۋدەنتتەردى ۆولونتەرلىك قىزمەتكە تارتۋ تۋرالى ەلباسىنىڭ تاپسىرمالارىن ورىنداۋ ءۇشىن ۆو­لونتەرلىك ۆاۋچەر جۇيەسىن ەنگىزۋ باس­تالادى: 25 ساعاتقا – 25 مىڭ تەڭگە جانە ەكى كرەديتتى قايتا تاپسى­رىپ، 50 ساعاتقا – 50 مىڭ تەڭگە الىپ، 5 كرەديتتى قايتا تاپسىرادى. وسى­لايشا، بەلسەندى ستۋدەنتتەر ءوز باستا­ما­لارىن كورسەتىپ قانا قويماي، سونىمەن قاتار وزدەرىنىڭ كىرىستەرىن كوبەي­تىپ، ەرەكشە قاجەتتىلىكتەرى بار بالالارمەن جۇمىس ىستەيدى، كامەلەت جاسقا تولماعان دەۆيانتتىق مىنەز-قۇلقى بار بالالارمەن، ەگدە جاستاعى بالالارمەن الەۋمەتتىك جۇمىس جۇرگىزىپ، رەپەتيتورلىقپەن اينالىسادى»، دەدى ءبىلىم جانە عىلىم ءمينيسترى.

ك.ءشامشيدينوۆا جۋرناليستەر قويعان سۇراقتاردىڭ بارىنە جاۋاپ بەردى. سونىڭ ىشىندە جالاقىنىڭ ءوسۋى بالاباقشالارداعى تاربيەشىلەرمەن قاتار ولاردىڭ كومەكشىسى اتالاتىن بالا كۇتۋشىلەرگە دە قاتىستى ەكەنىن اشىپ ايتتى. سونداي-اق مەكتەپ بىتىرۋشىلەردىڭ ءداستۇرلى قوشتاسۋ كەشىن وتكىزۋى كەيىنگى كەزدە باسەكەگە، استا-توك شاراعا اينالىپ كەتكەنىن ايتىپ، الداعى ۋاقىتتا اتا-انالار مەن مەكتەپ بىتىرۋشىلەردى بۇل ماسەلە جونىندە ويلانۋعا شاقىردى. «مۇنداي شارا كەزىندە ەڭ باستىسى، قاۋىپسىزدىك ماسەلەسى قاتاڭ ەسكەرىلۋى كەرەك، سوندىقتان قوشتاسۋ كەشتەرىن وتكىزۋ جارىسقا اينالماي، مەكتەپ اۋماعىندا وتكەنى دۇرىس جانە مۇنداي شارا ءۇشىن ارنايى كويلەكتەر تىكتىرىپ تە قاجەتى جوق»، دەدى.
سوڭعى جاڭالىقتار

كاسپي جاعالاۋىندا قوقىس كوپ

ەكولوگيا • بۇگىن، 20:47

قازان-نۇر-سۇلتان اۋە رەيسى اشىلادى

قازاقستان • بۇگىن، 18:45

COVID-19: وڭىرلەردەگى جاعداي كۇردەلى

كوروناۆيرۋس • بۇگىن، 18:03

نۇر-سۇلتاندا قانداي ۆاكتسينالار بار؟

كوروناۆيرۋس • بۇگىن، 17:19

الماتىدا قويما ورتەنىپ جاتىر

ايماقتار • بۇگىن، 10:30

ۇقساس جاڭالىقتار