– جاڭاشىل تۋىندىلار ۇسىنىپ جۇرگەن جاستاردى دا قولداپ كەلەمىز. ءوز جەرىمىزدە پايدا بولعان q-pop جانرىنىڭ جانكۇيەرلەرى دە كوپ. قازاق ءتىلى مەن مۋزىكاسىن تۇرلەندىرىپ, وزدىگىنشە دامىتقان بۇل سۋبمادەنيەتكە دە ارنامىز ەفيرىنەن ورىن بەردى. «JańǵyryQ» جوباسى وزىندىك ويىمەن, ورىنداۋ مانەرىمەن, شىعارماشىلىق يدەياسىمەن ەرەكشەلەنەتىن اۆتورلاردى جينايتىن مۋزىكالىق الاڭ. بۇل جوبا مۋزىكا سالاسىنداعى اۆتورلىق كوزقاراس پەن ورىنداۋشىلىق وزگەشەلىكتەردى كورسەتۋىمەن قۇندى. جوبا بۇقارالىق سيپات العان بۇگىنگى ءان ونەرىنە جاڭا تىنىس بەرەدى. سول ارقىلى وزىندىك اۋەزى مەن ۇستانىمى بار اۆتورلاردىڭ قالىپتاسۋىنا سەبەپ بولماق. ءبىز «JańǵyryQ» جوباسى ارقىلى جاڭا مۋزىكالىق باعىتتاردىڭ, مادەني قاۋىمداستىقتاردىڭ تۋىنا ىقپال ەتەمىز دەپ سەنەمىز», – دەدى جوبا پروديۋسەرى ماقپال جۇماباي.
جوبانى ازىرلەۋگە Moldanazar توبى, مارحابا ءسابي, Satzhan project, Maqpalsher, Darkhan Juzz, Jeltoksan, DAMU, Qonyratbay Fam, Qudyr, ARShAT, ámir سىندى باس-اياعى ون ەكى ورىنداۋشى اتسالىسقان. سينتي-پوپ, فانك جانرىندا ءان سالىپ جۇرگەن عالىمجان مولدانازار العاش رەت قولعا الىنىپ وتىرعان جوبانىڭ جاڭاشا سەرپىلىس اكەلەتىنىن ايتادى.
– وسىنداي جاندى داۋىستاعى مۋزىكانى حالىققا بەتپەردەسىز جەتكىزىپ جاتقانى ءۇشىن ۇيىمداستىرۋشىلارعا العىس ايتامىن. بۇل – ءبىز ءۇشىن ۇلكەن تاجىريبە. ءار كەزەڭنىڭ تولقىندارى مەن جەلىسى بولادى. ول ءاردايىم بولعان, بولادى دا. ەڭ ماڭىزدىسى, ءبىزدىڭ ونى قالاي جەتكىزەتىنىمىزدە. وسىنداي جوبالار جالعاساتىن بولسا, مۋزىكامىز ءۇشىن كەرەمەت سەرپىلىس بولماق, – دەگەن پىكىردە ءانشى.
جوبانىڭ يدەيا اۆتورى «قازاقستان» رترك» اق باسقارما توراعاسى ەرلان قارين, پروديۋسەرى ماقپال جۇماباي, قويۋشى رەجيسسەرى توعجان قۇرمانجانقىزى, دىبىس رەجيسسەرى ورالحان سادۋاقاس. «JańǵyryQ» جوباسى 6 ءساۋىر كۇنى, 11:40-تا «Qazaqstan» ۇلتتىق ارناسىنان كورسەتىلەدى.
