كەڭەستى كىرىسپە سوزبەن اشىپ, جۇرگىزىپ وتىرعان بقمۋ رەكتورى ن.سەرعاليەۆ قازاقستان رەسپۋبليكاسىنىڭ تۇڭعىش پرەزيدەنتى ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ جاريالانعانىنا ەكى جىل بولعانىن, وسى ارالىقتا ءبىرتالاي يگىلىكتى ءىس اتقارىلعانىن ايتىپ ءوتتى.
- ەلىمىزدىڭ قوعامدىق ومىرىندە ەرەكشە ورىن العان باعدارلامالىق ماقالا 2017 جىلى 12 ساۋىردە جارىق كوردى. سول ۋاقىتتان باستاپ باعدارلامانى ورىنداۋ بويىنشا قوعامدا كولەمدى جانە جان-جاقتى جۇمىس باستالدى. «قاسيەتتى قازاقستان» جوباسى اياسىندا وبلىسىمىزدان 7 تاريحي ورىن ۇلتتىق دەڭگەيدەگى نىساندار قاتارىنا قوسىلىپ, اق جايىق وڭىرىندە اۋقىمدى ىستەر اتقارىلدى. ونىڭ ءبارى حالىقتىڭ ءىلتيپاتىنا يە بولدى. قاسيەتتى ورىنداردىڭ قاتارىنا ەنگەن – ورتاعاسىرلىق جايىق قالاشىعى, ايگىلى بوكەيلىكتەگى حان ورداسى, جانىبەك اۋدانىنداعى عۇمار قاراش زيراتى, سىرىم اۋدانىنداعى «دادەم اتا-جۇماعازى حازىرەت» كەسەنەسى, جىمپيتىداعى الاش مۋزەيى, تەرەكتى اۋدانىنىڭ اۋماعىنان تابىلعان «تاقساي حانشايىمى» - بۇكىل ەلىمىزدىڭ ماقتانىشىنا اينالدى, - دەدى نۇرلان حابيبوللا ۇلى.
اقجايىق وڭىرىندە وڭەگەلى ىستەر قاتارىندا كۇي اتاسى قۇرمانعازى ساعىرباي ۇلىنىڭ يۋنەسكو كولەمىندەگى 200 جىلدىق مەرەيتويىنا وراي «عاسىرلار قويناۋىنان جەتكەن بابالار ءۇنى» اتتى حالىقارالىق عىلىمي ەكسپەديتسياسىن, جاڭگىر حان اتىنداعى بقاتۋ-دىڭ ۇيىمداستىرۋىمەن جورىققا اتتانعان «يندەر – ورال ءوڭىرىنىڭ بولاشاعى زور گەوباعى» جانە «حان بوگەتى» اتتى حالىقارالىق عىلىمي-تانىمدىق ەكسپەديتسيالارىن اتاپ وتۋگە بولادى.
ماحامبەت وتەمىس ۇلى اتىنداعى بقمۋ-دا «رۋحاني جاڭعىرۋ» باعدارلاماسىنىڭ نەگىزدەرىن ءبىلىم الۋشىلارعا وقۋ ءۇردىسى ارقىلى جەتكىزۋ جانە عىلىمي ساراپتامالىق-تالداۋ جۇمىستارىنا جاس عالىمدار مەن ماگيسترانتتاردى كەڭىنەن تارتۋ ءۇشىن, ولاردىڭ عىلىمي-تانىمدىق كوكجيەگىن كەڭەيتۋ ماقساتىندا ارنايى وقۋ باعدارلامالارى (ەلەكتيۆتى كۋرستار) دايارلاندى. مىسالى, «قوعامدىق سانانىڭ فيلوسوفيالىق-ۇلتتىق نەگىزدەرى», «ءوز تۋعان ولكەسىنىڭ جاعرافياسىن زەرتتەۋ», «قازاق جازۋىنىڭ تاريحى» ەلەكتيۆتى وقۋ كۋرستارى تابىستى وتۋدە. ءوڭىر باسشىسى التاي كولگىنوۆ ورال قالاسىندا 2019 جىلى حالىق باتىرى يساتاي تايمان ۇلى مەن ماحامبەت وتەمىس ۇلىنا ەسكەرتكىش بوي كوتەرەتىندىگىن تىكەلەي ەفيردە وتكەن «اكىم ساعاتىندا» جاريا ەتىپ, كوپتەن كوتەرىلىپ كەلە جاتقان ماسەلەگە نۇكتە قوياتىنىن ايتقان بولاتىن.
جيىندا ماحامبەت وتەمىس ۇلى اتىنداعى باتىس قازاقستان مەملەكەتتىك ۋنيۆەرسيتەتىنىڭ دوتسەنتى, تاريح عىلىمدارىنىڭ كانديداتى جاڭابەك جاقسىعاليەۆ «ۇلتتىق سانا: جاڭعىرۋعا ۇمتىلىس – جارقىن بولاشاققا بەتبۇرىس» اتتى بايانداما جاسادى. باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ عىلىمي ءبولىمىنىڭ باسشىسى, فيلولوگيا عىلىمدارىنىڭ دوكتورى, پروفەسسور مۇرات سابىر رۋحاني جاڭعىرۋ شارالارىن جۇزەگە اسىرۋ كەزىندە كەزدەسكەن كەلەڭسىزدىكتەرگە دە توقتالىپ, سوڭعى كەزدە جۇيەگە تۇسكەن جەتىستىكتەر تۋرالى ايتتى.
ساراپتاما كەڭەسى وتىرىس سوڭىندا «بولاشاققا باعدار: رۋحاني جاڭعىرۋ» باعدارلاماسىنان جانە ونىڭ زاڭدى جالعاسى « ۇلى دالا جەتى قىرى» باعدارلاماسىنان تۋىندايتىن مىندەتتەرگە وراي باتىس قازاقستان وبلىسىندا ىسكە اسىرىلاتىن جوبالار مەن ءىس-شارالاردىڭ تىزىمىنە تولىقتىرۋلار ەنگىزۋ تۋرالى شەشىم قابىلدادى.
- وتكەن ەكى جىل ىشىندە باتىس قازاقستان وبلىسىنىڭ بارلىق اۋداندارى مەن ورال قالاسىندا ورنالاسقان ورتا جانە جوعارى وقۋ ورىندارى, ءباسپاسوز قۇرالدارى مەن ازاماتتىق ينستيتۋتتار, كاسىپورىندار مەن مەكەمەلەر, قوعامدىق ۇيىمدار مەن ۇكىمەتتىك ەمەس ۇيىمدار, ساراپتاما كەڭەسى مەن جوبالاۋ ءوفيسىنىڭ جۇمىستارىن ءبىر ارناعا توعىستىرىپ, ناتيجەلى جۇمىس اتقارۋعا قولداۋ كورسەتكەن قوعامدىق سانانى جاڭعىرتۋ باعدارلاماسىن ىسكە اسىرۋدا باتىس قازاقستان وبلىسىنىڭ اكىمى التاي كولگىنوۆتىڭ, وبلىس اكىمىنىڭ ورىنباسارى عابيدوللا وسپانقۇلوۆتىڭ ۇيىمداستىرۋشىلىق ءرولى جوعارى بولدى, - دەيدى بقمۋ رەكتورى ن.سەرعاليەۆ.
