2018 جىلدىڭ قورىتىندىسى بويىنشا شەت مەملەكەتتەردە 250-دەن استام تاقىرىپتىق ءىس-شارا, ولاردىڭ ىشىندە 130-دان اسا كەزدەسۋ, 34 «دوڭگەلەك ۇستەل», 28 كىتاپ جانە فوتوكورمە, قازاقستاننىڭ تاريحى جانە مادەنيەتى تۋرالى كينوتۋىندىلاردىڭ كورسەتىلىمدەرى وتكىزىلدى. شەتەلدىك باق-تا اتالعان تاقىرىپتا 150 ماقالا جارىق كوردى.
الەمدىك قاۋىمداستىقتى قازاقستاننىڭ مادەني مۇراسىمەن تانىستىرۋ ماقساتىندا 2017-2018 جىلدارى مادەنيەت جانە ونەر ماسەلەلەرىمەن اينالىساتىن شەتەلدىك جۋرناليستەرگە ارنالعان ءۇش ءباسپاسوز تۋرى ۇيىمداستىرىلدى. 21 ەلدەن كەلگەن شەتەلدىك باق-تىڭ 50-گە جۋىق وكىلى قازاقستان ەلورداسىنىڭ جانە الماتى قالاسىنىڭ ماڭىزدى مادەني نىساندارىن ارالاپ, شىمكەنت قالاسىنىڭ جانە تۇركىستان مەن ماڭعىستاۋ وبلىستارىنىڭ كيەلى جەرلەرىندە بولدى.
«رۋحاني جاڭعىرۋ» تاقىرىبىندا سىرتقى ىستەر مينيسترلىگىنىڭ اپتا سايىن باسىلىپ شىعاتىن اعىلشىن ءتىلدى «Astana calling» اقپاراتتىق بيۋللەتەنىندە دەتيىستى ماتەريالدار جارىق كورىپ تۇرادى.
اسا ماڭىزدى ءىس-شارالاردىڭ ىشىندە قازاقستاننىڭ 2018 جانە 2019 جىلدارى لوندون كىتاپ جارمەڭكەسىنە قاتىسۋىن اتاپ وتۋگە بولادى. اتالعان ءىس-شارالار بارىسىندا الەمدىك اۋديتوريانىڭ نازارىنا قازاق ادەبيەتىنىڭ كلاسسيكتەرى مۇحتار اۋەزوۆتىڭ «قارالى سۇلۋ جانە باسقا دا اڭگىمەلەر», ورالحان بوكەەۆتىڭ «كىسى كيىك جانە باسقا دا اڭگىمەلەر», گەرولد بەلگەردىڭ «تاڭداۋلى شىعارمالارى» جانە باسقا تۋىندىلار ۇسىنىلدى.
قازىرگى تاڭدا «جاھانداعى زاماناۋي قازاقستاندىق مادەنيەت» جوباسى اياسىندا «ۇلتتىق اۋدارما بيۋروسى» قوعامدىق قورى قازاقستاننىڭ شەتەلدەگى ەلشىلىكتەرىنىڭ قولداۋىمەن قازاق ادەبيەتىنىڭ ەكى تومدىق انتولوگياسىن بۇۇ التى رەسمي تىلىنە اۋدارۋ جۇمىسىن جۇرگىزۋدە.
