رۋحانيات • 12 ءساۋىر، 2019

«بۇل ومىردە ءبارىمىز دە كوشپەندىمىز»

848 رەت كورسەتىلدى

جاقىندا وسكەمەندەگى ونەر مۋزەيىندە اياگوزدىك سۋرەتشى قاليبەك ايناجاروۆتىڭ «قىر بالاسىنىڭ اسەم الەمى» اتتى كورمەسى اشىلدى. بىرنەشە جىلدان بەرى قولارباعا تاڭىلسا دا، تابيعي تالانتىمەن الەمنىڭ ۇزدىك سۋرەتشىلەرىن تاڭعالدىرىپ جۇرگەن قىلقالام شەبەرى كورمەگە اعاشقا بەدەرلەپ ويىپ سالىنعان 30-عا جۋىق تۋىندىسىن اكەلىپتى. ءبىز وسى وتىزدىڭ ىشىندەگى كورمەگە كەلۋشى جۇرتتى ەرەكشە اسەرگە بولەگەن، ويلاندىرعان، تولعاندىرعان ءبىر دۇنيەگە از-كەم توقتالساق دەيمىز.

راسىندا، بۇل ونەر تۋىندىسى ءبىر قاراعاندا وتە قاراپايىم كورىنەدى. ءيا، كۇندە بولماسا دا، ارا-تۇرا كوك سەڭگىرىنەن كوزگە تۇسەتىن كادىمگى جەتىقاراقشى. ال بۇ­عان سۋرەتشىنىڭ كوزىمەن، ءاسى­رەسە جان دۇنيەسى داۋىل كۇن­گى تەڭىزدەي ساپىرىلىسقان تا­لانت يەسى قاليبەك اينا­جا­روۆتىڭ كوزىمەن قاراساڭىز، لەز­دە باس­قا الەمگە ەنىپ كە­تە­سىز. ءبىر ەرەك­شە­لىگى، مۇن­داعى جەتىقا­راق­شى­نىڭ جە­تەۋىندە دە جىلقى ءمىن­گەن ادام بەينەلەنگەن. جەتى سۋرەت جەتى ءتۇرلى ماعىناعا يە. ءبى­رىندە قۇرىق، ەكىنشىسىندە شال­ما، ۇشىنشىسىندە سويىل، ءتور­تىنشىسىندە شوقپار، بە­سىن­شى­سىندە قامشى ۇستاعان، التىنشىسىندا استىنداعى ارعىماعىن كوككە قارعىتقان، باس كيىمىنە ۇكى تاققان ارۋدى، جە­تىنشىسىندە اتى ءسۇرىنىپ، ءوزى شال­قالاي قۇلاعان جىگىتتى كو­­رەسىز. سوڭعى ەكى سۋرەتتىڭ ما­عى­­ناسىن دۇرىس تۇسىنە الماي، سۋرەتشىنىڭ وزىنەن سۇرا­عا­نىمىزدا: «مەن ەشتە­ڭەنى ويلاپ تاپپايمىن. ءبارىن ومىردەن الا­مىن. ايەلدى اتقا مىنگىزگەن سەبەبىم، ايەلسىز ءومىردىڭ ءمانى جوق. جەتىنشى سۋ­رەتتەگى ات ءۇس­تىن­دە كەنەتتەن قاي­تىس بول­عان، عۇمىرى جاستاي قي­ىلعان ادام. بۇل ومىردە نە بولمايدى؟» دەپ جاۋاپ بەردى.

بۇل ينستاللياتسيانىڭ تاعى ءبىر وزگەشەلىگى، قولاربادا تە­­­مە­كىسىن بۋداقتاتىپ سۋ­رەت­شى­نىڭ – قاليبەك اينا­جا­­روۆ­تىڭ ءوزىنىڭ وتىرۋى. سۋ­رەتتى سۋرەتشىدەن ار­­تىق كىم بىلەدى؟! تاعى دا قىل­قا­لام شەبەرىنىڭ ءوزىن سويلەتىپ كو­رەيىكشى. «ءبىز ماڭگىلىكتەن كەلەمىز، ماڭگىلىككە كەتەمىز. ءومىرىمىزدى «مەن كىم­مىن؟ ءبىز كىمبىز؟» دەگەن سا­ۋال­دارعا جاۋاپ ىزدەۋمەن وتكى­زەمىز. ارپالىسامىز، الىسامىز، كۇيىنەمىز، سۇيىنەمىز. ءبى­راق ءبىز ەشكىم ەمەسپىز. ءبىز مى­نا جۇلدىزداردىڭ استىندا ءجاي عانا ءتۇتىن سەكىلدىمىز. ادام­زاتتىڭ بۇكىل عۇمىرى وسى جۇلدىزداردىڭ استىندا ءوتىپ كەلەدى. كوكتەگى سامساعان جۇل­دىزدار ادام بالاسىنىڭ، جەر بەتىندەگى تىرشىلىك يەسىنىڭ بۇكىل تىرشىلىگىنە كۋاگەر. اي­تارى كوپ. بىراق ولار ءبىز ەمەس. سون­دىقتان دا بۇل تۋىن­دىمنىڭ اتىن «ماڭگىلىككە ءبىز عانا كۋا ەمەسپىز» دەپ قويدىم. بۇل ءومىر­دەن باي دا وتكەن، كەدەي دە وتكەن. جالعاندى جالپاعىنان باسقان پاتشا دا وتكەن. بۇل ومىردە ءبارىمىز دە كوش­پەندىمىز. ويلانايىق، تولعانايىق. ءومىردى باعا­لايىق»، – دەيدى سۋرەتشى.

ق.ايناجاروۆ قازاقتىڭ ۇلتتىق ەرتەگىسىن نەگىزگە الا وتىرىپ اعاشقا ويعان بۇل تۋىندىسىن 2015 جىلى ەكى اي كولەمىندە جاساپ شىعىپتى. ورايى كەلگەندە ايتا كەتەيىك، اياگوزدىك سۋرەتشىنىڭ كورمەسى 30 ساۋىرگە دەيىن جالعاسادى.

وسكەمەن
سوڭعى جاڭالىقتار

نار نارىمبەتوۆ ەدى...

قازاقستان • كەشە

«وميكرون» شتامى وقشاۋلايدى

كوروناۆيرۋس • كەشە

پورترەتتەگى پاراسات

ەلباسى • كەشە

ۇقساس جاڭالىقتار