جيىنعا قازاقستان حالقى اسسامبلەياسىنىڭ مۇشەلەرى, رەسپۋبليكالىق جانە وڭىرلىك ەتنومادەني بىرلەستىكتەردىڭ ءتوراعالارى, قوعامدىق كەلىسىم, انالار كەڭەستەرىنىڭ, عىلىمي-ساراپتامالىق كەڭەستىڭ, كاسىپكەرلەر قاۋىمداستىعىنىڭ, قحا جانىنداعى «جاڭعىرۋ جولى» رەسپۋبليكالىق جاستار قوزعالىسىنىڭ, عىلىمي جانە شىعارماشىل زيالى قاۋىمنىڭ وكىلدەرى قاتىستى.
ج.تۇيمەباەۆ الدا بولاتىن كەزەكتەن تىس پرەزيدەنتتىك سايلاۋدى اسا ماڭىزدى ساياسي وقيعا دەپ اتادى. «مەملەكەت باسشىسى قاسىم-جومارت توقاەۆ 2019 جىلدىڭ 9 ماۋسىمىندا قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن تاعايىنداۋ تۋرالى جارلىققا قول قويدى. بۇل وتە ماڭىزدى, ەلىمىزدىڭ دامۋىنا قاجەتتى قادام.
قازاقستاننىڭ تۇڭعىش پرەزيدەنتى – ەلباسىنىڭ ارقاسىندا ءبىزدىڭ تاۋەلسىزدىگىمىز نىعايدى. قازاقستاندى ەكونوميكاسى قۋاتتى, ساياسي جۇيەسى تۇراقتى مەملەكەت رەتىندى بۇكىل الەم مويىندادى. وتكەن ايدا بولعان جوعارعى بيلىكتى اۋىستىرۋ زاڭدى ءجانە بەيبىت جولمەن ءوتتى. الداعى سايلاۋ بولسا, ەلىمىزدىڭ تۇراقتىلىعىن نىعايتۋعا, الەۋمەتتىك-ەكونوميكالىق جاڭعىرۋدى لايىقتى جۇزەگە اسىرۋعا ىقپال ەتەتىنى ايعاق. بۇل ەلىمىزدىڭ كەلەشەگى ءۇشىن قاجەتتى سايلاۋ بولماق.
پرەزيدەنت ق.توقاەۆ ايتقانداي, ەلىمىزدىڭ كەلەشەگى, ءار وتباسى مەن ءار ازاماتتىڭ تاعدىرى قازاقستاندىقتاردىڭ شەشىمدەرىنە تىكەلەي بايلانىستى. سوندىقتان قازاقستان حالقى اسسامبلەياسى وسى ماڭىزدى شەشىمگە قاتىستى ءوز ۇستانىمىن جەتكىزىپ, قولداۋ كورسەتكەنى ءجون دەپ ەسەپتەيمىن», دەگەن ول الداعى سايلاۋدى سوڭعى ساياسي وزگەرىستەردىڭ قيسىنىنا قاراي ۋاقىتتىڭ ءوزى تالاپ ەتىپ وتىرعانىن جەتكىزدى.
جانسەيىت تۇيمەباەۆ, سونداي-اق بيلىكتىڭ ورنىقتىلىعى جوعارى دەڭگەيدە ەكەنىن, دەموكراتيالىق ينستيتۋتتاردىڭ جۇمىس ىستەپ وتىرعانىن, ساياسي مادەنيەت پەن ازاماتتاردىڭ بىرلىگىن اتاپ كورسەتە وتىرىپ, ول بۇل سايلاۋدىڭ ەلدىڭ ىشكى جانە سىرتقى ساياساتىنىڭ ساباقتاستىعى مەن اشىقتىعىن راستاۋعا مۇمكىندىك بەرەتىنىنە سەنىم ءبىلدىردى.
«ءبىز, اسسامبلەيانىڭ وكىلدەرى, پرەزيدەنت سايلاۋىنىڭ قوعامدىق كەلىسىم مەن جالپىۇلتتىق بىرلىكتى نىعايتۋعا ىقپال ەتەتىنىنە سەنىمدىمىز. ول ەلىمىزدىڭ الدىندا تۇرعان مىندەتتەردى تابىسپەن ىسكە اسىرۋ ءۇشىن حالىقتى شوعىرلاندىرۋعا قۋاتتى سەرپىن بەرەدى», دەپ قورىتىندىلادى ءوز ءسوزىن قحا توراعاسىنىڭ ورىنباسارى جانسەيىت تۇيمەباەۆ.
كەڭەستىڭ وتىرىسىندا قحا توراعاسىنىڭ ورىنباسارى, «Lituanica» قوعامدىق بىرلەستىگىنىڭ جەتەكشىسى ۆيتالي تۆاريوناس: «ەندى بۇكىل ىشكى ساياسي پروتسەستىڭ بارلىق ساتىلارى ناقتىلانىپ, ۋاقىتتارى بەلگىلەندى», دەدى. ۆ.تۆاريوناستىڭ پىكىرىنشە, پرەزيدەنتتىك سايلاۋ ءبىر جاعىنان ەل دامۋىنىڭ ءتۇيىندى ماسەلەلەرى بويىنشا جاڭا قوعامدىق كەلىسىمدى تۇجىرىمداۋعا مۇمكىندىك بەرەدى.
قوعامدىق قولداۋ تۋرالى قازاقستان حالقى اسسامبلەياسى عىلىمي-ساراپشىلىق كەڭەسىنىڭ مۇشەسى ءادىل احمەتوۆ, «قازاقستان ۇيعىرلارىنىڭ رەسپۋبليكالىق مادەني ورتالىعى» قب ەلوردالىق فيليالىنىڭ باسشىسى رۋستام ابدۋسالاموۆ, «ۆايناح» چەشەن جانە ينگۋش حالىقتارىنىڭ مادەنيەتتەرىن دامىتۋ قاۋىمداستىعى» قب مۇشەسى بەللا گازديەۆا, «قاراعاندى وبلىستىق پولياكتار قوعامى «Polonia» قب توراعاسى ۆيتالي حمەلەۆسكي ءوز ۇسىنىستارىن ايتتى.
تالقىلاۋ ناتيجەسى بويىنشا اسسامبلەيا كەڭەسى سايلاۋشىلارعا ۇندەۋ قابىلداپ, ونى «بولگار ءمادەني ورتالىعى «زلاتا» قب ءتوراعاسى ولگا اندريەۆسكايا وقىدى.
وندا: «ءبىز بولاشاق ۇرپاق الدىنداعى جاۋاپكەرشىلىگىمىزدى ءتۇسىنە وتىرىپ, حالىق پەن ەلدىڭ بيىك مۇددەلەرىنە سۇيەنىپ, ءوزىمىزدىڭ ازاماتتىق جانە پاتريوتتىق پارىزىمىزدى ورىنداي وتىرىپ, قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋى وتكىزىلۋىن قولدايمىز» دەلىنگەن.
