تورتكۇل دۇنيە تۇگەل كوز تىككەن بايراقتى باسەكەلەردە قازاق بوكسشىلارىنىڭ ءباسى قاشاندا جوعارى. جيىرماسىنشى عاسىردى تاريح قوينىنا اتتاندىراردان التى اي بۇرىن الەم نازارىن اۋدارىپ, جاسىل قۇرلىقتا الاۋى تۇتانعان سيدنەي وليمپياداسى جۇرتشىلىقتىڭ ەسىندە. ايتۋلى دودادا ەل سپورتشىلارى ەنشىلەگەن 7 مەدالدىڭ ءتورتەۋىن بولات قولدى بوكسشىلار الىپ بەرگەن ەدى. بەكزات ساتتارحانوۆ پەن ەرماحان ىبىرايىموۆ التىننان القا تاعىنسا, بولات ءجۇمادىلوۆ پەن مۇحتارحان دىلدابەكوۆ قورجىنىمىزعا وليمپيا ويىندارىنىڭ كۇمىس مەدالىن سالدى. نۇرجان كارىبجانوۆ, دانيار مۇڭايتپاسوۆ, ولجاس ورازاليەۆ سىندى وعلاندارىمىز دا جۇلدەگە سىنىق سۇيەم قالعاندا عانا ءسۇرىنىپ, بەسىنشى ورىنعا تابان تىرەگەن ەدى.
العا دەپ ۇرانداعان ەل شارشى الاڭدى شاڭداتقان جامپوز ۇلدارىنىڭ تىلەۋىن كوگىلدىر ەكران الدىندا وتىرىپ جامىراي تىلەدى. كوك بايراعىمىز كوككە كوتەرىلگەنىن كورگەندە جان ۇشىرا قۋاندى. ال ولاردى الماتى اۋەجايىنان قارسى الۋعا اسىققان اقەدىل اعايىننىڭ اقجارما كوڭىلى ءتىپتى بولەك. وسى قۋانىشتىڭ ورتاسىندا بولعان فوتوجۋرناليست كوڭىل تورىندە قالعان سول ءبىر مەرەيلى ءساتتى بىلايشا باياندادى.
– سيدنەي ءبىزدىڭ ەگەمەن ەل رەتىندە قاتىسقان ەكىنشى وليمپيادامىز. ءتۇن جارىمىنا قاراماستان داڭقتى سپورتشىلاردى اۋەجايدان كۇتىپ الۋعا حالىق كوپ جينالدى. كوپتىڭ ىشىندە ءبىز دە بولدىق. ءفوتوتىلشى رەتىندە وسىناۋ تاريحي ءساتتى ءتۇسىرۋدىڭ ورايى كەلگەن ەدى. قولدارىنا بوكسشىلاردىڭ ەسىمى جازىلعان پلاكاتتار ۇستاعان جانكۇيەرلەر قۋانىش يەلەرىنىڭ قۇشاعىن گۇلگە تولتىرىپ جاتتى. جيىلعانداردىڭ نەبارى جيىرما جاسىندا وليمپ شىڭىن باعىندىرعان تۇركىستاندىق بەكزات ساتتارحانوۆقا دەگەن ىقىلاسى ەرەكشە بايقالىپ تۇردى, – دەيدى اسىلحان ءابدىرايىم ۇلى.
ودان بەرى دە جيىرما جىلعا جۋىق ۋاقىت ءوتتى. قازاق بوكسشىلارى جەڭىسپەن ورىلگەن داڭقتى جولعا داق تۇسىرگەن جوق. بۇگىنگى تاڭدا سيدنەيدە ايبارىمىزدى اسپانداتقان ساڭلاقتار بولاشاق چەمپيونداردى باۋلىسا, ولاردىڭ كەيبىرى قازاق سپورتىنىڭ دامۋىنا وزىندىك ۇلەسىن قوسىپ ءجۇر. وزەگىمىزدى ورتتەيتىنى ارامىزدا بەكزات ساتتارحانوۆ جوق. الداعى جوسپارىڭىز قانداي دەپ سۇراق قويعان تىلشىلەر قاۋىمىنا: «ارمانىم – ءۇش دۇركىن وليمپيادا چەمپيونى بولۋ» دەپ ءۇن قاتقان ورىمدەي ۇل قالىڭ قازاقتىڭ قابىرعاسىن قايىستىرىپ كەتە باردى. بۇگىن جاسىنداي جارق ەتكەن جارىق جۇلدىزىمىزدىڭ ەسىمى قازاق تاريحىنا التىن ارىپپەن جازىلىپ, حالقىنىڭ ماڭگىلىك ساعىنىشىنا اينالعان بەكزاتىمىزدىڭ تۋعان كۇنى.
الماتى
