«ءبىز ءوزىمىز ءبىلىم العان مەكتەبىمىزگە ينتەراكتيۆتى تاقتا مەن پروەكتور, كومپيۋتەر سىيعا تارتتىق. اۋىل اكىمدىگىمەن, مەكتەپ باسشىلىعىمەن, سىنىپتاستارمەن اقىلداسا كەلە وزىمىزبەن بىرگە وقىعان, بۇگىندە الەۋمەتتىك قولداۋدى قاجەت ەتەتىن اناستاسياعا كومەك بەرۋدى ۇيعاردىق. ءتۇرلى سالالاردا ەڭبەك ەتىپ جۇرگەن سىنىپتاس دوستارىمىزبەن وسى ءىستى جاساپ, 9 بالاسى بار سىنىپتاسىمىزدى قۋانتقىمىز كەلدى», - دەيدى بىزگە سىنىپتاستارى اتىنان حابارلاسقان ازامات.
كوپبالالى وتباسىنىڭ وتاعاسى اندرەي اۋىل تۇرعىندارىنىڭ تۇرمىستىق تەحنيكالارىن جوندەۋمەن اينالىسادى ەكەن. ال كوپبالالى انا اناستاسيا مەن ەرەسەك پەرزەنتتەرى شارۋا قوجالىقتارىندا جالدامالى جۇمىس ىستەيدى. ياعني تۇراقتى جۇمىس بولماعان سوڭ باسپانا الۋعا دا شامالارى كەلمەي, پاتەر جالداپ تۇرعان. مەكتەپ تۇلەكتەرى اۋىل شەتىنەن جەر الىپ ءۇي قۇرىلىسىن وزدەرى جۇرگىزگەن, اۋىل اكىمدىگىمەن بىرلەسە ەلەكتر جارىعى مەن اۋىز سۋدى قوسىپ بەرگەن.
ايتا كەتەلىك, شاردارا اۋدانى اكىمىنىڭ ورىنباسارى باۋىرجان شومپيەۆ قايىرىمدى ءىس جاساعان مەكتەپ تۇلەكتەرىن اۋدان اكىمىنىڭ اتىنان العىس حاتپەن ماراپاتتاپ, باتىر انا شاڭىراعىنا كورىمدىك رەتىندە كىلەم سىيلاپتى.
