ونىڭ ۇستىنە كۇي-جاي تالعامايدى, اناۋ-مىناۋ سيىر مالىنا ءتان اۋرۋلارعا دا ءتوزىمدى كورىنەدى. ەڭ باستىسى, جەم-شوپكە مۇحيت اسىپ كەلگەن كەيبىر اسىل تۇقىمدى سيىرلارداي تالعامپاز ەمەس, الدىنا قويعانىن سىپىرىپ سيىرىپ جەپ الادى. ورىسكە دە شىعادى. ەتى تىعىز, ءبىر ەت, ءبىر ماي بولعاندىقتان ءدامدى. حالىقارالىق ساناتتا ءمارمار دەگەن اتاۋعا يە. التى ايلىق بۇزاۋلارىنىڭ ءوزى 200-300 كەلىگە دەيىن تارتسا, بورداقىلاعان وگىز, بۇقا ءبىر تونناعا دەيىن سالماق جينايدى.
ت.بوردىقۇلوۆ شارۋاشىلىقتا 280 باس قاشار بار ەكەنىن ايتادى. شارۋاشىلىق وزگە بۇقامەن شاعىلىسسا دا تۇقىمىن بۇزبايتىن انگۋستان ءتول الىپ, مال باسىن كوبەيتپەك نيەتتە.
باس زووتەحنيك ساحيل ىسقاقوۆ ەڭ جوعارى سۇرىپتى ءمارمار ەتىن بەرەتىن انگۋستىڭ ءونىمدىلىگى جوعارى دەپ وتىر. شارۋاشىلىقتىڭ جەم-ءشوپ دايىنداۋعا مۇمكىندىگى مول. سۇرلەم, جوڭىشقا, جۇگەرىسى دايىن. اۋەلدە 500 باسقا مال بورداقىلاۋ قوراسىن سالعان ەكەن. ەندى ونى 3 مىڭ باسقا دەيىن ۇلعايتۋدى كوزدەپ وتىر. سەبەبى بۇل مالدىڭ ەتىنە سۇرانىس جوعارى. بۇگىندە يران مەن كورشى وزبەكستانعا ەكسپورتتالىپ جاتىر. سەرىكتەستىكتىڭ يەسى ءمىناجاددين وتەەۆ جوعارى سۇرىپتى ەتتى دايىنداۋ ءۇشىن وبلىس ورتالىعىنان مال سويۋ كومبيناتىن ىسكە قوسۋعا تالاپتانىپ جاتىر ەكەن.
وسىندايدا ەسكە تۇسەدى. ۇلانعايىر جەرى بار قازاقستاننىڭ سوناۋ برازيليادان ەت ساتىپ الاتىنى تالاي مارتە ايتىلعان. قازاقستان بۇگىندە بۋفەرلىك الاڭنان شىقتى. ەندى ەلىمىزدەگى مەيرامحانالار قوناقتارىنىڭ اس مازىرىنە تارتاتىن قىمبات ءمارمار ەتى قازاقستاندىقتارعا دا قولجەتىمدى بولماق.
قىزىلوردا وبلىسى
