- ازيا چەمپيوناتىنىڭ باستالۋىنا ساناۋلى كۇن قالدى. زىلتەمىرشىلەردىڭ دايىندىق كەزەڭى قالاي وتۋدە؟
- كوماندا مۇشەلەرى ازيا چەمپيوناتىنا دايىندىق بارىسىندا رەسەيدىڭ سوچي قالاسىندا ءبىر بويى وقۋ-جاتتىعۋ جيىنىن وتكىزدى. اراسىندا رەسەيدىڭ باس كومانداسىمەن بىرلەسىپ دايىندالدىق. بۇل جاتتىعۋ كەزەڭىنىڭ بىزگە بەرگەن پايداسى كوپ. ەندى ەلگە ورالىپ, شىمكەنتتەگى «بيىك» سپورتتىق بازاسىندا جاتتىعۋدامىز. اۋىر اتلەتيكادا كوپ نارسە وزگەرىسكە ۇشىرادى. اسىرەسە, وليمپيادا ويىندارىنا ىرىكتەۋ سايىستارىنىڭ سانى كوبەيىپ, وليمپيادالىق سالماق دارەجەلەرى جاساقتالدى. توكيو ويىندارىنا ۇپاي بەرەتىن جارىستار قاتارىندا 2020 جىلى نۇر-سۇلتاندا وتەتىن ازيا چەمپيوناتى مەن قىركۇيەك ايىندا تايلاندتا وتەتىن الەم بىرىنشىلىگى دە بار. ءدال قازىر ءبىزدىڭ الدىمىزدا مەيىلىنشە كوبىرەك ۇپاي جيناۋ مىندەتى تۇر.
- قىتاي تورىندە سىنعا تۇسەتىن سپورتشىلار قۇرامى تولىق انىقتالدى ما؟
- ءيا, كوماندانى تۇگەلدەي جاساقتادىق. ازيا بىرىنشىلىگىنە قاتىساتىن سپورتشىلار اراسىندا وليمپيادا چەمپيونى راحيم نيجاتوۆ, وليمپيادا جۇلدەگەرى دەنيس ۋلانوۆ پەن جازيرا جاپارقۇل بار. سونداي-اق, يليا يلين مەن ءزۇلفيا چينشانلو دا قاتارعا قوسىلدى.
ەگەر تولىقتىرىپ ايتار بولسام, ەرلەر اراسىندا تومەندەگى سپورتشىلارعا سەنىم ارتامىز:
ارلەي چونتەي (55 كەلى), فارحاد حاركي (67 كەلى), دەنيس ۋلانوۆ, نۇرجان سامەنوۆ (81 كەلى), نيجات راحيموۆ (89 كەلى), يليا يلين, رۋستام سىباي (96 كەلى), الەكساندر زايچيكوۆ, يبراگيم بەرسانوۆ, سەلىمحان ابۋباكيروۆ (109 كەلى).
قىزدار اراسىندا سىنعا تۇسەتىن سپورتشىلار:
ءزۇلفيا چينشانلو (55 كەلى), كارينا گوريچەۆا (64 كەلى), ەكاتەرينا ستوليارەنكو, ەكاتەرينا بىكوۆا (71 كەلى), جازيرا جاپارقۇل (76 كەلى), راۋشان مەشىتحانوۆا (81 كەلى), لاريسا كوبەلەۆا (87 كەلى), ايزادا ءمۇفتىلدا (+87 كەلى).
- يليا ءيليننىڭ سالماق اۋىستىرعانىن بايقاپ وتىرمىز. ودان بولەك, جازيرا جاپارقۇل دا قاتارعا قوسىلىپتى...
- ءيا, يلين 96 كەلىگە قايتا ورالدى. ويتكەنى, باسقا تاڭداۋ جوق. وليمپيادالىق سالماق دارەجەسىنە 96 جانە 109 كەلى ەنەدى. يلين 96 كەلىدە باق سىناۋدى ءجون كوردى. ال جازيرا جاپارقۇل ريو وليمپياداسىنان كەيىن ەشقانداي جارىسقا قاتىسقان جوق. جاقىندا عانا قۇراماعا ورالىپ, سوچيدەگى جاتتىعۋ جيىنىنا قاتىستى. ازىرگە, جازيراعا قاتىستى ەشتەڭە ايتا المايمىن. ونىڭ قۇرلىق دوداسىندا جۇلدەگە تالاسپايتىنى انىق. بىراق وسى تۋرنيردەن قالىپ قويسا, كەلەسى وليمپياداعا جولداما الۋ تۋرالى ۇمىتۋعا بولادى. سول سەبەپتى, وعان ازيا چەمپيوناتىنا مىندەتتى تۇردە قاتىسىپ, ۇپاي جيناۋ كەرەك. بۇل يلينگە دە قاتىستى. ەگەر توكيو ويىندارىنا قاتىساتىن بولسا, ازيا چەمپيوناتىندا مىندەتتى تۇردە سىنعا ءتۇسۋى ءتيىس.
- دەمەك, سپورتشىلاردىڭ الدىندا مەدالدان گورى, ۇپاي الۋ مىندەتى تۇر. سولاي ما؟
- ازىرگە سولاي ايتقىم كەلەدى. كوماندا تۇراقتى ناتيجە كورسەتىپ, قانداي دا ءبىر جاراقاتتىڭ كەسىرى تيمەسە دەيمىز. ونىڭ ۇستىنە, قۇرلىق سىنىنا قاتىساتىن بىرنەشە سپورتشىمىزدىڭ ازداعان جاراقاتى بار. الدىمىزداعى باستى ماقسات – رەيتينگىلىك ۇپاي جيناۋ. ءبارى دە سپورتشىنىڭ ءوز قولىندا. قازىر وليمپياداعا ىرىكتەۋ جۇيەسى وزگەردى. بۇرىن ەكى الەم چەمپيوناتىنىڭ قورىتىندىسى بويىنشا ليتسەنزيا بەرىلەتىن. ەندى تورتجىلدىق ويىندارىنا جولداما الۋ ءۇشىن التى بىردەي تۋرنيردە ۇپاي جيناۋ قاجەت. سونداي-اق, ەندى وليمپيادا ويىندارىنا ليتسەنزيانى كىم ۇتىپ السا, سول عانا قاتىسادى. باپكەرلەردىڭ ورنىنا باسقا سپورتشىنى جىبەرۋگە قۇقىعى جوق.
