پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ توراعاسى بىرعانىم ءايتىموۆا ءوزىنىڭ سوزىندە شارانىڭ ماقساتى مەن مىندەتتەرىنە توقتالدى. ونىڭ ايتۋىنشا, قازاقستاندا جىل سايىن مۇمكىندىگى شەكتەۋلى بالالاردىڭ سانى ارتىپ كەلەدى. تەك سوڭعى بەس جىلدا ولاردىڭ سانى 7,5 پايىزعا ءوستى. ەلىمىزدە بارلىعى 680 مىڭ مۇمكىندىگى شەكتەۋلى ازامات تۇرادى, ونىڭ ىشىندە 87 مىڭى 16 جاسقا دەيىنگى كامەلەتكە تولماعاندار بولىپ وتىر. سەناتور اتاپ وتكەندەي, مۇنداي جاعداي ءبىلىم بەرۋ, دەنساۋلىق ساقتاۋ, الەۋمەتتىك قورعاۋ ورگاندارى تاراپىنان جاڭا سيپاتتاعى جۇمىس ادىستەرىن ازىرلەۋدى تالاپ ەتەدى.
سەنات كوميتەتىنىڭ باسشىسى ەلىمىزدە مۇمكىندىگى شەكتەۋلى بالالاردىڭ پروبلەمالارىن شەشۋ ءۇشىن قاجەتتى زاڭنامالىق جانە نورماتيۆتىك-قۇقىقتىق بازا قالىپتاسقانىن اتاپ ءوتتى. قازاقستان بۇۇ بالا قۇقىقتارى تۋرالى كونۆەنتسياسىنا جانە باسقا دا حالىقارالىق اكتىلەرگە قوسىلدى. سونىمەن قاتار, وسى قۇجاتتاردى ىسكە اسىرۋعا قاتىستى بىرقاتار ماسەلەلەر دە بار.
«مۇمكىندىگى شەكتەۋلى بالالار حالىقتىڭ قورعالماعان ساناتتارىنىڭ ءبىرى رەتىندە مەملەكەتتىڭ ەرەكشە نازار اۋدارۋىن قاجەت ەتەدى», - دەپ اتاپ ءوتتى ب.ءايتىموۆا. ول سەنات دەپۋتاتتارى ەلوردادا ورنالاسقان «نۇرلى جۇرەك» الەۋمەتتىك قىزمەت كورسەتۋ ورتالىعى مەن № 1 ارنايى مەكتەپ-ينتەرناتتا بولىپ, تاربيەلەنۋشىلەردىڭ ءبىلىم الۋ جانە ءومىر ءسۇرۋ جاعدايىمەن, وسى نىسانداردىڭ ماتەريالدىق-تەحنيكالىق جابدىقتالۋىمەن تانىسقانىن ەسكە سالدى. دەپۋتات ناريمان تورەعاليەۆ وسىنداي ماقساتپەن اتىراۋ قالاسىنداعى «№ 3 ارناۋلى الەۋمەتتىك قىزمەت كورسەتۋ ورتالىعىندا» بولىپ قايتتى. دەپۋتاتتار ساپار قورىتىندىسى بويىنشا بىرلەسكەن كۇش-جىگەرمەن شەشىلۋى ءتيىس بىرقاتار وزەكتى ماسەلەلەردى اتاپ ءوتتى. اتاپ ايتقاندا, ب.ءايتىموۆا مۇمكىندىگى شەكتەۋلى بالالارعا ارنالعان وقۋلىقتار سانىنىڭ ازدىعىنا, تيفلوپەداگوگ, سۋردوپەداگوگ, دەفەكتولوگ جانە باسقا دا مامانداردىڭ تاپشىلىعىنا, ەرەكشە نازار اۋدارۋدى قاجەت ەتەتىن بالالارمەن جۇمىس ىستەيتىن ماماندار جالاقىسى دەڭگەيىنىڭ تومەندىگىنە, اۋىر ەڭبەك جاعدايلارى ءۇشىن ۇستەمە اقىنىڭ جەتكىلىكسىز دەڭگەيى ماسەلەلەرىنە ءتيىستى مەملەكەتتىك ورگاندار وكىلدەرىنىڭ نازارىن اۋداردى.
ەڭبەك جانە حالىقتى الەۋمەتتىك قورعاۋ ۆيتسە-ءمينيسترى سۆەتلانا جاقىپوۆا مۇمكىندىگى شەكتەۋلى بالالاردى الەۋمەتتىك قورعاۋ جانە قولداۋ سالاسىنداعى مەملەكەتتىك ساياسات, سونداي-اق وسى سالا بويىنشا قازاقستان رەسپۋبليكاسىنىڭ حالىقارالىق مىندەتتەمەلەرىنىڭ ورىندالۋى تۋرالى نەگىزگى بايانداما جاسادى.
دوڭگەلەك ۇستەلدەگى ماسەلەلەر بويىنشا ءبىلىم جانە عىلىم ءمينيسترىنىڭ ورىنباسارى ەلميرا سۋحانبەرديەۆا جانە دەنساۋلىق ساقتاۋ ءمينيسترىنىڭ ورىنباسارى ءلاززات اقتاەۆا دەپۋتاتتارعا ءوز مەكەمەلەرىنىڭ جۇمىستارى تۋرالى بايانداپ بەردى.
شارا بارىسىندا ءماجىلىس دەپۋتاتى زاعيپا باليەۆا, اتىراۋ وبلىسى اكىمىنىڭ ءبىرىنشى ورىنباسارى سەرىك شاپكەنوۆ, «اسىل بالا» قوعامدىق قورىنىڭ توراعاسى گۇلنار وتەپوۆا, «ارۋانا» كوپسالالى مەديتسينالىق وڭالتۋ ورتالىعىنىڭ ديرەكتورى شىنار مالىك, «رۋح-الەمدى جاقسىلىق ارقىلى وزگەرتەمىز» قوعامدىق بىرلەستىگىنىڭ جەتەكشىسى الما بەكپان ءسوز سويلەدى. وسى سالا بويىنشا جۇمىس ىستەيتىن ۇكىمەتتىك ەمەس ۇيىمداردىڭ وكىلدەرى سەناتورلار مەن ورتالىق اتقارۋشى ورگانداردىڭ وكىلدەرىنە سۇراقتار قويدى.
سەنات دەپۋتاتى ناريمان تورەعاليەۆ مۇگەدەكتەردى, ونىڭ ىشىندە كامەلەتكە تولماعانداردى الەۋمەتتىك قورعاۋ جونىندەگى زاڭنامالىق جانە نورماتيۆتىك-قۇقىقتىق بازانىڭ ورىندالۋ بارىسىنا جان-جاقتى تالداۋ جاسادى. ول سونداي-اق مۇمكىندىگى شەكتەۋلى ادامداردى مەديتسينالىق جانە الەۋمەتتىك وڭالتۋ, ولارعا جەكەلەي ءبىلىم بەرۋ ماسەلەلەرىنە توقتالدى. سەناتور سونىمەن قاتار وسى سالا جونىندەگى ساپار بارىسىندا اتىراۋ وبلىسىندا كوز جەتكىزگەن جاعدايلار تۋرالى ايتىپ بەردى.
سەناتورلاردىڭ جانە باسقا دا دوڭگەلەك ۇستەلگە قاتىسۋشىلاردىڭ ۇسىنىستارى نەگىزىندە قورىتىندى ۇسىنىستار دايىندالدى, ولار ۇكىمەتكە, ءتيىستى ورتالىق جانە جەرگىلىكتى مەملەكەتتىك ورگاندارعا جىبەرىلەتىن بولادى.
