ەل تۇتقاسىن ۇستايتىن مەملەكەت باسشىسىن سايلاۋ ادامنىڭ دا, قوعامنىڭ دا ومىرىندەگى ەڭ ءبىر جاۋاپتى ءسات, جاۋاپتى قادام دەپ بىلەم. ويتكەنى ەل سايلاعان پرەزيدەنت سول ەلدىڭ اتىنان, تۇتاس ءبىر ۇلتتىڭ اتىنان شەشىم قابىلدايدى. ال ول شەشىمنىڭ اسەرى بۇكىل مەملەكەتكە بولادى. ون سەگىز ميلليون قازاقستان حالقى كىمدى سايلاسا, سول سايلانعان باسشىنىڭ شەشىمى ون سەگىز ميلليون حالىقتىڭ تاعدىرىنا اسەر ەتەدى. مىنەكي, سوندىقتان دا بارلىق ازامات بارىنشا سايلاۋعا قاتىسۋى كەرەك. ءسويتىپ ەرتەڭ كۇڭكىلدەمەس ءۇشىن, وكپەلەمەس ءۇشىن ءوزىڭ شەشىم قابىلداۋىڭ قاجەت. كىمدى سايلايسىڭ, كىمگە بالا-شاعاڭنىڭ تاعدىرىن, ەلىڭنىڭ تاعدىرىن سەنىپ تاپسىراسىڭ؟ مىنە, ناعىز جاۋاپتى ءسات سول. سول كۇنى قازاقستان حالقى, ونىڭ سايلاۋعا قابىلەتتى ازاماتتارى تاريحي شەشىم قابىلدايتىن كۇن.
اسىل دىنىمىزدە مەملەكەت باسقارعان ادامنىڭ, ءتىپتى شاعىن ۇجىمدى باسقارعان جاننىڭ سۇراۋى انا دۇنيەدە ەرەكشە بولاتىنى ايتىلادى. بۇل نەنى كورسەتەدى. اتام زاماننان ادامنىڭ تاعدىرىمەن ويناۋعا بولمايتىنىن كورسەتەدى. ياعني سەن بەس ادامدى باسقارساڭ دا, بەس ميلليون ادامدى باسقارساڭ دا سەنىڭ ءاربىر شەشىمىڭە ادامنىڭ تاعدىرى بايلانىپ تۇر, سەن ادامنىڭ تاعدىرىن شەشەسىڭ دەگەن جاۋاپكەرشىلىك, امانات تۇر. ەڭ ءبىرىنشى سايلاۋشى قاتەلەسپەۋى كەرەك. ويتكەنى سەن سايلاعان ۇمىتكەر ەرتەڭ ءوز قولىمەن تاريحتى جاسايتىن تۇلعا. تىپتەن بۇل تۇرعىدا بەس-التى ادامدى باسقارىپ وتىرعان وتاعاسىن مىسالعا الساق بولادى. وتاعاسى قاتەلەسىپ شەشىم قابىلداسا ونىڭ زاردابىن بۇكىل وتباسى كورەدى. جەمىسىن دە بۇكىل وتباسى جەيدى. ال ەل باسقارعان ادام قاتەلەسسە نە بولادى. قۇداي وندايدان ساقتاسىن. ەل باسقارعان ادام قاتەلىككە بارماس ءۇشىن, حالىق مۇمكىندىگىنشە كاسىبي تۇلعانى, تاجىريبەلى تۇلعانى تاڭداۋى كەرەك. ءبىزدىڭ قاتەلىگىمىز ۇلت باسقارعان ادامنىڭ قاتەلىگىنە ۇلاسىپ كەتپەۋ ءۇشىن 9- ماۋسىم كۇنى ەڭ الدىمەن ءوزىمىز قاتەلەسپەۋىمىز كەرەك.
دايىنداعان ارمان وكتيابر
